Агымдагы елның 1нче сентябреннән Республикабыз буенча Балалар ышаныч телефоны эшли. 8-800-2000-122 телефоны буенча бала аноним рәвештә квалификацияләнгән психологик ярдәм алачак. Шулай ук бу номер буенча гаиләдә һәм аннан тыш физик көч куллану очраклары буенча да ярдәм сорарга мөмкин.
    Әлеге номерга шалтырату йорт телефоныннан да, кәрәзле телефоннан да бушлай.

"Көзге игелекле эшләр эстафетасы" акциясе барышында төрле чаралар уздырылды. Шуларның чираттагысы Алан авылында булды. 12 нче сентябрь көнне Бөек Ватан сугышында һәлак булганнар истәлегенә обелиск  ачылды. Бу чарада район башкарма комитеты җитәкчесе урынбасары Рамил Гарифҗанов , Арча һәм Әтнә районнары буенча хәрби комиссар Алмаз Борһанов,  Яр Чаллы татар дәүләт драма театры режиссеры, Татарстанның атказанган артисты Булат Сәлахов, авылыбыз җитәкчеләре, мәктәбебез укучылары, укытучылар катнашты. Укучылар чыгышы алкышларга күмелде.

Бүген мәктәбебез укучылары Арча шәһәрендәге Җиңү паркына сәяхәткә бардылар. Паркның истәлекле урыннары белән танышканнан соң, укучыларны Арча укучылар сараеннан Ситдикова Зөһрә Алмазовна каршы алды. Ул үзенең күңелле һәм мавыктыргыч уеннары белән укучыларны бик тиз җәлеп итте, туплады, вакыт узганы сизелмәде дә. Сәяхәттән укучылар яхшы кәеф белән кайтты. Оештыручыларга зур рәхмәт!

Гомерләре буе хезмәттә кайнаган, сугыш һәм сугыштан соңгы авырлыкларны иңнәрендә күтәргән әби-бабаларыбыз картлык көннәрендә зур игътибарга, хөрмәткә лаек. Заман авырлыкларына бирешмичә, алар  алдагы тормышка өмет белән карап яшиләр. Ә без, яшь буын, аларга һәрдаим булышып торабыз, көчебез,  игелекле гамәлләребез белән ярдәм итәргә тырышабыз.

11 нче сентябрь көнне 3 нче сыйныфта  “Яхшы булу – зур бәхет” темасына класс сәгате үткәрелде. Презентация буенча укучылар “Яхшы булу өчен нәрсә кирәк?” темасына җавап таптылар. Бер-берсенә, әти-әнигә, туганнарга, дусларга, чит кешеләргә эшләгән яхшылыкларын искә төшерделәр, уртаклаштылар. Ахырдан технология дәресендә кулдан ясаган уенчыкларын “Ләйсән” балалар бакчасына бүләк иттеләр.

Баланың физик үсеше һәм сәламәтлеге аны шәхес итеп формалаштыруда нигез булып тора. Балаларны теге яки бу физик күнегүләрне аңлы рәвештә башкарырга, үз организмнарының мөмкинлекләрен белергә өйрәтү – безнең  төп бурыч."Көзге игелек атнасы" кысаларында укучылар белән спорт һәм физкультура-сәламәтлек чаралары уздырылды.

Көзге игелек атнасының бүгенге көне балалар бакчасында тәрбияләнүчеләрне сөендерү белән үтте. Укучылар алар каршында матур концерт куйдылар.

"Көзге игелек атнасы - яхшы гамәлләр эстафетасы" акциясе кысаларында бүген шигырь сөйләүчеләр арасында конкурс узды. Укучыларга сәнгатьле сөйләү күнекмәләре бирелде, алар белән яхшы гамәлләр кылу турында әңгәмәләр уздырылды.

Бүген барлык классларда да "Бергә башкарабыз!" исеме астында экологик дәресләр узды. Аларның төп максаты тирә-юньгә, табигатебезгә сакчыл караш тәрбияләү, укучыларның экология буенча белемнәрен тирәнәйтү иде.

Бүген укучыларга пожар куркынычсызлыгы, террорга каршы әңгәмәләр узды һәм мәктәп күләмендә эвакуация үткәрелде.