Хөрмәтле әти-әниләребез!  28 нче октябрь көнне Россия Федерациясенең милли ата -аналар ассоциациясе белән берлектә  ТРның мәгариф һәм фән министрлыгы Республикакүләм ата-аналар форумы үткәрә. "Укучыларны социальләштерүнең нигезе буларак - нык гаилә: проблемалар һәм үсеш юллары" дип аталган әлеге форум кысаларында һәр теләгән ата-ана үзен кызыксындырган сорауны бирә ала. Әлеге сорауларга форумда җавап биреләчәк. 

Бүген, тарих һәм җәмгыять белеме укытучысы Айрат Азатович Кәлимуллин 9 нчы сыйныф укучылары белән ачык чара- Парламент дәресе үткәрде. Әлеге дәрес "Татарстан Республикасының Конституциясе: 25 еллык тарих" дигән темага багышланган иде. Дәрес бик эчтәлекле һәм кызык үтте. 

Бүген безгә Кайбыч муниципаль районының ППҮзәге (ППЦентр) хезмәткәрләре килде. Составында, психолог Скворцова Е.Н., логопед Тихонова А.А., социаль педагог Калашникова А.Ф булган әлеге команда, 1 нче һәм 5 нче сыйныф укучыларына яңа уку шартларына җайлашу (адаптация) мониторингы үткәрделәр. Әлеге мониторинг, башлангыч мәктәп, урта звенога җайлашу процессында проблемалары килеп чыккан укучыларны ачыклау максатында үткәрелде. Логопед А.А.Тихонова  сөйләм телендә кимчелекләр булган укучыларны ачыклау өстендә эшләде. 

Бүген авылыбыз фельдшеры Сафина Люзия Һади кызы янәдән мәктәпкә килде. Туберкулез авыруын килеп чыгу очракларын алдан ачыклап, аны кисәтү максатыннан укучыларга диаскинтест препараты белән проба ясады. 

Бүген 2 нче сыйныф укучылары рус теленнән Россиякүләм тикшерү эше (ВПР) башкардылар.

Бүген, инде 5 нче елын безнең мәктәп коллективында хезмәт куйган, 33 нче ел гомерен балаларга белем һәм тәрбия бирүгә багышлаган хезмәттәшебез - татар теле һәм әдәбияты укытучысы Гайнетдинова Алсу Газиз кызының  55 яшьлек юбилее. Алсу Газизовна, Сезне шушы матур бәйрәмегез белән котлап, сезгә ныклы сәламәтлек, күңел тынычлыгы, бәхет - шатлыкларга күмелеп, кайгы - хәсрәт күрми, озын - озак яшәвегезне телибез. Сез белем биргән укучыларның хөрмәтен һәм рәхмәтен тоеп, балаларыгызның, якыннарыгызның игелеген күреп, тигезлектә яшәргә насыйп итсен Ходай. Киләчәгегез җыр кебек матур, кояш кебек якты булсын! Туачак таңнарыгыз һәрвакыт нурлы, күк йөзегез аяз булсын! 

Бүген район үзәге булган Олы Кайбыч авылында көзге ярминкә узды. Авыл җирлекләре белән беррәттән,  мәктәпләр дә үзләренең бакчадан җыеп аган уңышларын район халкы белән бүлеште. Без дә бу чарадан читтә калмадык. Бәрәңге, кәбестә, кишер, кабак, карбызларыбызны район халкы яратып сатып алды. 

Бүген мәктәбебезгә укучылар белән очрашуга "Татэнергосбыт" АҖ Буа бүлекчәсенең Кайбыч филиалыннан, клиентларга хезмәт күрсәтү бүлеге хезмәткәрләре Хәялиева Илсинә Марсовна һәм Сәлахова Айгөл Салиховна килделәр. Алар укучыларга  электр энергиясен саклауның әһәмияте турында әңгәмә үткәреп киттеләр. 

Кичә, 5 нче октябрь -укытучылар көне уңаеннан, мәктәптә "Дуслык иле" укучылар үзидарәсе оешмасы тулы көченә эшләде. Иртән- иртүк ишектән кергән укытучыларны укучыларыбыз чәчәк букетлары, шарлар, котлау сүзләре язылган йөрәк формасындагы открыткалар белән каршы алдылар. Укытучы да булып карадылар үзләре, 2 - 8 нче сыйныфларда дәресләрне алар укыттылар. Ә иң мөһиме, алар безгә бик матур һәм кызыклы концерт программасы әзерләгәннәр иде. Укучыларыбызга тырышканнары өчен зур рәхмәтебезне белдерәбез! Ә инде коллегаларыбызны һөнәри бәйрәмнәре белән котлап эшләрендә зур уңышлар, сәләтле һәм белемле укучылар телибез!

Бүген бәйрәм - Укытучылар көне! Укытучылар көне - гомерен үсеп килүче яшь буынны тәрбияләү һәм укыту белән бәйләгән һәркемнең бәйрәме. Укытучы - бала белән кечкенәдән янәшә булып, аңа һәр яңаны танып белергә, сәләтен ачарга, тормышта юл сайларга ярдәм итүче кеше. Укытучы беренче булып укучысының уңышларын күрә, аның гашыйк булуын тоя. Укытучының зирәклеге һәм түземлелегеннән күп нәрсә бәйле, яшь гражданинның киләчәктә язмышы хәл ителә.

Хөрмәтле коллегалар! Сезнең барыгызга да нык сәламәтлек, иҗади уңышлар, иминлек, хезмәт җиңүләре, игелекле укучылар тәрбияләвегезне телибез.Сезнең тырышлыгыгыз, талантыгыз, йокысыз үткәргән төннәрегез шатлык булып кайтсын иде.Бәйрәмегез белән сезне!