17 нче май көнне мәктәбебездә районның Мәрхәмәтлелек үзәгендә эшләүче "Гаилә  һәм балалар” бүлегенән килгән психолог Шаесламова М.Ф. һәм яшүсмерләр эше буенча махсус белгеч Нигъмәтуллин Н.К. югары класс укучылары белән сөйләшү алып бардылар. Алар укучылар  белергә тиешле законнарны, җәмәгать урыннырында үз- үзеңне тоту кагыйдәләрен искә төшерделәр. Нигъмәтуллин К.Х. кичке рейдлар вакытында яшъләр арасында күзәтелгән кайбер кимчелекләрне атап китте, шулай ук  71 нче законның үтәлешенә басым ясады. Белгечләр кызлар һәм малайлар белән аерым сөйләшү,  психологик тренинг  уздырдылар. Укучылар үзләрен кызыксындырган сорауларга җавап алдылар. 

Бүген мәктәбебез укучылары Бикбаева Айзилә (2 кл.) һәм Бикбаева Адилә (7 кл.) район күләмендә уздырылган асфальтка рәсем ясау конкурсында катнаштылар. Үз номинациясендә "Балаларны яклау көне" нә карата ясаган рәсеме белән 7 нче класс укучысы Бикбаева Адилә 1 нче урынны яулады. Адиләне җиңүе белән котлыйбыз!

Европа иммунлаштыру атналыгы 24-30 апрель көннәрендә уза. Бу вакыт эчендә балаларны вакциналауга басым ясала. Белгечләр, вакцинаның сыйфаты өчен борчылмыйча, үсеп килүче буынга прививка кадау кирәк һәм мөһим дип белдерә. Авыл медпункты фельдшеры Сабитова Наилә апа тарафыннан да укучыларга прививка ясауның әһәмиятле булуы турында мәгълүмат җиткерелде.

Бүген Арчада район беренчелегенә волейбол ярышы үтте. Анда мәктәбебезнең кызлар командасы катнашты һәм төп мәктәпләр арасында 2 нче урынны яулады. Команда составында уйнаган кызларыбыз -  Минһаҗева З., Садриева А., Мөхәмәдиева А., Солтанова К., Минһаҗева И., Зәйнетдинова Э., Хөснетдинова И. (тренерлары - Минһаҗев М.В. Гарифуллин Г.В.) җиңүләре белән котлыйбыз!

Башлангыч класс укучыларына тапшырылган "Укучының мәдәни көндәлеге" нә нәтиҗәләр чыгарылды һәм иң тулы итеп тутырган көндәлек ачыкланды. Җиңүче дип 3 нче класс укучысы Гарифуллин Галим табылды. Аның көндәлеге район конкурсына тәкъдим ителде.