Мәктәптә башлангыч профсоюз оешмалары членнары арасында (ир-атлар) волейбол ярышлары үтте. Әлеге ярышка Түбән Аты, Түбән Мәтәскә, Иске Чүриле мәктәпләреннән, Арчаның 5 нче номерлы гимназиясеннән, Арча агросәнәгать көллиятеннән командалар килгән иде. Ярышның җиңүчесе - Агросәнәгать көллияте командасы.  

18 нче мартта Шушмабаш авылы мәдәният йортында 2000 нче елгы егетләр һәм аннан яшьрәкләр арасында “Северный” күмәк хуҗалыгы җитәкчесе призына татарча көрәш буенча Арча районы беренчелеге узды. Бу ярышта мәктәбебез көрәшчеләре дә актив катнашты.65 кг га кадәр үлчәү авырлыгында Нурисламов Рәниф 4 нче урынны, 70 кг нан югары үлчәү авырлыгында Мөхәрләмов Айдар 2 нче урынны алды. Калган көрәшчеләр дә сынатмады. Укучыларны ярышларга тренер Әхмәдиев М.Г. әзерләде.

Бүген мәктәптә ата-аналар җыелышы узды. 3 нче чирек йомгаклары белән укыту-тәрбия эшләре буенча директор урынбасары Вәлиева Н.Т. таныштырды. Башлангыч класслар укытучысы Минһаҗева Ч.М. "Әдәпле-әхлаклы шәхес тәрбияләүдә бердәм эшчәнлек"  темасына доклад белән чыгыш ясады. Тәрбия эшләре буенча директор урынбасары Садриева Н.З. "Балаларның интернетка бәйлелеген кисәтү һәм укучыларның куркынычсызлыгын тәэмин итү" темасына басым ясады, игътибарга аласы мәсьәләләргә тукталды. Шулай ук 9 нчы класс укучыларының әти-әниләре имтиханнарга әзерлек һәм сынау имтиханнарының нәтиҗәләре белән таныштылар, рус теленнән укучылар белән бергә сынау имтиханы биреп карадылар. Җыелыш классларда да дәвам итте.

16 март көнне мәктәбебездә башлангыч сыйныф укучылары катнашында “Юл йөрү кагыйдәләре белгечләре” дигән исем астында кичә уздырылды. Кичәгә районыбыздан кунаклар-ГАИ инспекторы Сәйфиев Алмаз Рөстәмович һәм  Мөхәмәтҗанова Энҗе Газизовна килгән иде. Кичә җанлы рәвештә юл йөрү кагыйдәләренә карата җыр һәм шигырьләр белән башланып китте. Укучылар ике командага бүленделәр. “Светофор” һәм “Зебра” командалары юл йөрү кагыйдәләрен белү буенча көч сынашты. Укучылар сорауларга җаваплар бирделәр, ребуслар чиштеләр. “Машиналар узышы”  дигән уен уйнадылар. Укучылар тыючы, кисәтүче, күрсәтүче билгеләрне атый белделәр. Кичә концерт номерлары белән үрелеп барды. Ахырдан ГАИ инспекторлары укучыларның чыгышына рәхмәт әйттеләр, бүләкләр тапшырдылар, укучылар белән фотога төштеләр.

Яшүсмер чак – кеше тормышындагы иң актив чор. Тормыш тәҗрибәсе җитмәү, җинаять җаваплыгын, законнарны белмәү еш кына үз-үзеңне кулда тота алмау да үтә аяныч нәтиҗәләргә китерергә мөмкин. Ә хокук тәртибен бозганда закон нигезендә җавап бирергә туры киләчәк. Шушыларны аңлату максатыннан 6-7 нче класс укучылары  белән "Яшүсмерләрнең хокук бозулар өчен җаваплылыгы"  темасына класс сәгате үткәрелде.

Мәктәптә көрәш, волейбол  түгәрәкләре актив һәм нәтиҗәле эшли. Яшь көрәшчеләребез барлык ярышларда да актив катнашалар һәм призлы урыннар алалар. Бәйрәм уңаеннан мәктәп спортзалында хатын-кызлар арасында уздырылган волейбол ярышында кызларыбыз да матур нәтиҗәләр күрсәтте. Иртәнге линейкада 11 нче март көнне көрәш ярышында катнашып,  мәктәп данын яклаган 13 көрәшче егетебез һәм волейболчы кызларыбыз бүләкләнде.

Бүген 9 нчы класс укучылары өчен география фәненнән белемнәрен тикшереп карау максатыннан сынау имтиханы уздырылды.