Узган атнада, төгәлрәге 16 нчы ноябрь көнне, 7 нче сыйныф укучысы Хәсәнов Баязит "Кайбыч урта мәктәбе"нең 6 нчы сыйныф укучысы Багавиев Илфат белән бер командада (җитәкчеләре  Шоркина А.А.) JuniorSkills стандартлары буенча республикакүләм "Яшь профессионаллар" чемпионатының, Әлмәт шәһәрендә узган сайлап алу турында уңышлы чыгыш ясап 2 нче урын яулап кайтты. Әлеге уңыш укучыларыбызга, "Инженер дизайны" номинациясендә  чемпионатның региональ этабында катнашу мөмкинлеген бирә. Баязитны чын күңелебездән котлыйбыз, аңа яңа зууууур җиңүләр теләп калабыз!

Бүген безнең мәктәптә, районкүләм, математика укытучылары семинары узды. Әлеге семинар  " ФДББС (ФГОС) таләпләре кысаларында математика дәресләрендә укучыларның сәләтен үстерү" дигән темага багышланды. Әлеге чараның беренче өлешендә 4 нче сыйныф укытучысы А.Н. Мөхетдинова һәм математика укытучылары Э.Р.Гильманова 5 нче сыйныфта, А.С.Галиуллина 9 нчы сыйныфта  ачык дәресләр күрсәттеләр. Семинарның икенче өлешендә исә, план буенча чыгышлар тыңланды һәм төрле сораулар каралды.  

 Бүген, хезмәттәшебез, мәктәп директорының хуҗалык эшләре буенча урынбасары- Габидуллина Фрадия Зөфәр кызының гомер бәйрәме - 50 яшьлек юбилее. Шул уңайдан ул иртәдән үк котлаулар кабул итте. Юбилярны котларга дип район башлыгы урынбасары Бәдретдинова Д.Ә. һәм авыл җирлеге башлыгы Сафин Р.Б. килделәр. Алар юбилярга район башлыгы Рәхмәтуллин Альберт Илгизәр улының рәхмәт хатын тапшырдылар.  Мәктәп коллективы исә, Фрадия Зөфәр кызын, матур бәйрәм чарасы - күңелле концерт оештырып котлады. 

Бүген, 1 нче чирек нәтиҗәләре буенча, мәктәпкүләм ата-аналар җыелышы үтте. Җыелышта психолог Скворцова Елена Николаевна катнашты, ул әти-әниләр алдында "Укучыларга төрле мониторинглар үткәрү" дигән темага чыгыш ясады. Әлеге ата-аналар җыелышы "Гаиләдә милли тәрбия бирү" дигән темага багышланган иде. Бу темага тәҗрибә уртаклашу өчен сүз 3 нче сыйныфның әти-әниләренә тапшырылды. Алар бик  эчтәлекле һәм мәгънәле чыгыш ясадылар, шулай ук, үз гаиләләрендә балаларга милли тәрбия бирүдә куллана торган тәрбияви алымнары белән уртаклаштылар. Шул ук сыйныфтан Сафина Эльмира Равилевна, әти-әниләргә татар калфагы ясау буенча мастер класс үткәрде.

Татарстан Республикасы Конституциясен кабул итү көне 1992 елдан башлап билгеләп үтелә. Бу бәйрәм республика Төп Законының аерым әһәмиятен, дәүләтнең һәм җәмгыятьнең законлылыкны һәм хокук тәртибен ныгытуга омтылышын гәүдәләндерә. Быел Конституциябез үзенең 25 еллыгын билгеләп үтә. 

Һәр бәйсез дәүләтнең үз Конституциясе була. Конституция — төп закон ул. Анда дәүләтнең иҗтимагый, икътисадый корылыш нигезләре, гражданнарның хокуклары һәм бурычлары билгеләнгән. Татарстан Республикасы Конституциясе 1992 нче елның 6 нчы ноябрендә кабул ителгән. Конституциядә әйтелгәнчә, Татарстан — демократик дәүләт. Анда барлык хакимият халык кулында. Җир, су, урман һәм башка табигать байлыклары, дәүләт бюджеты акчалары, дәүләт банклары активлары, мәдәни һәм тарихи хәзинәләр — бөтенесе халык байлыгы. Хөрмәтле татарстанлылар, райондашлар барыбызны да шушы уртак бәйрәмебез белән котлыйбыз!

