Көннәр көзгә авыша башлады, димәк тиздән мәктәпкә бару-кайту эңгер-меңгер вакытка туры килә башлаячак. Шунлыктан, караңгы вакытта җәяүлеләрнең киемнәрендә яктылык кайтаручы элементлар куллану мөһим темага әверелеп бара.  Россия Федерациясе Хөкүмәтенең 2014 елның 14 октябрендә кабул ителгән 1197 карары нигезендә 2015 елның 1 июленнән Юл йөрү кагый­дәләренә кертелгән үзгәрешләр үз көченә керде. Караңгы вакытта автомобиль юлы кырыеннан хәрәкәт итүче җәяүлеләргә хәзер яктылык кайтаручы элемент булган кием кию мәҗбүри. Болай булмаган очракта, административ штраф салу закон белән каралган. Яктылык кайтаручы элементлар караңгы юлда җәяүлене күрүне арттыра һәм алар катнашындагы юл-транспорт һәлакәтләре куркынычын шактый киметә. Әлеге кагыйдәләрне истә тотып, безнең мәктәп укучылары һәм укытучылары да үз киемнәрендә һәм сумка-портфельләрендә яктылык кайтаручы элементларны булдырдылар. Юлларда исән-имин йөрсәк иде!

Мәктәбебездә инде күптәннән "Көмеш каләм" исемле яшь журналистлар түгәрәге эшләп килә. Шундый ук исем астында ай саен татар телендә мәктәп гәҗите дә бастырыла. Әлеге түгәрәкне бүгенгесе көндә башлангыч сыйныфлар укытучысы Сайранова Р.Т. җитәкли. Түгәрәккә йөрүче 10 яшь каләмче айлык мәктәп яңалыкларын, үзләренең иҗат җимешләрен башка укучылар һәм укытучылар игътибарына да җиткерәләр, ә без исә аларны бик яратып укыйбыз.  "Көмеш каләм"гә алдагы көннәрдә дә шулай матур мәкаләләр, шигырь-хикәяләр белән безне сөендереп торуларын, иҗади уңышларга ирешүләрен теләп калабыз!

Бүген укучылар, укытучылар һәм мәктәп хезмәткәрләре көче белән яшелчәләр кишәрлегендә һәм чәчәклекләрдә зур хезмәт башкарылды: чөгендер, кәбестә, кабак уңышы җыеп алынды һәм урнаштырылды, кишәрлекләр һәм чәчәклек урыннары яхшылап җыештырылды, чистартылды. Шулай итеп, көзге бакча эшләренә быелга нокта куелды. Өмәдә катнашучыларның барсына да зур рәхмәтебезне белдерәбез!

Халыкара Укытучылар көне уңаеннан мәктәбебездә "Минем яраткан укытучым" темасына рәсем конкурсы оештырылган иде. Һәр сыйныфтан да укучылар бик актив катнаштылар, яраткан һәм хөрмәт иткән укытучыларына багышлап рәсемнәр, плакатлар, котлаулар ясадылар. Алар арасыннан иң-иңнәрен сайлап алынды, җиңүчеләр грамоталар белән бүләкләнде. Беренче урынны яулаган рәсемнәр район конкурсына тәкъдим ителде.

Кичә, 8 октябрь көнне Татарстан Җөмһүрияте диния нәзарәтенең яшьләр бүлеге актив мөселман яшләре һәм  өченче Республика күләм ифтарында ярдәм күрсәткән волонтерлар өчен Яшел Үзән шәһәрендә урнашкан "Маяк" спорт комплексы бинасында очрашу үткәрде. Кайбыч районыннан әлеге очрашуга Гайнуллин Алмаз, Сайранов Рушан, Гиниятуллин Илхам, Сафиуллин Илнас, Минвалиева Мәриям (Кошман мәктәбе укучысы), Хамидуллина Айсылу бардылар. Очрашу барышында волонтерлар өчен төрле уеннар, вәгазъләр һәм Татарстан җөмһүрияте мөфтие Камил хәзрәт Сәмигуллин белән аралашу да оештырылган иде. "Ханлык серләре" дип аталган квест ахырында 200 кешедән торган команда белән флеш-моб оештырылып, алар тарафыннан "Аллаһ" сүзе язылды. Әлеге чара очрашуга килгән барлык волонтерларга да күңелләренә бик хуш килгәндер һәм  киләчәктә тагын да файдалы һәм изге эшләр башкарырга ниятләрен уяткандыр дип өметләнеп калабыз.

Бүген, 8 октябрь көнне Кайбыч муниципаль районында 2003 нче елгы һәм аннан яшьрәк булган мәктәп укучылары арасында волейбол уены һәм йөзү буенча спорт ярышлары үткәрелде. Әлеге ярышларда безнең мәктәптән 3, 5-6 нчы сыйныфта укучы кызлар һәм малайлар да актив катнашты.

