Бүген мәктәбебездә “Балаларда грипп һәм ОРВИ авыруларын кисәтү”  темасы астында гомуми ата-аналар җыелышы үткәрелде. Әлеге җыелышка Кайбыч үзәк хастаханәсеннән Кошман авыл җирлеге участогы педиатры Писарева Галина Петровна чакырулы иде. Үз чыгышында ул ОРЗ һәм грипп авырулары хакында сөйләде,  авыру башлануның билгеләрен аңлатып китте, аларга каршы нинди профилактик чаралар кулланырга мөмкин булуын искәртте. Укучыларга, укытучыларга һәм шул исәптән әти-әниләргә дә гриппка каршы вакцинация ясатуның кирәклеге турында җиткерде. Гомуми җыелышта шулай ук Кайбыч районындагы ГАИ бүлекчәсе начальнигы Тимуршин Фирдүс Рашидович та катнашты. Ул райондагы юл хәрәкәте торышы белән таныштырды, юл-транспорт фаҗигаләренә китерүче сәбәпләрне атады һәм әти-әниләргә үзенең киңәшләрен җиткерде. Мәктәп директоры Хәмидуллин И.И. "Яшүсмерләр оешкан төркемнәр белән җинаять кылу очракларын булдырмау” темасына чыгыш ясады, ата-аналарны балаларына карата мөмкин кадәр игътибарлы булырга чакырды.

Бүген Кайбычта асоциаль күренешләрне профилактикалау максатыннан уздырыла торган “Свежий ветер-2016” фестиваленең муниципаль туры булды. Әлеге фестивальнең максаты - балалар һәм  яшүсмерләр арасында сәламәт яшәү рәвешен пропагандалау, эчкечелек, тәмәке тарту һәм наркотик куллануга карата тискәре караш булдыру. Безнең мәктәптән бу фестивальдә 5-7 нче сыйныф укучыларыннан торган "ПОЗИТИВ” агитбригадасы катнашты һәм уңышлы чыгыш ясап, 8 команда арасыннан 3 нче урынга лаек булды. Афәрин, укучылар! Котлыйбыз!

12 сентябрь көнне илебездә олуг, изге бәйрәмебез - Корбан Гаете билгеләп үтеләчәк. Әлеге бәйрәмгә әзерлек эшләре бүгенге көндә дә алып барыла. Мәктәбебез укытучылары, укучы кызлар һәм мәктәп хезмәткәрләре Югары Кошман авылында урнашкан мәчеттә бүген өмә оештырдылар. Өмәдә катнашучы барчагызга да әлеге изге гамәлегез өчен Аллаһ Тәгалә әҗер-савабын бирсен!

Республикабызның һәр мәктәбендә "Куркынычсызлык айлыгы" (15 август-9 сентябрь) кысаларында төрле акция һәм чаралар уздырылып килә. Андый чаралар безнең мәктәптә тә үткәрелеп тора. Бүген ТИН укытучысы Гатауллин Д.Р. 8 нче сыйныф укучылары белән "Юлда йөргәндә куркынычсызлык кагыйдәләре" темасы астында дәрес үткәрде, тормышны һәм сәламәтлекне саклап калуда мөһим булган кагыйдәләр белән таныштырды. Шулай ук һәр сыйныфта укучылар белән әлеге мәсьәлә буенча әңгәмәләр, куркынычсызлык буенча инструктажлар уздырылды.

"Йодрык кадәрле, йомры гәүдәле, бигрәк тәмле бәрәңге!". Быелгы бәрәңге уңышы турында нәкъ шулай дип әйтергә мөмкин, чөнки мәктәбебез чыннан да бәрәңгедән уңды. Эре-эре бәрәңгеләрне чиләкләргә тутырасы гына килеп тора. 5-9 нчы сыйныф укучылары һәм сыйныф җитәкчеләре көче белән бәрәңге участогыннан мул уңыш җыеп алынды бүген.

5 сентябрьдән Республикабызда "Көзге мәрхәмәтлелек атналыгы" башланып китте. Әлеге эстафетадан безнең мәктәп тә читтә калмады. Бүген укучылар белән "Дуслык кадерен бел!", "Кем ул чын дус?", "Халыклар дуслыгы" темаларына әңгәмәләр оештырылды, дуслыкның кеше тормышында мөһим урын алып торуы турында сөйләнелде, кече һәм урта сыйныф укучылары арасында рәсем конкурсы оештырылды.