4 ноябрь – Халыклар бердәмлеге көне. “Бердәмлек“ төшенчәсе туплану, берләшү мәгънәсенә ия. Халкыбызга элек-электән хас сыйфат бу. Нәкъ менә бердәмлек, татулык күп кенә авырлыкларны җиңеп чыгарга, дошманнарга каршы торырга ярдәм иткән, илебезнең тынычлыгына, мөстәкыйльлегенә китергән.

Бу көн – илебез тарихына хөрмәт белдерү һәм аның данлыклы традицияләрен дәвам иттерүнең бер күркәм билгесе. Дәүләт күләмендәге бу бәйрәм 1612 елгы тарихи вакыйгаларга барып тоташа. Халыкара бердәмлек көне буларак, 2005 елдан билгеләп үтелә.

Тарихта эз калдырган бу көннәрдә безнең ата-бабаларыбыз – төрле милләт, дин һәм төрле катлам вәкилләре – бер булып, уртак Ватаныбызны чит илбасарлардан азат иткән. Төрле милләт кешеләренең иң югары максатларга ирешү өчен берләшүе, Ватанга карата чиксез мәхәббәте һәм ватанпәрвәрлеге илебезгә тарих сынауларын җиңеп чыгарга ярдәм иткән. Барыбызны да Халыклар бердәмлеге көне белән чын күңелдән котлыйбыз!

Укучыларның зарыгып көтеп алган каникуллары башланды. Әмма мәктәп балалар тавышыннан тынып тормый - түгәрәкләр расписание буенча эшли, 9 нчы сыйныф укучылары сынаулык имтиханнары тапшыралар. Алдагы көннәрдә татар теле һәм рус теленнән тапшырсалар, бүген чиратта  математика булды..  Халкыбыз мәкале "Уңышны көзен саныйлар" дисә дә, мәктәпләрдә уңышны язын саныйлар шул. Шуңа көздән үк  тырышып-тырмашып укырга, имтиханнарга әзерләнергә, консультацияләргә вакытында йөрергә кирәк. Әмма вакытында ял итә белергә дә кирәк, шул сәбәпле кичә 8 - 9 нчы сыйныф укучылары Казан шәһәренә мәдәни экскурсиягә - Кәрим Тинчурин исемендәге театрга спектакль карарга бардылар. 

28 нче октябрь көнне, Кайбыч муниципаль районы гомумбелем бирү мәктәпләрендә укучы 2003-2004 нче елгы балалар арасында, район Беренчелегенә шашка ярышлары узды. Әлеге ярыштан 7 нче сыйныф укучылары Хәсәнов Баязит, Хөсәенова Илгизә, Шәмсетдинова Алия, 8 нче сыйныф укучысы Гаттаров Рамилне алган безнең мәктәп командасы 2 нче урын яулап кайтты. Укучыларны әлеге җиңүләре белән чын күңелдән котлыйбыз. Афәрин балалар!

Кичә, 27 нче октябрь көнне, Казан шәһәре Киров районында урнашкан "4 нче № лы гимназия -интернат" базасында Сара Садыйкова исемендәге 9 нчы "Калфаклы сандугач" конкурс- фестиваленең финалы узды. Әлеге конкурста Республикабызның төрле районнарыннан һәм Казан шәһәреннән килгән 400 гә якын укучы арасында безнең укучыларыбыз  уңышлы чыгы ясап кайттылар.  "Вокаль ансамбльләр" номинациясендә "Салават күпере" ансамбле кызлары (җитәкчеләре Габидуллина Л.Ә.), "кечкенәләр төркеме"ндә 1 нче урынга лаек булдылар. Алар Сара Садыйкованың И.Фазлуллин сүзләренә язылган "Белегез шуны" җырын башкардылар. Кызларыбызны һәм ансамбльнең җитәкчесе Люция Әгъзамовнаны чын күңелебездән котлыйбыз, аларга зуууур рәхмәтебезне белдерәбез һәм яңадан- яңа иҗат уңышлары телибез!

Бүген, 28 нче октябрь көнне, Россия Федерациясенең милли ата -аналар ассоциациясе белән берлектә  ТРның мәгариф һәм фән министрлыгы 1 нче Республикакүләм ата-аналар форумы үткәрде. "Укучыларны социальләштерүнең нигезе буларак - нык гаилә: проблемалар һәм үсеш юллары" дип аталган әлеге форумда, Кайбыч районы делегациясе составында, безнең мәктәкүләм ата-аналар комитеты рәисе Хисамова Резедә Мансур кызы катнашты. Ул әлеге форумда "Нык гаиләнең ышанычы буларак гаилә традицияләре" дигән юнәлештәге мастер класста чыгыш ясады.