28 октябрь көнне Урта Курса төп гомуми белем мәктәбендә “Интернет челтәрендә куркынычсызлык” дип аталучы бердәм класстан тыш чара үткәрелде. Чарада 6 нчы һәм 9 нчы сыйныф укучылары катнашты. Информатика һәм ИКТ укытучысы тарафыннан укучыларга интернет челтәре һәм анда безне адым саен сагалап торучы куркыныч ситуацияләр турында файдалы информация сөйләнелде, кызыклы презентация тәкъдим ителде. Укучылар чарада бик актив катнаштылар, куелган проблемалы сорауларга бергәләп җавап эзләделәр һәм чара ахырында бердәм нәтиҗәгә килделәр: интернет челтәрен һәм компьютерны дөрес куллана белү – бик мөһим!

Бүген мәктәп спортзалына Форпост отрядлары членнары волейбол ярышына җыелды. Зонадагы 5 мәктәп командасы (Урта Курса, Сеҗе, Сикертән, Курса Почмак, Кәче, Иске Чүриле мәктәпләре) арасында кискен көрәш барды. Форпост отрядларының уенын җанатарлар да кызыксынып күзәтте. Нәтиҗәләр түбәндәгечә булды: егетләр арасында 1 урында - Иске Чүриле,  2 урында - Курса Почмак, 3 урында - Урта Курса, Сикертән, Сеҗе, Кәче мәктәпләре, кызлар арасында 1 урында - Курса Почмак , 2 урында - Кәче, 3 урында - Урта Курса мәктәпләре командалары. Ярышта катнашкан барлык командаларга һәм аларның җитәкчеләренә рәхмәт белдерәбез!

Бүген 4, 6, 8 нче класс укучылары ТР Мәгариф һәм Фән министрлыгы боерыгы нигезендә татар теленнән диагностик тест эшләделәр. 

Бүген "Иң зур дәрес" акциясе кысаларында 5 нче класс укучылары өчен әңгәмә уздырылды. Мөмкинлекләре чикле кешеләргә карата мәрхәмәтлелек, дустанә мөнәсәбәтләр, җылы караш булдыруда һәм тәрбияләүдә әлеге дәреснең әһәмияте зур булды.

Башлангыч сыйныф укучылары белән «Ил күләмендә иң зур дәрес” үткәрелде. Дәреснең максаты: хәерчелекне бетерү, ачлыкка каршы көрәш, сәламәтлекне саклау, тигез шартларда яшәү, климат шартларына каршы көрәш, балаларга сыйфатлы белем бирү. Матур презентация, уеннар, табышмаклар кулланып үткәрелгән бу дәрес укучыларга күп яңалык бирде. 

Бүген авыл мәдәният йортында укучылар өчен көзге уңыш бәйрәме үткәрелде. Көндез 1-5 нче класс укучылары бәйрәм итсә, кич белән 6-9 нчы класс укучылары өчен бәйрәм оештырылды. Укучылар әлеге бәйрәмдә үзләренең җырга-биюгә, сүзгә осталыкларын күрсәттеләр.

Бүген Г.Камал исемендәге Сикертән төп гомуми белем мәктәбендә якташыбыз Мөхәммәт Мәһдиевнең  иҗади мирасын өйрәнүгә багышланган  фәнни-гамәли конференция үткәрелде. 8 нче класс укучысы Садриева Альбина (фәнни җитәкчесе - Садриева Н.З.) "М.Мәһдиев әсәрләрендә туган як темасы" бүлегендә уңышлы чыгыш ясады һәм 1 нче урынга лаек булды. Укучыбызны җиңүе белән котлыйбыз!

Бүген мәктәптә 6-7 нче класс укучылары өчен психологик тренинг үтте. Аны педагог-психологлар Сафина Зөлфия Шәүкәтовна, Сәмиева Гөлнур Фануровна, Зөбәерова Айгөл Фаилевна уздырды. Төркемнәрдә һәм уен формасында  үткәрелгән әлеге тренинг укучыларга бик ошады.

Профориентация эше мәктәптә тәрбия бирүнең төп юнәлешләреннән санала. Ул дәресләрдә, класстан тыш кичәләрдә тормышка ашырыла. Укучыларның һөнәрләргә карата кызыксынуын, сәләтен, эшче һөнәрләрнең популярлыгын арттыру максатыннан  бүген 7-8 нче класс укучылары һөнәри юнәлеш буенча тест эшләделәр.