Бүген "Терроризм һәм экстремизмга каршы көрәш айлыгы" кысаларында укучылар белән "Без экстремизмга каршы!" темасы астында тәрбия дәресләре, әңгәмәләр үткәрелде. Дәрес вакытында "экстремизм", "терроризм", "террорист" төшенчәләре аңлатылды, террор актларының төрләре турында сөйләнелде, экстремистик хәрәкәтләрнең килеп чыгу сәбәпләре санап үтелде. Әлеге әңгәмәләрнең максаты - экстремизм очракларын булдырмау өчен тиешле чараларны күрергә өйрәтү, башкаларга карата ихтирамлы һәм игътибарлы булырга өндәү, толерантлык сыйфатларын тәрбияләү.

3 сентябрь -   терроризмга каршы көрәшкә теләктәшлек белдерү көне. Әлеге дата 2004 нче елның 1-3 сентябрь көннәрендә Беслан шәһәрендә булган  тетрәндергеч вакыйга белән бәйле рәвештә билгеләп үтелә. Бүген Кошман мәктәбендә иртәнге линейкада шушы хәтер көненә багышланган кичә булып үтте. Укучыларга терроризмга каршы илкүләм көрәшкә чыкканда гына нәтиҗәләр яхшы булачагы аңлатылды. Һәрвакыт саклану чараларын кулланырга, үзең өчен генә түгел, әти-әниең, туганнарың, классташларың өчен дә җаваплы булырга кирәк икәнлеге әйтеп үтелде. Кайчан да булса террористлар белән көрәш туктатылыр һәм аларның барысы да көчле җәзага тартылыр – бу Җир Шарындагы һәр кешенең хыялы. Беркайда да, беркайчан да Төньяк Осетиядәге хәлләр кабатланмасын иде.

Яңа уку елы  мәктәбебез тарихында иң күркәм вакыйгаларның берсе белән башланып китте: Кошман мәктәбендә бик күп еллар хезмәт куйган, мәктәпне җитәкләгән Шәрәфиев Мансур Гарәфетдин улы 85 яшьлек зур юбилеен билгеләп үтте. Тормыш иптәше - Сахара апа да быел март аенда 85 яшен тутырган иде. Алай гына да түгел, быел әлеге күркәм гаиләнең бергә тормыш корып яши башлаганнарына 60 ел булды! Мансур абый белән Сахара апа Кошман авылының гына түгел, Кайбыч районының да хөрмәтле, башкаларга үрнәк булырдай һәм искиткеч гүзәл кешеләре. Әлеге матур пар күңелләрдә бары тик соклану һәм ихтирам хисен генә уята. Хөрмәтле Мансур абый - Сахара апа, Сезне чын күңелебездән әлеге олуг бәйрәмнәрегез белән тәбрик итәбез! Киләчәктә дә Сезгә озын тигез гомер, ныклы сәламәтлек, күңел тынычлыгы, балаларыгыз-оныкларыгызның кадер-хөрмәтендә яшәвегезне теләп калабыз!

Ходай биргән олы бүләк бит ул —
Тигезлектә гомер итүләр,
Язмыш салган урау юллардан
Иңне-иңгә терәп үтүләр.
Кем сокланмас сезгә карап бүген,
Сөбханалла, күзләр тимәсен!
Ходай сезгә үзе ярдәм иткән
Сайлаганда тормыш иптәшен.
Тагын бик күп еллар тигезлектә
Матур парлар булып яшәгез.
Сәламәтлек ныклы юлдаш булсын,
Балкып торсын тормыш чәчкәгез.

Мәктәп еллары - кеше гомеренең кабатланмас матур бер мизгеле. Шуңа күрә баланың укырга килү көне - зур бәйрәм. Беренче сентябрь иртәсе кояшлы да, болытлы да, яңгырлы да була. Шулай да андый иртәләрнең hәрберсе күңелгә кояшлы булып иңә. Чөнки күңел сабырсызланып сыйныфка,  сыйныфташларга, парта артларына ашкына, тизрәк беренче дәрес башлансын дип тели. Һәм әлеге кичерешләр безнең хәтерләрдә мәңге саклана. Бүген безнең мәктәбебездәге "Белем бәйрәме" укытучыларны, укучыларны, әти-әниләрне һәм кунакларны кабат бергә җыйды. Әлеге күркәм бәйрәмдә хөрмәтле ветеран укытучыларыбыз да катнашты. Мәдинә Сәлимхановна беренче сыйныфка шаян-шук 6 укучыны кабул итте.  Яңа уку елы hәркемгә шатлык-сөенечләр,бары тик яхшы билгеләр, яңа уңышлар алып килсен!