Бүген 9 нчы класс укучылары рус теле фәненнән сынау имтиханы биреп карадылар. Нәтиҗәләр канәгатьләнерлек булыр дип ышанып калабыз.

Бүген Түбән Мәтәскә урта мәктәбендә профсоюз хезмәткәрләре арасында зонаара шашка-шахмат ярышлары уздырылды. Әлеге ярышта мәктәбебездән Шәфигуллин Н.Ф һәм Шаһниева Р.Р. катнашты һәм уңышлы чыгыш ясады. Хатын-кызлар арасында шахмат буенча 2 нче урынны Шаһниева Р.Р. яулады. Афәрин!

Укучылар каникулда да вакытларын бушка уздырмыйлар, яратып чана, чаңгы шуалар.

Хөрмәтле хезмәттәшләр! Сезне Яңа ел белән котлыйбыз! Киләсе елда бәйрәмнәрегез мөбарәк, күңелле, куанычлы булсын.Эшләрегез уң булсын, күңелегездәге мәрхәмәтлелек нуры йөзегезне тагын да бизәсен. Бусагаларыгыздан караңгылык, салкынлык, хәвеф-хәтәр атлап кермәсен, бәла-каза йөрмәсен. 2016 нчы ел бәхетле мизгелләр, матур вакыйгалар, яхшы хәбәрләр, саулык-сәламәтлек алып килсен.

Бүген 2 нче чирек нәтиҗәләре буенча педагогик киңәшмә үткәрелде. Көн тәртибендә яртыеллык йомгаклары, программа үтәлеше каралды. Төп белем бирү ФДС да каралган тәрбия принципларын тормышка ашыру буенча чыгыш һәм фикерләр тыңланды, дәүләт йомгаклау аттестациясенә әзерлекнең барышы белән фән укытучылары таныштырды. Киңәшмәдә алдагы чиреккә бурычлар куелды.

28 декабрьдә “Арча” спорт комплексында район башлыгы җитәкчелегендә чыршы бәйрәме үткәрелде. Анда район мәктәпләреннән уку алдынгылары, спортта, иҗади эштә, җәмәгать тормышында актив катнашучы балалар катнашты. Мәктәбебездән Мингазова Зилә, Садриева Альбина бәйрәмдә катнашу бәхетенә ирештеләр.Бу бәйрәм барлык укучыларның да күңелендә озак сакланыр. Оештыручыларга зур рәхмәт!

Яңа ел! Бу сүзләрне ишетүгә безнең күз алдыбызга зифа чыршы, ап-ак кар бөртекләре, җемелдәвек сихри утлар килеп баса. Яңа ел диюгә – уен-көлке, җыр-бию, Кыш бабай, Кар кызы, әкият геройлары күз алдына килә. Бүген 1-5 нче класс укучылары һәм класс җитәкчеләре тарафыннан оештырылган бәйрәмдә әнә шушы мизгелләрнең барысын да күрергә мөмкин иде. Бәйрәмне әзерләгән һәм катнашкан һәммә кешегә дә зур рәхмәт белдерәбез!

Тагын бер ел артта калды

Борчуы, шатлыклары.

Ак бәхетләр, уңыш теләп

Ява Яңа ел кары.

Укучылар көтеп алган Яңа ел бәйрәме якынлаша. Мәктәптә аңа әзерлек эшләре берничә көн элек башланган иде. Укучылар классларны, коридорларны бизәделәр,  җырлар, биюләр өйрәнделәр, кардан сыннар ясадылар. Бүген 6-9 нчы класс укучылары катнашында бәйрәм уздырылды. Күтәренке кәеф бүләк иткән барлык укучыларга, класс җитәкчеләренә рәхмәт белдерәбез! 

Яңа ел бәйрәмнәре якынлашу белән, мәктәп тирәсенә кардан сыннар ясалды. Укучылар һәм аларның класс җитәкчеләре әлеге эштә зур тырышлык куйды.