Шимбә көнне "Ил терәге -ир-егет, гаилә терәге-әти" дип аталган конференция укучыларның әтиләрен мәктәпкә җыйды. Конференциядә  ата һәм балалар арасында очрарга мөмкин катлаулы  гаилә ситуацияләре чишелде. Укучыларның котлау концерты, мәктәп директорының бәйрәм котлавы әтиләрнең кәефен күтәрү генә түгел, ә ул һәм кызлары белән горурлану хисләре кичерергә дә ярдәм иткәндер. Очрашуда катнашкан барлык әтиләргә чын күңелдән мәктәп җитәкчелеге исеменнән рәхмәт белдерәбез. Мәктәп белән хезмәттәшлегебез файдалы һәм нәтиҗәле булсын иде

Мәктәбебез директоры 22.02 көнне әтиләрне Ватанны саклаучылар көне белән тәбрикләде. Мәктәбебез тормышы белән даими кызыксынып, һәрдаим мәктәпкә булышып торулары  өчен әтиләребез  Ганиев Р., Уразгилдиев И., Муртазин Ә., Билданов Л. мәктәп җитәкчелегенең рәхмәт хатлары белән бүләкләнде

21.02 КӨННЕ ТИМУРЧЫ ЕГЕТЛӘРЕБЕЗ   СУГЫШТА ҺӘЛАК БУЛГАН АВЫЛДАШЛАРЫБЫЗ ИСТӘЛЕГЕНӘ КУЕЛГАН ҺӘЙКӘЛ ТИРӘСЕН КАРДАН АРЫНДЫРДЫЛАР. ҺӘЙКӘЛГӘ ИЛТҮЧЕ СУКМАКЛАР КИҢ ИТЕП АЧЫЛДЫ. БАТЫРЛАР ДАНЫ МӘҢГЕЛЕК!

Ганиева Иркәнур Исламнур кызы җитәкчелегендә мәктәбебезнең бер төркем укучылары Бөек Ватан сугышы ветераны Ганиев Әхмәт бабай белән очрашты. Очрашуны оештытырга ярдәм иткән өчен мәктәп җитәкчелеге Әхмәт бабайның тормыш иптәше Бәһрәмия апага һәм балаларына бик рәхмәтле

Ватанны саклаучылар көненә багышлап, физик тәрбия укытучысы Кабиров Ә.З. 8-9  нчы сыйныф егетләреннән торган 2 команда арасында "Ягез әле, егетләр" конкурсы уздырды. Ярышта егетләрнең физик әзерлеге белән беррәттән интеллектуаль үсешләре, төймә тага белү күнекмәләре, техник модельләштерү осталыклары да тикшерелде. Ярышта 8 нче сыйныф укучылары 2 балл өстенлек белән каршы як командасын җиңде.

18-22.02. мәктәбебезнең  "Туган якны өйрәнү" түгәрәгенә йөрүче укучылар Сибгатова Алия һәм Әхмәтова Ләйлә башлангыч сыйныф укучыларын мәктәп музеендагы Бөек Ватан сугышына багышланган күргәзмәләр белән таныштырды, экскурсияләр музей җитәкчесе Рахимова Т.А. тарафыннан оештырылды

18.02 көнне мәктәбебезнең 6-8 сыйныф укучыларыннан тупланган "Катюша" командасы Патриотик тәрбия айлыгы кысаларында җыр һәм сафта йөрү буенча куст смотрында катнашты.

15.02.14 көнне мәктәбебезнең 6 нчы сыйныф укучылары Ганиев Фәдис һәм Колмөхәммәтов Зөлфәт Казан шәһәренең 40нчы номерлы гимназиясендә Республикабызның Мәгариф министрлыгы тарафыннан уздырылган  “Татарстан Республикасы халыкларының тарихи һәм мәдәни-әхлакый хәзинәләре” дигән Һади Атласи исемендәге укучылар фәнни-тикшеренү конференциясендә катнаштылар.

Ганиев Фәдис  конференциядә үзенең хезмәте белән 3 нче урынга лаек булды, ә Зөлфәт катнашучы сертификаты белән бүләкләнде.

Мәктәбебез данын Республика киңлекләренә алып чыккан укучыларыбызны чын күңелдән котлыйбыз, алдагы эзләнү эшләренә иҗади уңышлар юлдаш булуын телибез. Афәрин!

Мәктәптә рус теле һәм әдәбияты атналыгы кысаларында 13.02 көнне шигырь конкурсы узды. Башкарылган әсәрләр М.Җәлилнең “Моабит дәфтәрләре” ннән һәм замандаш шагыйрьләрнең Әфганстандагы сугышка, анда һәлак булган ватандашларыбызга багышланган  әсәрләр циклыннан алынган иде. Сөйләүчеләр үзләре сайлаган әсәрне рус яки татар телендә башкардылар.  Иң яхшы башкаручы итеп (рус телендә) 6 нчы сыйныф укучысы Исмоилова Айгөл билгеләнде, татар телендәге әсәрне 7 нче сыйныфтан Әхмәтова Адиләгә тиңнәр булмады.Адиләне һәм  Айгөлне бу уңышлары  белән тәбриклибез, катнашучы һәркемгә, аларны әзерләгән укытучыларга  рәхмәт белдерәбез.

12 нче февральдә мәктәбебездә Хәрби-патриотик айлык кысаларында 1-9 нчы сыйныфлар арасында   Хәрби-патриотик  җыр конкурсы булды.

Конкурста 8, 9 сыйныф укучылары- “Мин яратам сине, Татарстан”, “Сәяхәтче җыры”;

5 нчеләр -“Три танкиста”, 6 нчылар –“Смуглянка”, 7 нчеләр  “У солдата выходной” җырлары белән чыгыш ясады. Башлангыч сыйныфлар исә “Солдатта булган, диләр”, “Әти дә солдат булган”  җырларын тамашачыларга тәкъдим иттеләр.

Җырларны башкару осталыгы буенча 5, 6 нчы сыйныфлар; ә сәхнәләштерелгән җыр номинациясендә 7 нче сыйныфларга тиңнәр булмады. Башлангыч сыйныфлардан 2 нче сыйныф укучылары иң оста башкаручы булды. Катнашучыларны уңышлары белән тәбриклибез!