3-15 март көннәрендә юлда, мәктәпкә сыерчык оялары күтәреп килүче балаларны очратырга була иде. Бу - мәктәптә игълан ителгән сыерчык оялары ясау конкурсының нәтиҗәләре. Мәктәптә ир-егет хезмәт укытучысы булмау сәбәпле, һәр укучы өйдә үзе яисә әти-бабаларына  ясатып оялар алып килде. Әлеге конкурста 1 нче сыйныф укучысы Адиятуллина Э. алып килгән сыерчык оясы җиңүче дип танылды.

9 март көнне, район командасы составында, игезәк бертуганнар- Рамил һәм Ранис Гаттаровлар Кама Тамагында Идел аръягы командалары арасында Республика беренчелегенә 2003 елгы һәм аннан да яшьрәк укучылар арасында, бадминтон буенча ярышның зона этабында катнашып кайттылар. Әлеге ярышта укучыларыбыз 2 урын алдылар һәм Республика этабында катнашу хокукына лаек булдылар. Май аенда аларны Казан шәһәре көтә.  Афәрин! Киләчәктә дә  зур уңышлар телибез!

Кичә, 12 март көнне мәктәбебез укучылары "Созвездие. Йолдызлык-2014" фестиваленең район туры гала-концертында чыгыш ясап кайттылар. Нәтиҗәләребез сөендерерлек. Конферанс номинациясендә Хөсәенова Л. - Шәмсетдинов И. һәм  Хөсәенова И. - Хәсәнов Б. парлары (җитәкчеләре Гильманова Э.Р.) беренче дәрәҗә диплом белән бүләкләнделәр. Вокал - соло номинациясендә Адиятуллина Э. - 1 урын (җитәкчесе Габидуллина Л.Ә.), Хузина Г. - 3 урын (җитәкчесе Хисамова Р.М.) га лаек булдылар. Вокаль ансабль номинациясендә "Салават күпере" ансамбле (җит. Габидуллина Л.Ә.), һәм "Шатлык" дуэты (җит. Хисамова Р.М.) - 1 нче урын яулап кайттылар.  Беренче дәрәҗә диплом һәм 1 нче урын яулаган укучыларыбыз 27, 28 нче март көннәрендә Буа шәһәрендә узучы зона турында катнашачаклар. Укучыларга һәм аларның җитәкчеләренә алда торган зур ярышлар алдыннан  уңышлар телибез! Афәрин!

Башлангыч сыйныф укытучысы Хәсәнова Ф.Г., бүген 1-4 нче сыйныф укучылары өчен математикадан "Фән көне" үткәрде. Әлеге чараның максаты- укучыларда хәтерне, игътибарлылыкны үстерү, математика фәненә кызыксыну уяту иде. Укучылар әлеге чарада натураль цифрлар турында кызыклы мәгълүматлар алдылар, логиканы үстерергә ярдәм итүче мәсьәләләр чиштеләр.

Бүген география укытучысы Хәсәнов И.Р., 7 нче сыйныфта география фәненнән "Төньяк Америка" темасыннан яңа стандартлар буенча ачык дәрес үткәрде. Әлеге дәрестә укучылар АКШ турында яңа мәгълүматлар алдылар. Дәреснең максаты укучыларда АКШның географик урыны, хайваннар һәм үсемлекләр дөньясы, климаты, рельефы, эчке сулары һәм политикасы турындагы белемнәрне формалаштыруга юнәлтелгән иде.

Бүген бездә, "Хорлар бәйгесе"нең 2 нче этабы- әниләр турында җырлар конкурсы узды. Әлеге чараны сыйныф җитәкчеләре белән берлектә музыка укытучысы Хисамова Р.М. оештырды. Конкурста 1-9 сыйныфның барлык укучылары да катнашты. Икенче этап нәтиҗәләре буенча 1 нче урында "Әниемә" җыры белән 4 нче сыйныфлар (сыйныф җитәкчесе Булатова Г.А.), 2 нче урында "Пар канатым" җыры белән - 5 нче сыйныф, 3 нче урында "Әнкәй җирдә иң зур кеше" җырын башкаручы 3 нче сыйныф укучылары. Конкурсның соңгы этабы- 20 нче апрельдә үтәчәк, темасы- "Туган як турындагы җырлар". 

Мәктәбебезнең татар теле һәм әдәбияты укытучысы Гайнетдинова Алсу Газиз кызын  "Яшь буынга белем һәм рухи-әхлакый тәрбия бирүдә Ризаэддин Фәхреддин мирасыннан файдалану" исеме астында чыккан китапта мәкаләсе басылуы белән кайнар котлыйбыз! Шушы уңайдан, ул,  Алабуга шәһәрендә үткән мәшһүр мәгърифәтче - галим, педагог Р.Фәхреддингә багышланган Татарстан Республикасы мәгариф хезмәткәрләренең XI нче Республика педагогик укуларында катнашып шәһадәтнәмәгә лаек булып кайтты.

18 нче февраль көнне мәктәбебезнең 4 нче сыйныф укучылары Гаттаров Ранис һәм Гаттаров Рамил, 5 нче сыйныф укучысы Шәмсетдинов Илназ Буа шәһәрендә математика фәненнән Республика олимпиадасының зона турында катнашып кайттылар. Укытучылары Булатова Г.А, Галиуллина А.С һәм укучыларга зур уңышлар телибез!

27 нче февраль көнне башлангыч сыйныф укытучысы Мөхетдинова А.Н. 1-4 нче сыйныф укучылары өчен "Тапкырларга-табышмак" дигән интеллектуаль уен оештырды. Әлеге чара укучыларга экологик тәрбия бирү, урманнарга, андагы чәчәкләргә, хайваннарга сакчыл караш тәрбияләү; халык авыз иҗаты аша укучыларның фикерләү сәләтен үстерү максатыннан үткәрелде. Әлеге чарада укучылар кызыклы табышмаклар чиштеләр, уеннар уйнадылар. Кичә ахырында "Табышмаклар патшасы"н билгеләделәр.