Бүген Кошман мәктәбендә "Авыл туризмы" программасы буенча оештырылган семинарның бер өлеше булып узды. Семинарда район китапханәчеләре катнашты. Аларга укучылар тарафыннан 83 еллык тарихы булган мәктәп тормышы таныштырылды, туган якны өйрәнү музеена экскурсия оештырылды, Кошман авылында туып-үскән  шагыйрь, прозаик һәм драматург Әбрар Сәгыйди турында мәгълүмат сөйләнелде. 2005 нче елдан бирле мәктәп аның исемен йөртә.  Килгән кунакларыбызга мәктәбебез бик ошады.

Бүген ЦВР "ЭКО"да мәктәпләрнең ТЭБДУлары һәм балалар бакчалары тәрбиячеләре өчен "Агрокласс"  проекты буенча семинар-тренинг үткәрелде. Проект үз эшен 2013 нче елда Авыл хуҗалыгы Министрлыгы белән берлектә эшли башлый. Әлеге проектның максаты: Татарстан Республикасында балалар һәм яшүусмерләр арасында авыл хуҗалыгы өлкәсендәге һөнәрләрнең дәрәҗәсен күтәрү, популярлаштыру һәм аларга карата хөрмәт хисен тәрбияләү. Проект эшчәнлеге психолог Лучкина Е.Ю. җитәкчелегендә төзелгән методик уеннар һәм тренингларга нигезләнеп, мәктәпкәчә яшьтәге балалардан башлап, өлкән сыйныф укучыларына кадәр этапларга бүленеп алып барыла. Бүген укуда катнашкан барлык педагогларга да һәр этап буенча аңлату эшләре алып барылды, тренинглар оештырылды. Соңыннан мәктәпләргә һәм балалар бакчаларына проект буенча чыгарылган дәфтәр-китапчыклар, флешкалар таратылды.

5 нче октябрь көнне илебездә укытучылар үзләренең профессиональ бәйрәмнәрен - Укытучылар көнен билгеләп үтәләр. Чын күңелебездән Кошман укытучылар коллективын әлеге матур бәйрәм белән тәбрик итәбез! Эшегездә һәм тормышыгызда зурдан-зур уңышлар, ныклы сәламәтлек, сабырлык, күңел тынычлыгы, гаилә бәхете теләп калабыз! Укытучы – дөньяны танып – белергә омтылучы, балаларның керсез пакь күңелләренә гыйлем орлыклары чәчүче һәм аларның тигез матур шытымнар бирүен сабыр гына көтүче Остаз, газизләрдән – газиз әниләр белән берүк дәрәҗәгә куярлык изге зат. Шулай ук балаларның нечкә саф күңеленә саклык белән генә кагылучы, аларга хаклык энҗеләрен тезүче оста киңәшче психолог та, уку барышында юл күрсәтүче маяк та, алай гына түгел, укытучы ул – ил- көндә барган һәр яңарыш, һәр борылыш, һәр үзгәрешне үз аңы аша үткәреп, алгарыш мәйданында җинү яулашкан каһарман шәхес тә!

Укытучы!

Синдәдер ул йөрәкләрнең иң олысы,

Синдәдер ул йөрәкләрнең иң җылысы,

Һәркөн сиңа ничә сабый карап тора,

Алар сине әниседәй якын күрә.

Еласалар, син аларны юатасың,

Боексалар, син аларны уйнатасың,

Сөйләшәсең күңелләрен аңлап кына,

Орышасың кайчагында җайлап кына.

Үз улыңдай, үз кызыңдай якын күреп,

Укытасың ничә буын балаларын.

Киткән чакта мәктәп белән саубуллашып.

Елый-елый озатасың син аларны.

Укытучы!

Кирәк чакта җитез дә син, тапкыр да син,

Кирәк чакта сабыр да син, батыр да син,

Бик җаваплы, авыр синең хезмәтең дә,

Тиешенчә күрсәң иде хөрмәтен дә.

5 нче октябрь - Халыкара укытучылар көне уңаеннан мәктәбебездә төрле чаралар булып үтте. Бәйрәм иртәсе "Укытучыңны котла" акциясе белән башланып китте: укучылар яраткан укытучыларын чәчәк бәйләмнәре һәм котлау открыткалары белән каршы алдылар. 9 нчы сыйныф укучылары бүген үзләрен укытучылар урынына куеп карады һәм төрле фәннәр буенча дәресләр уздырдылар, башлангыч сыйныфларда сыйныф җитәкчесе, ә балалар бакчасында тәрбияче ролен башкардылар. Көндез мәктәптә бәйрәм уңаеннан "Укытучым атлый янәшә!" исемле кичә үткәрелде, әлеге чарага хәрмәтле ветеран укытучыларыбыз да чакырылган иде. Шулай ук, атна дәвамында "Минем яраткан укытучым" темасына рәсем конкурсы да оештырылды. Бүгенге бәйрәм көне бик күңелле һәм матур үтте. Хөрмәтле укытучыларыбызны тагын бер кат профессиональ бәйрәмнәре белән тәбрик итәбез!