9 нчы класс укучысы Садриева А. "Йолдызлык-2016" дип аталган 17 нче Бөтенроссия олимпиадасының "Флора һәм фауна" номинациясендә катнашып республика этабында 2 нче урынны алды. (Укытучысы - Сафина Н.Г.) Аларны җиңүләре белән котлыйбыз!

Бүгеннән мәктәпләрдә 2 нче чирек башланды. Кышкы чорда юлда йөргәндә укучыларга аеруча сак булырга кирәк. Бүген алар белән юл-транспорт һәлакәтләре статистикасы, юлларда йөргәндә сак булу турында кабат сөйләшүләр уздырылды.

Бүген 8-9 нчы класс укучылары Казан шәһәренә бардылар. Алар музейларда, шәһәрнең истәлекле урыннарында булдылар. Сәяхәт  укучыларга бик ошады. 

Каникул көннәрендә 9 нчы класс укучылары өчен имтиханнарга әзерлек эше алып барыла.

Мәктәпләрдә көзге каникуллар башланды. Укучыларның куркынычсызлыгын тәэмин итү максатыннан аларга һәм әти-әниләренә куркынычсызлык кагыйдәләре искәртелде, имзалар куйдыртылды. Шулай ук классларда интернеттан файдаланганда сак булырга кирәклеге турында әңгәмәләр уздырылды.

7-9 нчы класс укучылары белән уздырылган "Көзге бал" бәйрәмендә укучылар өчен күңелле уеннар үткәрелде. Алар үзләренең җырга-биюгә осталыкларын, нәфис сүз буенча сәләтләрен күрсәттеләр.

26 октябрь көнне Арчаның 1 нче номерлы мәктәбендә “Интернет-учителям” исеме астында укытучыларга интернет челтәрендә эшләргә ярдәм итү нияте белән “Мәгариф” журналы хезмәткәрләре тарафыннан мастер-класс үткәрелде. Әлеге чарада мәктәпнең информатика һәм инглиз теле укытучысы Шаһниева Р.Р. катнашты. Мастер классны танылган журналист һәм алып баручы Д. Сәфәров алып барды. Чара түбәндәге программа буенча үтте: 1. Интернетта мәгълүмат табу. 2. Эшне җиңеләйтү чаралары. 3. Фото белән эшләү. 4. Укытучының шәхси сайтын ачу. 5. Сайтны кызыклы итеп алып бару серләре. 6. Социаль челтәрләр. 7. Электрон акчалар. 8. Мобиль интернет.

Мастер- класста бик күп файдалы, кирәкле информация сөйләнде. Чара ахырында барлык катнашучыларга да сертификатлар һәм истәлекле бүләкләр тапшырылды.