4 нче августтан Нурлат шәһәре 1 нче № лы мәктәбендә укучы формалары сату ярминкәсе эшли башлый. Балаларның формаларын яңартырга теләгән әти-әниләр иртәнге 9 дан кичке 6 га кадәр Сезне 1 нче мәктәптә көтәбез, рәхим итегез!

Бүген мәктәбебездә, яңа 2014/15 нче уку елына әзерлек максатыннан, агымдагы ремонт эшләре тәмамланды. Мәктәп коллективы көче һәм ата-аналар ярдәме белән мәктәптә сыйныф бүлмәләренең һәм коридорларның идәннәре, стеналары, тәрәзә рамнары, парта һәм урындыклар буялды. Спорт залында һәм егетләр остаханәсендә дә буяучылар матур төсле яңалыклар кертергә онытмады. Мәктәбебез, бизәнгән кәләш кебек, 29- 30 .07 дә мәктәпне яңа уку елына кабул итү комиссиясенең уңай  фикерен һәм яңа уку елының башлануын түземсезләнеп көтә! Нурлы мәктәбебездә балаларның шат авазлары яңгырарга да бер генә ай вакыт калган, ләбаса. Каникулларның калган көннәрен бәла-казасыз үткәрергә язсын иде.

Ганиев Фәдиснең чираттагы иҗат җимеше "Гармун алдым кулыма" дип атала. "Кк" гәҗитенең "Укучылар иҗаты" сәхифәсе  26 нчы июльдә  29 нчы № белән басылган. Барлык укытучылар һәм мәктәп дусларың исеменнән, Фәдис, сине иҗади уңышларың белән тәбриклибез. Иҗат чишмәң саекмасын!

Бүген укучыларыбыз  Сибгатова Алия, Исмоилова Айгөл, Колмөхәммәтов Зөлфәт Биләр шәһәрчегендә Халыкара III Сәләт форумында катнашты.  Республикабыз мәктәпләреннән җыелган укучы яшьләр белән очрашуга Республикабыз президентыз Рөстәм Нургали улы Миңнеханов  килүе эшлекле сәфәрне тагын да күңеллерәк иткән. "Сәләт" аланчыкларында башка район мәктәп укучылары белән спорт ярышларында һәм интеллектуаль уеннарда көч сынашулар, саф татарча аралашу, "Болгар -туган тел" мәйданчыкларындагы әйдаманнар белән яңа очрашулар бүгенге көнне укучыларыбыз өчен быелгы җәйнең иң әһәмиятле вакыйгасы иткән. Форумда катнашкан укучылар үзләрендәге яңалыклар, лидерлык алымнары белән яңа уку елында барыбызны да сөендерәчәгенә иманыбыз камил! Киләчәктә аларга әле тагын-тагын  шушындый истәлекле очрашуларда булу, Республикабыз өчен әһәмиятле вакыйгаларда катнашу насыйп булсын!

"Көмеш кыңгырау " гәҗитенең бүгенге санында (3 нче бит, "Укучылар иҗаты" сәхифәсе) Ганиева Иркәнур Исламнур кызы җитәкчелегендә мәктәбебез укучылары иҗат иткән шигырьләр дөнья күрде. Әхмәдиева Нәзилә, Ганиевлар Илсинә һәм Фәдис язган әсәрләр Сезгә дә ошар дип ышанабыз, талантлы укучыларыбызга озак елларга җитәрлек иҗат очкыны, иҗат ялкыны кабынуын телибез. Булдырасыз, афәрин! Килчәктә дә "Көмеш кыңгырау" белән дуслык җепләрегез өзелмәсен, элемтәгез дәвамлы булсын!

Әсәрләрнең тулы вариантын газетаның бүгенге санын табып укырга киңәш итәбез.

"Көмеш кыңгырау" гәҗитенең бүгенге санында (4 нче бит "Укучылар иҗаты" сәхифәсе) мәктәбебез укучыларының Ганиева Гүзәл Фәнил кызы җитәкчелегендә иҗат иткән шигырьләре басылган! Динмөхәммәтова Алсу, Исмоилова Айгөл һәм Колмөхәммәтов Әлфисне  беренче иҗат җимешләре белән чын күңелдән тәбриклибез. Иҗатлары дәвамлы, каләмнәре үткен һәм йөгерек булсын иде. 

