Ш.Мәрҗани музее каршында эшләп килүче түгәрәк әгъзалары 17 октябрь көнне “Таттелеком” җәмгыяте төзегән “Ш.Мәрҗани чишмәсе”нә экскурсиягә бардылар. Түгәрәк җитәкчесеМ.З.Гарифжанов чишмә тарихы, су, суның үзлекләре турында сөйләде, чишмәләрне саклау проблемаларына басым ясады.

   Ташкичү авылы янында тарихи Кәтәй чишмәсе буенда тукталыш ясалды. Бүгенге көндә ул чишмәне реконструкцияләү эше белән таныштылар. Реконструкцияне башкаручы Вафин Әнвәр һәм аның изге гамәлләренең бүгенге көндә бик әһәмиятле булуына игътибар иттерелде.

   17нче октябрь көнне бишенче, алтынчы класс укучылары катнашында “Көзге муллык” бәйрәме уздырылды. Бәйрәмне тәрбия эшләре буенча директор урынбасары Хәбибуллина Флера Фатиховна ачып җибәрде. Ул “Көзге композиция”ләр бәйгесендә җиңү яулаган укучыларны мактау грамоталары белән бүләкләп китте. Шулай ук җәйге каникул вакытында эксперимент үткәреп, бакчаларында карбыз һәм кавыннан мул уңыш алган, 6нчы класс укучысы Ибатуллина Гөлия дә мәктәпнең мактау грамотасына лаек булды. Бәйрәм күңелле скетчлар, заманча биюләр һәм матур җырлар,  күңелле уеннар белән үрелеп  барды. Ике генә класс булуга карамастан бәйрәм программасы бик бай һәм кызыклы итеп төзелгән иде. Килгән әти –әниләр, кунаклар бүгенге тамашаны карап күңел күтәренкелеге һәм дә рухый азык туплап кайтып киттеләр.

    Мәктәптә Ш.Мәрҗани тууына 200 еллыкка багышланган чаралар оештыру дәвам итә. Бүген башлангыч класс укучылары өчен “Ш.Мәрҗани һәм китаплар” дигән дәрестән тыш чара оештырылды.  Чарада Ш.Мәрҗанинең галим булып китүендә китапларың роле, аларны саклау мәсьәләләре каралды. Чараны Ш.Мәрҗани музее җитәкчесе М.З.Гарифжанов  7класс укучылары белән оештырды.

Ташкичү төп мәктәбе дирекциясе, 11 октябрь көнне  укытучылар, хезмәткәрләр, әти-әниләр, уку алдынгылары өчен Г.Камал исемендәге Татар Дәүләт академия театрына экскурсия оештырды. Бу көнне Туфан Миңнуллинның “Гөргөри кияүләре” исемле спектакле сәхнәгә куелды. Спектакльдә артистлар – Наил Дунаев, Раушания Юкачева, Ләйсән Рәхимова, Дания Нуруллина, Фирая Әкбәрова, Алмаз Гәрәевләр иҗатына сокланып утырдык.

6нчы сыйныф укучылары Бөек Ватан сугышы кырларында һәлак булган авылдашлар хөрмәтенә куелган һәйкәлне ел буена карап торалар. Бүген исә, һәйкәл әйләнәсендәге  чүпләрне, корган чәчәкләрне  утап,  чистартыллар.

  5 октябрь көнне мәктәптә Ш.Мәрҗани исемендәге тарих институты хезмәткәрләре кунакта булып киттеләр. Алар авыл халкы, тирә-як мәктәпләрнең тарих укытучылары, тарих белән кызыксынучылар, китапханәчеләр белән очрашты. Аларның төп максаты – “Иске Ашыт җыены авыллары тарихы”  дигән китапны тәкъдим итү иде.

ГО айлыгы кысасында 4 октябрь көнне мәктәптә тормыш иминлеге нигезләре буенча   Багавиев Әбүзәр Җәүдәтович  ачык дәрес үткәрде. Дәрес тулысынча укучыларның тормыш иминлеген булдыру сорауларына багышланды. Янгын,  ашыгыч ярдәм, полиция, газ хезмәтләренең эшләре буенча мәгълүматләр әйтелде. Саклану чаралары, ысуллары кабат - кабат искәртелде.Укучыларның тормышын, сәламәтлеген саклауда ачык дәрес үзенең лаеклы урынын алды.

Укытучылар көненә багышлап мәктәптә  “Сез иң гүзәл кеше икәнсез!” дигән темага рәсем күргәзмәсе оештырылды

       Октябрь ае бәйрәм көне - Өлкәннәр көне белән башлана. Ташкичү мәктәбендә бу көн матур чараларга бай булды.  Мәктәп администрациясе  лаеклы ялда булган укытучы һәм хезмәткәрләребез өчен бәйрәм оештырды. Өлкәннәребез ул көнне мәктәбебезнен кадерле  кунаклары булдылар. Авыл клубы хезмәткәрләре, укучылар  көче белән әзерләнгән  концерт-тамаша да өлкәннәребез күңеленә хуш килде. Бу көнне өлкәннәребез яшьлек елларына кайттылар, яшьлек  җырларын тыңладылар һәм кушылып җырладылар. Аларның кузләрендә шатлык яшьләре җемелдәде. Барысы бер теләкне теләде: еллар имин булсын,табыннар мул булсын һәм сезгә дә бу көннәрне күрергә язсын.