Бүген безнең мәктәп Россиякүләм "Тормыш тамчысы" ("Капля жизни") акциясенә кушылды. Нәкъ 15 ел элек Беслан фаҗигасе корбаннарын террористлар тоткынлыгыннан коткарган көн уңаеннан оештырылган  әлеге акциягә  "Кыю йөрәкләр" яшь армиячеләре дә кушылдылар. 

Бүген зур бәйрәм -  Белем бәйрәме. Бу көнне һәрберебез дулкынланып, шатланып каршы ала: беренче тапкыр мәктәпкә баручы да, өлкән сыйныфларда укучы да, әти-әниләр дә. Балаларны да, өлкәннәрне дә, хөрмәтле хезмәттәшләребезне дә шушы көтеп алынган ямьле бәйрәм белән тәбрик итәбез.

Сөенеп, шатланып, зур өметләр баглап быел безнең мәктәпнең 1 нче сыйныфына 4 укучы керде - алтын бөртеге кебек 2 егет һәм 2 кыз. Раяз, Раиль, Сөмбел һәм Эльвираны  беренче укытучылары Хәсәнова Фәһимә Габдулла кызы каршы алды. Нәниләребезне котларга Петухова Фәния Фәрит кызы һәм Зиннәтуллин Рамил Сәлим улы, ветеран укытучыларыбыз килделәр.  "Дубрава" ачык акционерлык җәмгыяте исә балаларны котлап үз бүләкләрен тапшырдылар. 

30 август көнне Татарстанда зур бәйрәм - Республика көне билгеләп үтелә. Шул уңайдан яраткан Республикабыздагы һәр кешене әлеге зур бәйрәм белән котлыйбыз. Сезгә чын күңелдән игелек, тынычлык, иминлек телибез. Киләсе көннәргә ышаныч белән карап, газиз Татарстаныбыз хакына үзебезгә хас тырышлык белән, җаваплылык тоеп эшлик.

 Бүген, 25 нче август -  Моабит төрмәсендә җәлилчеләрне хөкем итүгә - 75 ел. Шушы дата уңаеннан, 22 нче август көнне Апас районында Герой шагыйрь Муса Җәлилнең кызы Чулпан Җәлилова белән очрашу оештырдылар.  Әлеге чарага җәлилчеләр -  Абдулла Алишнең һәм Габдулла Батталның да туганнары килгән иде. Безнең мәктәпнең "Кыю йөрәкләр" яшь армиячеләре  әлеге тарихи вакыйганың шаһитлары булдылар.

22 август- Россия Федерациясенең Дәүләт байрагы көне! Дәүләтебезнең төп символларының берсе булган әлеге байракның тарихы  350 ел элек башланган! Әлеге дата уңаеннан бүген мәктәптә,  "Кыю йөрәкләр" яшь армиячеләре отряды белән "Россиянең өч төсе" дигән темага мәгълүмати әңгәмә үткәрелде. 

Укучылар ял иткән вакытта мәктәпкә косметик ремонт ясап алдык: сыйныфларда идәннәрне, икенче катка менү баскычы мәйданчыкларын буядык, җыйдык, юдык. Мәктәбебез киң колач җәеп укучыларны кабул итергә әзер!

Укучылар җәйге каникулларга китсәләр дә, мәктәп участогында җәйге практикаларын үтүләрен дәвам итәләр.  Чиратта башлангыч сыйныф укучылары. Бүген укучылар суган уңышын җыеп алдылар.

Бүген әфганчы авылдашыбыз - Хисамов Илшат Дәүләтша улының туып- үскән нигезенә мемориаль такта куйдылар. Әфган сугышында, Чечен сугышында катнашкан, Казан шәһәрендә полиция хезмәткәре булган авылдашыбызның истәлегенә оештырылган әлеге чарада авылдашларыбыз, район башлыгының урынбасары Макаров А.Н.,  районыбызның әфганчылары, туганнары, мәктәп коллективы, "Кыю йөрәкләр" юнармия отряды әгъзалары катнашты.

Бүген без зур эш башкардык. Кыш өчен малларга витаминлы азык -  яфрак азык әзерләп үзебезнең авыл җирлегендәге "Дубрава" җәмгыятенә тапшырдык. Әлеге эшне мәктәп коллективы күмәкләшеп эшләдек.  

"Чишмәкәй" лагеренда бүген зур концерт булды! Концертка балаларның әниләре дә килде.Укучылар үз көчләре белән әзерләнеп җырлар өйрәнгәннәр, шигырьләр сөйләделәр, биеделәр, халкыбызның җырлы- биюле "Йөзек салыш" уенын да уйнадылар.