30 нчы октябрьдә илебездә Сәяси репрессия корбаннарын искә алу көне билгеләп үтелә. Россия тарихында җан өшетерлек вакыйга булып уелып калган репрессия еллары әле бүген дә күпләрнең күңелендә саклана. Шул уңайдан кичә мәктәбебездә тарих укытучысы Вилданова Л.Х. әлеге тема буенча сыйныф сәгатьләре үткәрде, укучыларга репрессия вакытында авырлыклар күргән авылдашларыбыз турында мәгълүматлар җиткерде, Туган якны өйрәнү музеена экскурсия оештырды.

Әле кайчан гына яңа уку елын башлап җибәргән идек, инде менә бүген 1 нче чирекне дә тәмамладык. Укучыларның көтеп алган көзге каникуллары да җитте. Шул уңайдан мәктәбебездә 1 нче чирекне йомгаклау линейкасы булып узды. Линейка барышында укучыларның соңгы унышлары турында сөйләнелде, аларга грамоталар тапшырылды, көзге каникулда мәктәп эшчәнлегенең торышы таныштырылды. Шулай ук, шимбә көнне һәр сыйныф үзләренең кабинетларында генераль җыештыру оештырды. Сыйныф җитәкчеләре укучыларны көзге каникулга инструктаж белән таныштырды. Ялларыгыз күңелле һәм файдалы үтсен, укучылар!

29 октябрь көнне Кайбыч районының "Салават күпере" спорт һәм сәламәтләндерү комплексында 18 яшькәчә булган укучылар арасында милли көрәш буенча ярышлар үткәрелде. Әлеге ярышларда безнең мәктәп егетләре дә актив катнашты. Төрле үлчәү категорияләре буенча Саттаров А.(7 нче сыйныф) һәм Саттаров И.(3 нче сыйныф) - II нче урынга, ә Ахмадуллин Н.(2 нче сыйныф) III нче урынга лаек булдылар. Тренерлары - физик тәрбия укытучысы Гатауллин Д.Р. Гомуми нәтиҗәләр буенча Кошман мәктәбе командасына III урын бирелде. Афәрин, егетләр! Чын күңелдән котлыйбыз!

РФ Президенты В.В.Путинның "Бөтенроссия балаларның һәм яшүсмерләрнең дәүләт һәм җәмгыять организациясен булдыру турындагы" Указы нигезендә мәктәп укучыларын "РДШ"га ("Российское движение школльников")  кабул итү буенча илебез буенча 29 октябрь көнне төрле чаралар үткәрелә. Шушы уңайдан бүген Фёдоровск урта мәктәбендә бәйрәм линейкасы булып үтте. Әлеге мәктәп республика буенча 50 пилотлы режим мәктәпләре арасына кертелгән. Анда 30 баланы "РДШ"га кабул иттеләр. Линейкада Бикбова Ф.Ш., Зиннатуллин Р.С., Бикаева Л.Н., Шоркина А.А., Калимуллина Ф.Н., Зиннатуллина Л.М. да чыгыш ясады.

Бүген мәктәбебездә 4, 6, 8 нче сыйныф укучылары татар теле фәненнән республикакүләм диагностик тест эшләрен башкардылар.

Интернет челтәрендә куркынычсызлык буенча үткәрелүче Бердәм дәрес кысаларында балалар һәм яшүусмерләр арасында "Сетевичок 2016" дип исемләнгән III Халыкара квест оештырыла. Квестның төп максаты: Россия укучыларында Интернет челтәрен укуда һәм тормышта куркынычсыз һәм уңышлы куллану ысуллары формалаштыру. Квест онлайн режимда уздырыла, анда төрле җайланма аркылы, теләгән вакытта һәм урында керергә мөмкин. Әлеге квест кысаларында безнең мәктәпнең 8 -  9 нчы сыйныфларында бүген "Куркынычсыз интернет" дәресләре үтте.Укучылар онлайн-курслардагы укуларда, викториналарда, рәсем һәм эссе конкурсларында, тестлар һәм сораштыруларда катнаштылар.  Катнашкан өчен аларга баллар бирелде. Әлеге мәгълүмат Сезне дә кызыксындырган булса, СЕТЕВИЧОК.РФ сайтына кер, теркәл һәм катнаш!

