"Код сәгате" Бөтенроссия акциясе кысаларында, 7 нче декабрь көнне 8-9 нчы сыйныф укучыларына информатика укытучысы Гильманова Э.Р. тематик  дәрес үткәрде. Әлеге дәреснең максаты, укучыларда информацион технологияләргә, программалау серләрен өйрәнүгә һәм информатика предметына карата кызыксыну булдыру иде. Мотивацион ролик, видеолекция тыңлаганнан соң укучылар тренажерда иң гади программалау серләрен ачтылар.

5 нче декабрь, шимбә көнне "Салават купере" спорт - сәламәтләндерү комплексында 2004 нче елгы һәм аннан да кечерәк яшьтәге укучылар арасында баскетбол ярышы буенча район Беренчелеге ярышлары узды. Безнең мәктәпнең егетләр командасы, инде ике ел дәвамында, әлеге ярышта 1 нче урынга лаек булды. Кубокны саклап калган 5 нче сыйныф егетләренә һәм команданың тренеры Хәйретдинова Лилия Рифкать кызына рәхмәтебезне белдереп, яңа җиңүләр теләп калабыз!

8 нче сыйныф укучысы Хузин Ранил "Кайбыч районы халыкны эш белән тәэмин итү үзәге" белән берлектә үткәрелгән "Киләчәккә билет" ( "Билет в будущее") республикакүләм һөнәрләр турындагы иншалар конкурсының район турында 3 нче урынга лаек булды. Ранилне һәм аның җитәкчесе- рус теле һәм әдәбияты укытучысы Хәсәнова Эльмира Галимулловнаны әлеге уңышлары белән котлыйбыз! 

Мәктәптән тыш эшләр үзәге "ЭКО"  түгәрәкләре үз эшләрен дәвам итә. Шуларның берсе "Агач эшкәртү" түгәрәге.  Хәсәнов  Айрат Габделхак улы җитәкчелегендәге әлеге түгәрәккә 5 нче һәм 6 нчы сыйныф укучылары йөри. Егетләр станокта агач кыру, кисү һәм агачны чокып эшләү серләренә төшенәләр. 

28 нче ноябрь, шимбә көнне, 9 нчы сыйныфка кадәр егетлэр арасында  район Беренчелегенә уздырылган баскетбол ярышында укучыларыбыз  икенче урынны яулап кайттылар. Мәктәп данын  яклап чыгыш ясаган егетләребезне һәм команданың тренеры Хәсәнов Илнур Рафаил улын әлеге уңышлары белән котлыйбыз, киләчәктә яңа җиңүләр теләп калабыз.

Россия Федерациясе Президентының 1998 елның 30 нчы гыйнварында чыккан 120 нче карары нигезендә Россиядә ноябрь аеның соңгы якшәмбесе һәр ел саен Аналар көне буларак билгеләп үтелә. Быел ул 29 нчы ноябрь көненә туры килә. Ә без әниләрне бәйрәм белән 27 нче ноябрь көнне котладык. "Иң кадерле кешем - Әнием!" дип аталган бәйрәм кичәсендә укучылар әниләрен котлап җырладылар, биеделәр һәм миниатюралар куйдылар. 

21 нче ноябрь көнне 9 нчы сыйныф укучылары һәм аларның әти-әниләре өчен "Имтиханнарга әзерләнәбез" дигән темага чираттагы ата-аналар җыелышы үтте. Сыйныф җитәкчесе Хәсәнова Эльмира Галимулловна укучылар һәм әти-әниләр өчен "Путь к успеху" программасы буенча "14-15 яшьлекләрнең психологик үзенчәлекләре" дигән темага методик доклад белән чыгыш ясады,  анкеталар  уздырды, 2016 нчы елгы имтиханның үзенчәлекләре белән таныштырды. Фән укытучылары да үз фәннәреннән имтихан бирү тәртипләре турында сөйләделәр. Ата-аналарга "ОГЭ-2016" дигән буклетлар таратылды. Хәсәнова Э.Г. балаларның имтиханнарга әзерләнү шартларында, әти-әниләрне балаларга психологик яктан таяныч булырга өндәде.

Бүген 2, 4 нче сыйныфлар укытучысы Мөхетдинова Алсу Назым кызы үзе укыткан сыйныфларда ачык чаралар күрсәтте. Иң элек, 2 нче сыйныфта рус теленнән "Безударные гласные в слове, способы их проверки" темасына ачык  дәресе үткәрде. Әлеге дәрестә укучылар сүзгә басым куеп, тикшерү сүзен табарга өйрәнделәр. Дәрестә укучыларның әниләре дә катнашты. Аннан соң, 2 нче һәм 4 нче сыйныф укучыларының әниләре белән берлектә, "Әнкәй җирдә иң зур кеше" дигән темага ачык сыйныф сәгате үтте. Әлеге чара якынлашып килүче "Аналар көне"н күздә тотып оештырылды.  Чараның максаты балаларны әниләрен ихтирам итергә,сүз тыңлаучан булырга өйрәтергә; әниләргә карата игътибарлылык, шәфкатьлелек хисләре тәрбияләүгә юнәлтелгән иде. Әлеге сыйныф сәгате балаларга да әниләргә дә бик ошады. Әниләренә рәхмәт сүзләре әйткәндә, кайбер укучыларның күңелләре тулып хәтта елап та алдылар. 

Мәктәпкә бүген күптән көтелгән кунаклар килде. Габдулла Кариев исемендәге Казан Татар Дәүләт яшь тамашачылар театры нәни укучыларыбызга "Керпе малае дуслар эзли" дигән спектакль алып килделәр. Әлеге тамаша укучыларга бик ошады. 

14 нче ноябрь көнне Кайбычта зур футбол ярышы булды. "Салават купере" спорт-сәламәтләндерү комплексында 2003-2004 елгы малайлар арасында  мини футбол ярышы буенча укучыларның Бөтенроссия Спартакиадасы региональ этабының зона ярышлары узды. Апас, Буа,Тәтеш, Кама тамагы, Югары Ослан, Чүпрәле,Кайбыч командалары арасында барган кискен көрәш кичкә кадәр дәвам  итте. Безнең өчен иң куанычлысы шул- Кайбыч данын безнең мәктәп укучылары яклады. Һәм без сынатмадык. Буа шәһәреннән килгән командага гына бирешеп, лаеклы 2 нче урынны яуладык. Кайбыч данын яклап чыгыш ясаган укучыларыбыз:

1. Гаттаров Рамил;

2. Гаттаров Ранис;

3. Гомәров Риназ;

4. Хисамов Инсаф;

5. Галиуллин Илфар;

6. Хәсәнов Баязит;

7. Сибгатуллин Рамазан;

8. Сибгатуллин Рәсим;

9. Фәхретдинов Дәниф;

10. Мингазов Нәфис. Безнең сезнең белән горурланабыз!