Бөек Җиңүнең 70 еллыгына санаулы көннәр генә калып бара. Әлеге чарага әзерлек мәктәбебездә тулы көчкә бара: музейда эш кайный, укучылар белән төрле чаралар үткәрелә. Инде менә баннер ясатып куйдык. 

Нәүрүз төрки халыкларда бик борынгыдан килгән, Яңа елны каршылау бәйрәме ул. Нәүрүз 22 мартта - көн һәм төн озынлыгы тигезләшкән көндә үткәрелә. Әлеге бәйрәм безнең мәктәптә дә традиция  буенча һәр елны үтә. Укучылар йорт саен кереп, такмаклар әйтеп Нәүрүз күчтәнәчләре җыялар, икенче көнне исә әлеге күчтәнәчләр белән сыйланып, җырлап- биеп бәйрәм итәбез. Каникулга китәр алдыннан әлеге чараны без бүген, 21 нче март көнне уздырдык. 

10-17 нче март көннәрендә мәктәбебез Республикакүләм "Язгы игелек атнасы" на кушылды. Әлеге акция кысаларында төрле чаралар планлаштырылган иде. Болар: "Без сәламәт яшәү рәвешен сайлыйбыз" дигән темага1-9 нчы сыйныф укучылары өчен күңелле эстафеталар, "Без тирә- юньне яшелләндерәбез" дигән исем астында үткән экологик операция. Шулай ук әлеге атналыкта тимурчы укучыларыбыз  ялгыз яшәүче әби-бабайлар һәм сугыш ветераннарының өйләренә барып өй алдындагы бозларын чокыдылар, түбәдән карларын төшерергә ярдәм иттеләр. 1-4 нче сыйныф укучылары исә, сугыш ветераннарынңы өйләренә барып үзләре ясаган кул эшләрен бүләк итеп кайттылар. 

11-12 нче март көннәрендә 15 нче Республика "Созвездие. Йолдызлык" телевизион фестиваленең район турлары узды. Әлеге фестивальнең нәтиҗәләре буенча, безнең мәктәп укучылары бик әйбәт чыгыш ясады дип әйтеп була. "Вокал-соло" номинациясендә Адиятуллина Эльвина -1 нче, Хузина Гүзәл - 2 нче (җит. Габидуллина Л.Ә.),  Хисамова Илсөя - 1 нче (җит. Хисамова Р.М.) урыннар алды; "Вокаль ансамбль" номинациясендә "Салават күпере" ансамбле (җит. Габидуллина Л.Ә.) һәм "Шатлык" дуэты - 1 нче урыннарга (җит. Хисамова Р.М.) лаек булды; "Конферанс" номинациясендә Хөсәенова Ләлә-Шәмсетдинов Илназ һәм Хөсәенова Илгизә-Хәсәнов Баязит (җит. Гильманова Э.Р.) парлары икесе дә 1 нче урынга лаек булдылар. Фестивальнең Республика этабында район данын яклаучы әлеге укучыларыбызга һәм аларның җитәкчеләренә уңышлар телибез. Без Сезгә ышанабыз!!!!

8 март көнне, мәктәбебезнең "Салават күпере" вокаль ансамбле "Татарстан -"Яңа гасыр" телерадиокомпаниясе "Яшь ТНВ"каналы белән берлектә үткәрә торган "Җырлы- моңлы балачак" исемле халыкара телевизион конкурста катнашу өчен съемкада булып кайтты. Укучыларыбызның чыгышы ТНВ каналында апрель ае дәвамында күрсәтеләчәк. 

6 нчы сыйныф укучысы Шәмсетдинов Илназ, җитәкчесе- технология укытучысы Гарифуллин Сирин Шәйхул улы җитәкчелегендә районкүләм яшь уйлап табучылар олимпиадасы "21 нче гасыр Кулибиннары"ннан 1 нче урын яулап кайтты. Афәрин. Без сезнең белән горурланабыз!

28 нче февраль көнне 5-7 нче сыйныф укучыларыбыз Җиңүнең 70 еллыгы уңаеннан оештырылган, районкүләм строй һәм җыр конкурсында чыгыш ясап кайттылар. Әлеге чара яңа ачылган "Салават күпере" спорт комплексында үтте. 

Бүген мәктәптә хәрби-патриотик айлык кысаларында "Аҗаган" хәрби-спорт уены оештырылды. Әлеге уенның быелгысы Җиңүнең 70 еллыгына багышланган иде. 5-9 нчы сыйныф укучылары ике командага бүленеп көчләрен сынадылар. Ярышларның бер өлеше- ГТО нормалары тапшыру һәм эстафета мәктәпнең спорт залында үтте,  ә маршрут буенча флаг эзләү  һәм погон алу ярышлары урамда оештырылды. Әлеге уен укучыларга бик ошады.

Бүген мәктәп планы нигезендә 9 нчы сыйныфта "ТДИ. Укучыларның имтиханнарга әзерлеге" дигән тема астында ата-аналар җыелышы үтте. Җыелышта ата-аналарга имтиханнарны үткәрү тәртибе, үзенчәлеге турында сөйләнде. Шулай ук, укучыларның шушы көнгә кадәр эшләнгән имтихан эшләренә анализлар ясалды, бланк тутыру тәртибе һәм КИМнар белән таныштырылды. 

Хәрби-патриотик айлык дәвам итә. Әлеге айлыкка планлаштырылган чараларның чираттагысы -"Солдатта булган диләр" темасына проектлар конкурсы бүген үтте.  Әлеге проект өчен укучылар үз гаиләләрендә хәрби хезмәткә барып Ватан алдында бурычын үтәп кайткан туганнары - әтиләре, бабалары, абыйлары турында мәгълүмат белән чыгыш ясадылар.