Борын – борыннан ук безнең әби - бабаларыбыз бик эшчән, уңган булганнар. Нинди генә эшләр башкармыйлар алар. Кирәк чакта игенче дә, балта остасы да, ә әбиләребез оста тегүче, чигүче дә булган. Бүген мәктәбебезгә авылыбызда яшәүче кул эше осталарының берсен-Шакирова Әлфия Марсель кызын чакырдык.Ул кызларыбыз белән “Оста барда кулың тый...” темасы астында мастер-класс үткәрде.

25 нче гыйнвар көнне башлангыч сыйныф укучылары мәктәп музеена сәяхәт кылдылар. Технология укытучысы Солтанова И.А. укучыларны борынгы кул эшләре: күкрәкчәләр,чиккән сөлге үрнәкләре, калфаклар, чигүле читек, чүәкләр белән таныштырды. Укучылар борынгы кул эшләрен зур кызыксыну белән карадылар.

21 гыйнвар көнне Иске Кырлай авылында “Хәрәкәттә бәрәкәт” девизы астында Фәнил Гарәфиев истәлегенә чаңгы ярышлары узды. Мәктәбебез командасы әлеге ярышта 2 нче урынны яулады. Команда составында катнашкан Минһаҗева И., Зәйнетдинова Э., Яруллин Д., Закирҗанов И. һәм аларны ярышларга әзерләгән Минһаҗев Марсель Вәдүт улын җиңүләре белән котлыйбыз. Бүгенге линейкада җиңү яулаган укучыларны мәктәп директоры Хәбибуллин Ф.М.та котлады.

 Бүген мәктәбебездә башлангыч сыйныфлар арасында “Математик базар” дип аталган конкурс үткәрелде. Гыйбадуллина Н.Т. оештырган бу конкурста “Математиклар” һәм “Тапкырлар” командасы көч сынашты. Укучылар математикага кагылышлы күп сынау үттеләр: исәпләү, чагыштыру, математик табышмакларның җавабын табу, математик мәкальләрне белү, математик ребуслар чишү, әкиятне тану һ.б. Конкурс булгач, җиңүче дә булды. Бу – “Математиклар”. Укучылар ярыштан бүләкләр алып, зур канәгатьлек белән таралыштылар.

Бүген мәктәптә "Класс җитәкчесе-2017" конкурсының зона этабы үтте. Сеҗе, Сикертән, Курса Почмак, Утар-Аты, Өчиле, Арчаның 3 нче номерлы мәктәпләренең класс җитәкчеләре класстан тыш чара, осталык дәресләре бирү буенча көч сынаштылар. Барлык катнашучыларның да чыгышларын жюри уңай яктан бәяләде.

19 нчы  гыйнвар көнне “Башлангычлар атналыгы” ның дүртенче көне уздырылды. Башлангыч сыйныф укучылары белән Фәнзилә Камиловна җитәкчелегендә “Тамчы шоу” уены  уздырылды. 1 нче турда командалар белән танышу булды. “Зирәкләр” һәм “Тапкырлар” командасы көч сынашты. Укучылар сорау-табышмакларга җавап бирделәр. Презентациядән  әдипләрне таныдылар. Габдулла Тукайның тормыш юлын, иҗатын искә төшерделәр. 34:32 исәбе белән “Зирәкләр” командасы җиңеп чыкты. Ярышта катнашкан укучыларга бүләкләр тапшырылды. Укучылар “Тамчы шоу” бәйгесеннән күтәренке күңел белән таралыштылар.

18 нче январь көнне республикакүләм "Класс җитәкчесе-2017" конкурсының зоналардагы этабы башланып китте. Бүген аның чираттагысы Утар - Аты мәктәбе базасында үтте. Биредә Наласа, Кушлавыч, Түбән Аты, Кәче, 5 нче номерлы гимназия, Урта Курса мәктәпләрендә эшләүче класс җитәкчеләре катнашты. Жюрига  класстан тыш чара һәм осталык дәресен мәктәбебезнең 9 нчы класс җитәкчесе Шәфигуллин Н.Ф. тәкъдим итте.