Кичә, 8 нче гыйнвар көнне укучыларыбыз Гаттарова Адилә, Газимҗанова Гөлчәчәк, Хөсәенова Ләлә һәм Хөсәенова Илгизә Кайбыч районы башлыгының актив укучылар өчен оештырылган чыршы бәйрәмендә катнашып кайттылар.  

Кышкы каникуллар дәвам итә, ә мәктәбебез балалар тавышыннан тынып тормый. Планлаштырылган чаралар үз вакытында үткәрелеп тора. 9 нчы сыйныф укучылары исә, төп фәннәр- татар теле, рус теле һәм математикадан сынаулык имтиханнарын тапшырдылар. Чиратта сайлап алынган фәннәр- химия, биология, физика һәм җәмгыять белеменнән сынаулык имтиханнары тора. Болары исә, каникулларның ахырына кадәр дәвам итәчәк. 

Мәктәбебездә кышкы лагерь үз эшчәнлеген башлап җибәрде. Биредә 15 бала үзләренең сәламәтлекләрен ныгыта һәм күңелле ял итә. Ир малайлар күп вакытларын хоккей тартмачыгында хоккей уйнап вакытларын уздыралар, ә кызларыбыз исә бүлмәдә төрле уеннар уйныйлар, рәсем ясыйлар һәм кул эшләре белән шөгыльләнәләр. Бүген "Салават купере" спорт-сәламәтләндерү комплексына бассейнда йөзергә киттеләр. 

Укучыларыбызның көтеп алган бәйрәмнәре һәм кышкы каникуллар җитте. Каникулга китер алдыннан яңа ел бәйрәмнәрен уздырдык. 28 нче декабрь көнне иртән башлангыч сыйныф укучыларыныкы, ә көннең икенче яртысында урта һәм өлкән звено укучыларының бәйрәмнәре үтте. Ә бүген исә, балалар бакчасында тәрбияләнүче балалар өчен чара оештырылды. Укучыларыбызның чыгышларын карарга әти-әниләре, әби-бабайлары һәм апа-абыйлары да килгән иде. 

"Яктылыкның безнең тормышта әһәмияте" бөтенроссия бердәм дәресе кысаларында 19 нчы декабрь көнне безнең мәктәптә тематик дәресләр узды. 1-4 нче сыйныф укучыларына әлеге дәресне башлангыч сыйныф укытучысы Хәсәнова Ф.Г, ә 5-9 нчы сыйныфлар өчен физика укытучысы Хәсәнов А.Г. үткәрде. Әлеге дәресләрдә сүз электр энергиясен һәм башка төр энергияләрне экономияләү әһәмиятлелеге турында барды. 

Бүген укучылар һәм укытучылар коллективына яңа ел бәйрәмнәре якынаю уңаеннан   Апас һәм Кайбыч районнары буенча районара күзәтү бүлеге инспекторы  Шафигуллин Илшат Хабибуллович инструктаж үткәрде. Үз чыгышында ул янгынга каршы куркынычсызлык кагыйдәләре белән таныштырды. Пиротехника кулланырга ярамавын кисәтте һәм чыршы, сыйныфларны  һәм бәйрәм үткәреләчәк залны бизәгәндә сак булырга өндәде.

Бүген безнең мәктәптә физика һәм информатика укытучыларының район семинары узды.  "Физика һәм информатика дәресләрендә белем бирү сыйфатын арттыру шарты буларак укытучының  инновацион эшчәнлеге" темасына үткәрелгән әлеге семинарда физика һәм информатика фәннәреннән ачык дәресләр каралды (укытучылар Хәсәнов А.А., Гильманова Э.Р.) һәм семинар темасы буенча төрле сораулар тикшерелде.

Бүген 2 нче сыйныф укытучысы Мөхетдинова Алсу Назым кызы әдәби уку дәресеннән "Кыска шигырьләр. Музей йортына сәяхәт" темасына ачык дәрес үткәрде. Әлеге дәреснең төрле этапларында укучылар табигатьнең һәр мизгеленнән матурлык табарга; кыска шигырь жанрының,  рифма, ритм төзелешенең үзенчәлекләрен; рәсем һәм шигърият арасындагы бәйлелекне тоярга өйрәнделәр. Быел мәктәптә үткәрелә торган  ачык дәресләр циклының тагын бер үзенчәлекле ягы бар, әлеге дәресләргә киләчәген укытучы һөнәре белән бәйләргә теләгән 8-9 нчы сыйныф укучылары да керә.

Бүген мәктәпкә Кайбыч районы эчке эшләр бүлегенең балигъ булмаганнар белән эшләүче өлкән инспекторы Кәлимуллина Фәния Нәбиулловна 7-9 сыйныф укучылары белән очрашуга килде. Әлеге очрашуда ул укучыларга административ хокук бозулар һәм аларның нәтиҗәсе турында сөйләде.

3 нче декабрь -Халыкара инвалидлар көне. Шул уңайдан декабрьнең беренче ункөнлеге - инвалидлар декадасы буларак билгеләп үтелә. Әлеге декада уңаеннан безнең мәктәптә дә төрле чаралар үткәрелде. Кичә, исә  Федоровское авылында урнашкан картлар һәм инвалидлар йортына барып, анда яшәүчеләргә  укучылар һәм укытучылар көче белән әзерләнгән концерт бүләк иттек. Укучылар көче белән әзерләнгән кул эшләре- төнбоекларны да, укучыларның һәм укытучыларның чыгышларын да әлеге йортта тәрбияләнүчеләр бик җылы һәм яратып кабул иттеләр.