Сентябрьнең беренче көненнән үк көз чын-чынлап үз мәнфәгатьләрен күрсәтә башлады: яңгырлар туфракны дымга баета. Шулай да, соңгы көннәрдә җылы кояш та яңгыр болытлары арасыннан күренә башлады. Бүген мәктәп яны территориясендә көзге өмә эшләре башланып китте. Укучылар чәчәклекләрдә чистарту эшләрен башкардылар, тирә-якны чүпләрдән арындырдылар. Әлеге Бөтенроссия экологик өмә авыл җирлекләрендә дә үтте.

Бүген Республикабызның һәр мәктәбендә укучы башлангыч сыйныф укучылары кулларына "Укучының мәдәни көндәлеге" исемле гаять кызыклы һәм эчтәлекле китапчыклар алды. Укучыларны Татарстанның гасырлар дәвамында оешкан күпмилләтле мәдәнияте белән таныштыру максатыннан алып барылучы әлеге чара 2014 нче елдан бирле эшләп килә. "Укучының мәдәни көндәлеге" ярдәмендә балалар сәнгатьнең төрле өлкәләрендә ясаган ачышлары, ирешкән уңышлары, концерт-театрдан алган тәэсирләре, музейга барулары һәм мәдәни чараларда катнашулары турында башкаларга да җиткерә алачак. Безнең мәктәптә бүген 24 укучыга әлеге көндәлекләр өләшенде. Бу чарада Кошман авылы китапханәчесе Сафиуллина Гөлия дә катнашты. Ул укучыларны көндәлекнең эчтәлеге белән таныштырды, үткәрелүче бәйгеләрдә актив катнашырга чакырды.

Җир - анда яшәүче барлык тереклекнең уртак йорты, яшәү чыганагы. Шуңа күрә әйләнә-тирәбезне саклап, чистартып тору, яшелләндерү, килеп туган төрле экологик мәсьәләләрне чишү юлларын табу - безнең бурычыбыз. Бүген мәктәптә Мәрхәмәтлелек атналыгы кысаларында "Бергәләп эшлик!" девизы астында сыйныфларда әңгәмәләр үткәрелде, биология укытучысы Сабирова Г.Х. 7 нче сыйныфта "Җир - безнең уртак йорт" исемле дәрес күрсәтте. Әлеге чараларның  максаты: укучыларда табигатькә һәм  анда яшәүче барлык тереклек ияләренә карата аңлы, сакчыл караш формалаштыру, экологик культура тәрбияләү.

Балалар һәм яшүсмерләр арасында эчкечелек, наркомания, урлашу, җинаять кылу кебек күренешләр арта барган хәзерге заманда укучылар арасында начар гадәтләргә каршы пропаганда эше алып бару бикрәк тә актуаль күренеш. Бүген мәктәптә "Без наркотикларга каршы!" исемле чара үткәрелде. Әлеге чараның максаты - начар гадәтләргә карата тискәре мөнәсәбәт формалаштыру, наркомания авыруының асылын ачыклау, укучыларны әлеге куркыныч чирдән кисәтү һәм аларда сәламәт яшәү рәвеше формалаштыру. Чараны үткәрүдә тәрбия эшләре буенча директор урынбасары, педагог-оештыручы, "ИСКРА" отряды членнары һәм "ПОЗИТИВ" агитбригадасы катнашты.

Мәктәп укучыларыбыз укуда да, хезмәттә дә, төрле чараларда да үзләрен сынатмый, тормышның һәр өлкәсендә дә тырышлык күрсәтә. Мәктәптә белем алудан тыш, аларга башка күп төрле вазыйфалар да йөкләнгән. Шуларның берсе - тимурчылык эше. Әлеге вазыйфаны алар бик теләп һәм чын күңелдән башкара. Бүген 7 һәм 8 нче сыйныф укучылары ялгыз яшәүче Фәймә һәм Факия апаларга барып, хуҗалык буенча булышлык иттеләр. Олыларның җылы сүздән генә дә күңелләре була, ә ярдәм кабул итү - алар өчен икеләтә шатлык. Һәрчак өлкәннәргә игътибарлы булып, ярдәм кулы сузып яшәсәк идек!

