Гаилә тормышы – һәрберебез өчен очсыз-кырыйсыз хезмәт һәм сикәлтәле гомер юлы. Гаиләләр тату һәм нык булса, жәмгыятебез дә нык булыр. Бүген бездә әнә шундый пар канатлы, бер-берсеннән башка яши алмаучы, бер-берсен кайгыртып, яратып, шатлыкларын да, кайгыларын да бергә уртаклашып яшәүче иң матур гаиләләр – 6-7 класс укучыларының әти-әниләре кунакка килде (кл.җит. Юнысова Р.К., Солтанова И.А.). Бәйрәм “Әткәй-әнкәй-пар канатым” исеме астында музыкаль сәлам белән башланып китте. Укучылар әти-әниләрен бәйрәм белән котлап шигырьләр, җырлар башкарды, үз куллары белән эшләнгән бүләкләрен тапшырды. Икенче өлеш спорт бәйрәме – “Әти, әни, мин-спорт сөюче гаилә” – спортзалда төрле уеннар белән дәвам итте. Әти-әниләр белән балалар ике командага бүленеп, төрле кызыклы ярышларда катнаштылар. Бәйрәм бик күңелле узды, һәркем шатлык-сөенеч тулы күңел белән өйләргә таралды. 

Укучыларга һөнәри юнәлеш буенча ярдәм итү максатыннан, бүген "Г.Тукай исемендәге Әтнә авыл хуҗалыгы техникумы" ннан Фәридә Фәритовна һәм Марат Рәфкатович укучыларны техникумда алырга мөмкин булган белгечлекләр, уку, яшәү шартлары белән таныштырдылар.

Хөрмәтле хезмәттәшебез Нурсәнә Турисовна! Сезне чын күңелебездән 55 яшьлек юбилеегыз белән котлыйбыз.Сезнең сабырлыгыгыз, тырышлыгыгыз өчен чын күңелдән олы рәхмәтебезне белдерәбез. Сез балаларны укытып кына калмыйча, укытучыларның яшь буынын да тәрбиялисез, аларга үрнәк булып торасыз. 

Математика атналыгы уңаеннан 5-9 класс укучылары арасында “Иң пөхтә математика дәфтәре” конкурсы узды. Конкурсның төп максаты - укучыларның дәфтәрләрен чиста, пөхтә йөртүләре иде. Нәтиҗәләр түбәндәгечә: Кызлар арасында: 1 нче урын -Хөснетдинова Инзилә (7 класс), 2 нче урын- Мингазова Илүзә (8 класс), 3 нче урын -Гайнуллина Зилә (6 класс), Мингазова Зиля (9 класс), Егетләр арасында: 1 урын - Шакиров Әнис (9 класс), 2 урын -Бакиров Альмир (5 класс) 3 урын- Хәмзин Ришат (7 класс).

Бүгеннән мәктәптә математика атналыгы башланды. Укучылар өчен кызыклы биремнәр,мәсьәләләр, шигъри табышмаклар, кызыклы фактлар тәкъдим ителде.

24 февраль көнне 2-4 нче классларда Россиякүләм тыюлыклар дәресе үтте. Укучыларга Татарстандагы, районыбыздагы тыюлыклар, милли парклар турында мәгълүматлар җиткерелде. Әлеге дәрес укучыларда табигатькә сакчыл караш тәрбияләүдә зур әһәмияткә ия.

Хөрмәтле бабайлар, әтиләр, абыйлар, егетләр һәм аларга алмашка үсүче малайларыбыз! Сезнең барыгызны да Ватанны саклаучылар көне белән чын күңелебездән котлыйбыз. Алдагы тормышыгызда зур уңышлар, корычтай нык сәламәтлек, озын гомер телибез. Барыгызның да көчле, батыр, кыю, Ватанның ышанычлы саклаучылары булуыгызны телибез. Һәммәгезгә дә бәрәкәтле тыныч тормыш насыйп итсен. Муллык, уңышлар гомерлек юлдашыгыз булсын. Бәйрәм белән!!!

Тормыш авырлыгыннан курыкмыйча,

Ныклы адым белән атлагыз.

Киң күкрәгегезне калкан итеп.

Җил-давылдан безне саклагыз.