5 нче сыйныфлар укучыларының старт диагностикалары дәвам. Бүген укучыларыбыз рус теленнән уку грамоталыгы буенча тест биремнәре эшләделәр. Чираттагысын 5 нче октябрь көнне рус теленнән булачак. 

Шимбә көнне районыбызда мәктәп укучылары арасында шахмат ярышлары гөрләп узды. Әлеге ярыш безнең мәктәп командасы өчен зур уңышлар алып килде. Шәхси беренчелектә, 7 нче сыйныф укучысы Хәсәнов Баязит, 9 нчы сыйныфка кадәр укучылар категориясендә 1 нче урынны яулады. 8 нче сыйныф укучылары Гаттаров Рамил һәм Гаттаров Ранисны, 7 нче сыйныф укучысы Хәсәнов Баязитны үз эченә алган командабыз исә, шулай ук 9 нчы сыйныфка кадәр категориясендә 1 нче урынга лаек булды. Афәрин укучылар, без сезнең белән горурланабыз!

2017-2018 нче уку елы безнең укучыларыбызга спортта үзләрен күрсәтергә мөмкинлек бирүдән башланып китте. Россиякүләм йөгерү көне - "Милләтләр кроссы 2017" кысаларында үткәрелгән районкүләм йөгерү ярышында 9 нчы сыйныф укучысы Габидуллин Ильмир, 1650 метрга йөгерү дистанциясендә, 9 нчы сыйныф ка кадәр укучылар категориясендә 2 нче урынны яулап кайтты.Афәрин Ильмир, киләчәктә дә зур уңышлар телибез сиңа.  

Бүген 5 нче сыйныф укучыларының  башлангыч сыйныфтан төп мәктәп курсына күчүләренең старт диагностикасына старт бирелде. Укучылар математика фәненнән тест биремнәре эшләделәр. Шундый ук диагностиканы укучылар рус теле һәм рус теленнән уку грамоталыгын тикшерү буенча да үтәчәкләр. 

23 нче сентябрь көнне Арча районында мәгариф хезмәктәрләренең җәйге спартакиадасы узды. Әлеге ярышларда районыбыз данын яклап безнең мәктәпнең физик тәрбия укытучылары - Хәйретдинова Лилия Рифкать кызы һәм Хәсәнов Илнур Рафаил улы да катнашты. Алар бадминтон ярышында  көчләрен сынадылар. Хатын -кыз бадминтончылар арасында безнең Лилия Рифкатовна 2 нче урын, Илнур Рафаилович 9 нчы урын яулап, район командасын гомуми исәптә 3 нче урынга чыгаруда үзеләренең өлешләрен керттеләр. 

"Мәктәп бакчасында көзге эшләр"  сериясе дәвам итә. Яшелчәләр инде җыелып бетте дияргә була, кәбестәләр генә үз чиратын көтәләр. Ә аңа кадәр чиратта бик мөһим эш - орлык җыю бар әле. Кызларыбыз технология дәресләрендә нәкъ менә шул эш белән мәшгульләр.  

Бүген безнең мәктәп халыкара "Бердәм рухият дәресе - "Тынычлык күгәрчене"" акциясенә кушылды. Акция Бөек Ватан сугышында һәлак булган ватандашларыбыз, тыл хезмәтчәннәрен искә алу максатыннан, бер үк вакытта, һавага, кәгазь күгәрчен беркетелгән шарлар очыртуны куз алдында тотып оештырылды. 

Бүген бергәләшеп бакчада эшләп, көзге уңышны җыеп алдык. Бәрәңге, кишер, кызыл чөгендер, ташкабакларны җыеп сакларга салдык. Уңыш мулдан булды. Димәк кышын укучыларыбызның тамагы тук булачак. 

Бүген безнең мәктәп Россиякүләм "Милләтләр кроссы-2017" акциясенә кушылды. Әлеге кросста  укучыларыбыз ике төркемгә бүленеп йөгерде. Башлангыч сыйныф укучылары аерым,ә 5 -9 нчы сыйныфлар аерым ярыштылар. Нәтиҗәдә башлангыч сыйныфлар арасында  Сөнгатуллина Әлфинә (4 нче сыйныф), ә 5- 9 нчы сыйныфлар арасында Галиуллин Илфар, Ибраһимов Илвир (7 нче сыйныф) беренче урынны яуладылар. 

Бүген авыл  фельдшеры Сафина Л.Х., әти- әнисе рөхсәт биргән укучыларга гриппка каршы привика ясады. "Ультрикс" дип аталучы әлеге препарат 1- 9 нчы сыйныф укучыларының 77% на ясалды.