Авылыбызда яшәүче ярдәмгә мохтаҗ булган өлкән яшьтәге әби-бабайларыбызга безнең мәктәп укучылары һәрдаим ярдәм итеп тора, барып хәлләрен белешә, хуҗалык буенча төрле эшләрен башкара. Бүген 9 нчы сыйныф укучылары Югары Кошманда яшәүче Миннихан апага барып, бакча эшләрендә булышлык итеп кайттылар. Кылган изгелекләрегез үзегезгз меңе белән әйләнеп кайтсын, укучылар!

"Көзге мәрхәмәтлелек атналыгы" кысаларында районыбызның күп кенә укучылары музейларга экскурсиягә барды. Безнең мәктәп укучылары да әлеге чарадан читтә калмады. Кошман мәктәбендә "Туган якны өйрәнү" исеме астында эшләүче музей бар. Бүген музей җитәкчесе Вилданова Л.Х. беренче һәм дүртенче сыйныф укучыларына бу музейга экскурсия оештырды, авылның тарихына, танылган кешеләренә бәйле булган мәгълүматлар сөйләде, Кошман авылында чыккан кирпеч, сугыш чорына караган төрле экспонатлар белән таныштырды. Балалар әлеге чарадан бик канәгать калдылар.

12 нче сентябрь - мөселманнарның  иң зур һәм мөбарәк бәйрәмнәренең берсе - Корбан Гаете.  Корбан Гаете, Ислам динендәге башка бәйрәмнәр кебек үк, яхшы эшләр кылуны, рухи чисталыкка ирешүне, гөнаһларыбызны ярлыкауны чагылдыра.  Изге Корбан бәйрәме көнендә кылган догаларыбыз кабул булсын, изге ниятләребез һәм якты хыялларыбыз тормышка ашсын. Йортларыбызга бәрәкәт, күңелләребезгә – иман нуры, гаиләләребезгә иминлек, тынычлык һәм мәхәббәт хисләре иңсен. Корбан бәйрәме мөбарәк булсын!

Дини бәйрәмнәрнең иң олысы,
Мәртәбәле, нурлы, затлысы
Күңел түрләренә үтеп керер,
Дәва булып аның яктысы.

Ходай тарафыннан иңдерелгән,
Фарыз гамәлләрне үтәүдән
Тора безнең җирдә яшәвебез,
Өмет баглап һәрбер иртәдән.

Тоткан уразалар кабул булып,
Барып җитсен кылган догалар
Пакълансыннар керле җаннарыбыз,
Кичерелсен булган гөнаһлар.

Матур үтсен Корбан бәйрәмебез,
Яңартылсын йола-гадәтләр
Ташып торсын өстәл өсләрендә,
Мулдан булып хәләл нигъмәтләр!

Дамир Ахметзянов

Укучыларның мәктәп тормышы дәресләр белән генә чикләнеп калмый, алар дәрестән тыш чараларда, ярыш-бәйгеләрдә дә актив катнаша. Бүген мәктәбебезнең 5-9 сыйныфта укучы 7 егете Кайбыч муниципаль районы Беренчелегенә үткәрелгән мини - футбол ярышында катнашып кайттылар. Шулай ук 6-8 сыйныфтан дүрт укучыбыз Казан шәхәрендә судомоделирование буенча уздырылган бәйгедә катнаштылар. Алдагы бәйгеләрдә укучыларга уңышлар телибез!

Татарстанда көзге мәрхәмәтлелек атналыгы бара. Шул уңайдан бүген 5 нче сыйныф укучылары, сыйныф җитәкчеләре - Вилданова Л.Х. белән,  үзебезнең авылда яшәүче мөмкинлеге чикләнгән бала - Насретдинова Лилия янына барып күчтәнәчләр бирделәр, аралаштылар, бергәләп уеннар  уйнадылар.