Бүген мәктәбебездә 9 нчы сыйныф укучыларының әти-әниләре өчен җыелыш үткәрелде. Җыелышның төп максаты: ата-аналарны укучыларның тапшырачак имтиханнарына әзерлек эшләре һәм бүгенгесе көнгә кадәр алып барылган эш нәтиҗәләре белән таныштыру. Җыелышта мәктәп директоры, уку-укыту эшләре буенча директор урынбасары һәм фән укытучылары катнашты.

Бүген Кайбыч муниципаль районы  “Экология, сәнгать, мәгариф” мәктәптән тыш эшләр үзәге”ндә Бөек драматург, артист, режиссер Кәрим Тинчуринның тууына 129 ел  тулуга  һәм Татар театрның 110 еллыгы уңаеннан  Республика мәктәпләре арасында үткәрелүче конкурсның район этабы уздырылды. Әлеге бәйгедә безнең укучыларыбыз да актив катнашты. “Спектакльдән җыр”  номинациясендә 6 нчы сыйныф укучысы Хикматуллина К. чыгышы I нче урынга лаек дип табылды! Ул К.Тинчуринның "Сүнгән йолдызлар" әсәреннән Сәрвәр башкаруындагы "Каз канаты" җырын җырлады. Җитәкчесе - музыка укытучысы, Кадырова А.С. Чын күңелебездән аларны әлеге җиңүләре белән котлыйбыз һәм алдагы бәйгеләрдә уңышлар теләп калабыз!

Без бүген мәктәбебездә халкыбызның матур бәйрәмен "Сөмбелә бәйрәмен" үткәрдек. .  Елның сихри фасылында- көз аенда татар халкы элек-электән шушы бәйрәмне уздырган. Ул - көзге бәйрәм, уңыш бәйрәме. Сөмбелә тамашасында уеннар үткәрелгән. Бүген  дә  "Игенчеләр", "Шат йөзләр", "Могҗизалар" һәм "Листопад" командалары  Сөмбеләгә үз программалары белән килгәннәр иде. 6 - 9 нчы сыйныф укучылары җиләк-җимеш һәм яшелчәгә багышлап төшерелгән реклама роликларын күрсәттеләр, "Көзге букет" композициясен якладылар, "Парижда көзге мода" номинациясендә үзләренең кием  коллекциясен тәкъдим иттеләр. Шулай ук, һәр сыйныфтан Сөмбеләләр дә үзара ярышты: прическалар ясадылар, интеллектуаль сорауларда үз тапкырлыкларын күрсәттеләр, төрле милләт көйләренә биюләр башкардылар. Әлеге чара матур үтте. Нәтиҗәләр түбәндәгечә: I нче урынны 6 нчы сыйныф яулады, II нче урында - 7, 8 нче сыйныфлар,  III нче урында - 9 нчы сыйныф. Котлыйбыз!

Бүген мәктәптә 1-5 сыйныф укучыларының "Уңыш бәйрәме" үткәрелде. Бәйрәмне педагог-оештыручы Кадырова А.С. әзерләде. Һәр сыйныф укучылары да, класс җитәкчеләре белән берлектә бу матур бәйрәмгә бик яхшылап әзерләнгәннәр иде, әлеге чара бик күңелле үтте. Сыйныфлар төрле номинацияләр буенча көч сынаштылар: Сөмбеләләр чыгыш ясады, яшелчәләр турында сценкалар куелды, мода күрсәтелде. Шуларга өстәп, укучылар көзге композиция һәм тәм-томнар да әзерләп килгәннәр иде. Нәтиҗәләр буенча, 1 нче урынны 3 нче сыйныф яулады, 2 нче урында - 1, 2-4 сыйныф укучылары, 3 нче урында - 5 нче сыйныф. Котлыйбыз!