Укучыларыбыз иҗатына Сез дә битараф калмагыз! Гәҗитнең әлеге санын алып укыгыз, үкенмәссез!

"Болгар-туган тел" аланында ял итүче балаларның сменасы тәмам. Колмөхәммәтова З.Э. җитәкчелегендә районыбызның 8 укучысы бүген, палаткалар шәһәрчегендә ялларын тәмамлап , өйләренә кайтты.

...Болгар җирендә, сәләтле татар яшьләреннән аерылырга теләмәгәндәй, вак яңгыр сибәли, елга җиле балаларны салкын кочагында иркәли. Юл сумкалары кайтыр юлга чыгарга әзер. Палаткаларда караватлар бушап калган. Әйдаманнар бер-бер артлы килгән  төрле район автобусларына төркемнәрне озата: кочаклашу, изге теләкләр, аерыласы килмәү, күзләрдә яшь... Монда ял иткән һәркем үзенең сәләтен ачарга өлгергән, очрашулар, музейларга сәяхәтләр, татарча кичәләр, шаяннар һәм тапкырлар клубында көч сынау, мастер-класслар, дустанә мөнәсәбәт, татар мохите аларны бер йодрыкка төйнәгән. Әйдаманнар аланда ял иткән һәр баланы кочагына ала, ирексездән күзләрдә энҗе бөртекләре җемелди, балалар киләсе ялларын да шушы аланда уздырырга сүз биреп автобуска утыра, аерыласы килмәүдән елтыраган энҗе бөртекләрен 3-4 сәгатьтән әти-әниләр белән очрашуны күзаллаудан сагыну яшьләре алыштыра. Спас районыннан ияргән яңгыр нурлы төбәккә кадәр озата кайтты, әйтерсең, һәр баланың кайда яшәгәнен тәгаен ачыклап, киләсе җәйге ялга үзе килеп аласы.

.. "Бакый Урманче аланында " ял иткән Нурлат районы укучылары бу ялдан бик канәгать.  Әйдаманнар Малик, Азат, Илнар, тагын бер Азат, Фәнил  абыйлары, Динә, Гөлназ, Илсөяр,Лилия апаларыннан күңелләренә күчкән дәрт киләчәктә аларны татар халкы йолдызлары дәрәҗәсенә күтәрсен.

Сурәттә Нурлат районыннан килгән төркемне әйдаманнар озата.

"Болгар- туган тел" аланында актив катнашкан өчен мәктәбебез укучысы Колмөхәммәтов Зөлфәт Татарстан Республикасы Хөкүмәте Мәгариф һәм фән министрлыгы Фәннәр академиясе "Сәләт" фонды дипломы белән бүләкләнгән.  Зөлфәткә киләчәктә дә уңышлар телибез, Кизләвебез данын һәм үткәнен изге Болгар белән бәйләүнең үз эчендә тирән мәгънә ята, Зөлфәтнең киләчәгендә ул эзсез югалмас. Афәрин! Котлыйбыз, Зөлфәт!

Мәктәбебез 4 лачынын: спорт йолдызы, оста җырчы- Абдуллаев Илсаф, фәнни тикшеренүләр, эзләнү эшләре белән республикакүләм конкурслар җиңүчесе Исмоилов Хәбибрахман , укучыларның фән олимпиадаларының район туры җиңүчесе Ганиев Әлфис һәм  хоккейда иң оста сакчы Кәримов Алмазны олы тормыш юлына озатты. Егетләребезнең теләгән теләкләре кабул булуын һәм барлык якты өметләре аклануын телибез!

Мәктәбебездән Колмөхәммәтов Зөлфәт, Исмоилова Айгөл, Сибгатова Алия  "Болгар-туган тел" профильле лагерь сменасына Республикабызның изге урыны Болгар шәһәренә киттеләр. Смена дәвамында алар татар халкының йолаларын, тарихын, күренекле шәхесләрен өйрәнеп, үзләренең рухларын ныгытачак. Киләчәктә алар үзләре дә халкыбызның йөзек кашы булсыннар иде.