Бүген мәктәптә 1 нче класс укучыларын 2 нче класса, 9 класс укучыларын дәүләт имтиханнарына дәшеп, соңгы кыңгырау чыңлады. Укучыларны котларга әти-әниләр, ветеран  укытучылар, укучыларның туганнары, авылдашлар килде. Кунаклар укучыларга тырышып укырга, лаеклы алмаш булуларын теләделәр. Чыгарылыш класс укучылары укытучыларга хезмәтләре өчен рәхмәт әйттеләр, киләчәктә мәктәп данын сакларга вәгъдә иттеләр.

   Ташкичү Мәдәнят йортында 20 нче май көнне зур тантана булды. Тантана Ташкичү авылында туып үскән, белем алган, "Бәкер" шифаханәсенең баш врачы Фаяз Ибраһим улы Ибраһимовны искә алуга багышланган иде. Кичәгә Фаяз абыйның тормыш иптәше, балалары, хезмәттәшләре кайтты. Фаяз абыйның яшьлек дуслары, классташлары чыгыш ясады. Бәйрәмдә җырчылар Рөстәм Закиров,Ләйсән Мусиналар, Арча сандугачы Р.галимзяновлар катнашты.

    Кичәне оештыруда Мәдәният йорты, китапханә хезмәткәрләре, өлкәннәр советы рәисе Р.И.Насибуллина, мәктәп китапханәчесе Ф.Ф.Хабибуллиналар башлап йөрде. Кичә бик күңелле булды.

   Бүген Варислар берлеге тагын 13 укучыга артты. Мәктәптә тантанылы рәвештә 13 укучыны Варислар сафына кабул иттек.

    18 май көнне укучыларның психологик халәтләрен өйрәнү, аларга ярдәм оештыру йөзеннән, мәктәпкә соиал яклау идарәсе психологлары килде. Алар укучылар белән әңгәмә оештырдылар, тестлар уздырдылар, үзләренең киңәшләрен бирделәр.

    18 май көнне Яңа Кырлай авылындагы Г.Тукай музеенда укучыларның "Акыл-баттл" уенының чираттагы утырышы булды.  Бу уен Г.Тукай тормышы һәм иҗатына багышланды. Киеренке көрәштә безнең мәктәп командасы 1 нче урынны яулады. Команда составында мәктәп данын 5 класс укучылары Касимова Алсу, Галимзянова Азалия, 7 класс укучысы Ханафиев Айрат һәм 8 класс укучысы Галиев Рәсүл яклады. Рәхмәт сезгә, укучылар!

    16 май көнне Арча шәһәрендә асфальтта рәсем ясау буенча конкурс узды. 5 класс укучысы Хакимзянова Рәшидә бу конкурста "Юл кагыйдәләрен белү" номинациясендә 3 нче урын яулады. 8 класс укучысы Гимадетдинова Рәзилә "Экология елы" номинациясендә, Диплом иясе булды.

   2016-2017 нче уку елы төгәлләнеп килә. Чебешне көз көне санасалар, белемне яз көне сыныйбыз. Менә бүген 6, 7 классларда рус теленнән, 8 класста тарих фәненнән Татарстан Республикасы мәгариф һәм фән министрлыгы җибәргән текстлар буенча контроль эшләр узды.

   Ташкичү авылы Культура йорты, китапханәсе, төп мәктәп коллективы өлкәннәр советы белән берлектә эледән әле төрле чаралар үткәрә. Чираттагы чара март-май айларында юбилей уздырган, авылда, районда культура-агарту эшендә актив катнашучыларны хөрмәтләү формасында узды. Фирая Валишина мәктәптә повар булып эшли. Суфия Хөсәенова -пенсионер. Алар икесе дә "Өммегөлсем" фольклор ансамбленең актив катнашучылары. Ә 85 яшен тутырган Гөлфия Әминова озак еллар Мәмсә авылы клубында җитәкче булып эшләде. Юбилярларны котларга хезмәттәшләре, ирләре, балалары килде. Һәрберсенә җылы сүзләр әйтелде. Чараны өлкәннәр советы рәисе Рузалия Насибуллина әзерләде һәм алып барды.

Арчада Бөек Җиңүнең 72 еллыгына багышланган тантана узды. Бу тантанада безнең мәктәп музее үз экспонатлары белән катнашты. Сугыш дәһшәте ерагайган саен, аның дәһшәте кимеми. Һәр йөрәк "Сугыш кабатланмасын!" - дип тибә.

    Ташкичү авылында бүген Бөек Ватан сугышы тәмамлануга багышланган митинг булды. Митингка авыл халкы, мәктәп укучылары җыйналды. Бөек үткәнебез турында искә төшердек, кабат сугышлар булмасын дип теләдек.