Табигать һәйкәлләре – фәнни, тарихи, эстетик һәм мәдәни әһәмияткә ия булган табигый объектлар. Урта Курса авылы зиратында урнашкан соры челәннәр колониясе - табигать һәйкәлләре исемлегендә һәм Кызыл китапка да кертелгән. Экология елы уңаеннан бүген 6 нчы класс укучылары әлеге табигать һәйкәле янына бардылар, үзләре өчен күп мәгълүмат алдылар.

Экология елы, чисталык икеайлыгы уңаеннан бүген мәктәптә өмә оештырылды. Укучылар, укытучылар, техник хезмәткәрләр көче белән мәктәп яны, бакчалар  тырмаланды, тәртипкә китерелде, агачлар утыртылды. Шулай ук  юл кырыйлары чистартылды. Өмәдә һәркем тырышып эшләде.

Укучыларны һөнәрләр дөньясына алып керү, аларда теге яки бу һөнәргә кызыксыну уяту, теләк – омтылышларын ачыклау һәм эш дәвамында һөнәр иясенә кирәкле күнекмәләр булдыру өстендә мәктәптә даими эш алып барыла. Бүген илебез байлыгын тудыручы, аның чәчәк атуы өчен армый – талмый хезмәт куючы һөнәр ияләренә мәхәббәт хисе уяту максатыннан “Курса МТС” ы җитәкчесе Гыйләҗетдинов Р.Г., хуҗалыкның баш зоотехнигы Абдуллин Р.Р., җирле үзидарә рәисе Вафина Р.Р. 9 нчы класс укучылары белән очрашты. Рәүф Гыймадетдин улы укучыларга авыл хуҗалыгында ихтыяҗ булган һөнәрләр турында мәгълүмат бирде, махсус белемле белгечләр кирәклеге турында җиткерде. Укучыларга хезмәтнең һәрнәрсәдән дә өстен, куәтле көч булуын, җәмгыятьтьтә барлык байлыкның эш, хезмәт белән генә тудырылуын төшендерде. Калган җитәкчеләр дә һөнәре булган, кулыннан эш килгән кешенең җирдә һәрвакыт үз урыны, үз юлы, үз һөнәр җимешләре булуын әйттеләр.

“Һәр буынның укытучысы” проекты кысаларында бүген мәктәбебездә озак еллар рус теле һәм әдәбияты дәресләрен укыткан, тәҗрибәле класс җитәкчесе Зарипова Гөлчирә Рәфкат кызы 7-8 нче класс укучылары өчен ачык класс сәгате уздырды. “Яхшы сүз – җан азыгы” исеме астында үткән әлеге чара яхшылыкның һәркем өчен иң күркәм сыйфатларның берсе икәнен төшендерүгә корылган иде. Укучыларда кешелеклелек, изгелек сыйфатлары тәрбияләүдә, бер-береңә ярдәмләшеп, булышып, яхшы гамәлләр генә кылып яшәүдә бу чара искиткеч зур әһәмияткә ия. Лаеклы ялда булуына карамастан, мәктәп белән тыгыз элемтәдә булган киң күңелле, тырыш, сабыр Гөлчирә Рәфкат кызына рәхмәтебезне җиткерәбез, бәхетле гомер кичерүен телибез.

Бүген мәктәптә бердәм милли кием көне игълан ителде. Барлык укучылар да милли киемнәрдән, түбәтәй, калфаклардан йөрделәр, милли бизәкләрне дә кулландылар. Әлеге чарада барлык класс укучылары да актив катнашты.

Бүген укучылар җырчы, педагог, халык уен коралларында уйнаучы Шиһапов Солтан Фидәис улы белән очраштылар. Җырчы укучыларга бик күп төрле уен кораллары: курай, баян, кыңгыраулы гармун, тальян, сорнай, кубыз һ.б турында мәгълүмат бирде, укучыларга туган телгә багышланган шигырьләрне,  татар халык көйләрен, җырларын тәкъдим итте. Очрашу ахырында бергә "Туган тел" җырын җырладылар.

 Мәрхәмәтлелек – ул барлык яхшы эшләр, елмаюлы караш, кемгә дә булса булышу, ярдәм итү, хөрмәт һәм ихтирам. Бүген мәктәбебездә “Язгы изгелек атнасы”на йомгак ясалды. Укучыларыбыз белән берлектә “Игелек агачы” ясап, аңа эшләгән изгелекләребезне язып куйдык, бер-беребезгә табигатьне сакларга чакырып өндәүләр язылган шарлар бүләк иттек. Кечкенә сыйныф укучылары “Бердәмлек” символы ясадылар.