4 апрель көнне  7-9 нчы класс укучылары Татарстан территориясендәге Идел-Кама дәүләт табигать биосфера тыюлыгы  һәм “Түбән Кама” милли паркы, Россия,Татарстан һәм Арча районының Кызыл китаплары белән кабат таныштылар. Шушы темаларга кагылышлы презентацияләр, видеоязмалар күрсәтелде.

Мәктәптә 3-8 апрель көннәрендә биология атналыгы игълан ителде. 3 апрель көнне атналык ачып җибәрелде, классларда “Арча хәбәрләре” газетасының экологиягә кагылышлы язмалары белән укучылар үзләре чыгыш ясады. Сүз Татарстанның яңа Кызыл китабы чыгу, ЭКОяз - 2017 экология ике айлыгы башланып китү турында барды. Шулай ук “Хайваннар һәм үсемлекләр дөньясындагы рекордлар” темасына стенд әзерләнде.

Бүген мәктәбебездә 2002 нче елда туган һәм аннан яшьрәк укучылар арасында “Курса МТС” ы җитәкчесе призына милли көрәш бәйгесе үткәрелде. Бу бәйгедә районыбызның 17 мәктәбеннән барлыгы 127 укучы катнашты. Бәйрәмне ачу тантанасында Арча муниципаль районы башлыгы Нуриев И.Г., ярышның төп иганәчесе, “Курса МТС” ы җитәкчесе Гыйләҗетдинов Р.Г., Арча районы мәгариф идарәсе җитәкчесе Дәүләтбаев З. М., Арча районы яшьләр эшләре, спорт һәм туризм буенча бүлек җитәкчесе Габделгазизов И.Н., Арча балалар һәм яшүсмерләр мәктәбе директоры Камалетдинов Р.Р. катнашты. Мәктәбебезнең көрәшче егетләреннән торган команда бу бәйгедә 1 нче урынны яулады. Шәхси беренчелектә нәтиҗәләр түбәндәгечә: 55 кг га кадәр - Хөснетдинов Рәмис 3 нче урын, 65 кг га кадәр Закирҗанов Илназ - 1 нче урын, Рамазанов Илназ - 2 нче урын, 70 кг га кадәр Нурисламов Рәниф 1 нче урын, 70 кг нан югары - Мөхәрләмов Айдар - 1 нче урын. 65-70-70 кг нан югары үлчәү авырлыкларындагы җиңүчеләр арасында абсолют батыр булып Мөхәрләмов Айдар калды һәм ул тәкәгә ия булды. Командалар арасында Урта Курса мәктәбе командасы 1 урында, 2 нче урында — Курса Почмак мәктәбе, 3 урында Шушмабаш мәктәбе командалары. Барлык катнашкан укучыларыбызны һәм тренерлары Әхмәдиев М.Г. җиңүләре белән чын күңелдән котлыйбыз.

Бүген мәктәп территориясендә өмә үткәрелде. Тирә-яктагы кар таратылды, стеналар кардан арчылды.

Бүген 9 нчы класс укучылары белән татар теле буенча БРТ га әзерлек максатыннан сынап карау тесты уздырылды. 

Арчаның Укучылар сараенда мәктәп укучылары арасында шахмат ярышы булды. Анда мәктәбебез укучылары командасы 1 нче урынны алды. Шәхси беренчелектә Шәфигуллин Камил 2 нче, Шаһниев Рәмзил  3 нче урынны яулады. (Тренерлары - Лотфуллин М.Л.) Шахматчыларга алга таба да уңышлар телибез!

Каникул вакытында 9 нчы класс укучылары өчен төрле фәннәрдән консультацияләр уздырыла. Бүген алар белән математика фәне буенча имтиханга әзерлек эше алып барылды.

Мәктәптә башлангыч профсоюз оешмалары членнары арасында (ир-атлар) волейбол ярышлары үтте. Әлеге ярышка Түбән Аты, Түбән Мәтәскә, Иске Чүриле мәктәпләреннән, Арчаның 5 нче номерлы гимназиясеннән, Арча агросәнәгать көллиятеннән командалар килгән иде. Ярышның җиңүчесе - Агросәнәгать көллияте командасы.  

18 нче мартта Шушмабаш авылы мәдәният йортында 2000 нче елгы егетләр һәм аннан яшьрәкләр арасында “Северный” күмәк хуҗалыгы җитәкчесе призына татарча көрәш буенча Арча районы беренчелеге узды. Бу ярышта мәктәбебез көрәшчеләре дә актив катнашты.65 кг га кадәр үлчәү авырлыгында Нурисламов Рәниф 4 нче урынны, 70 кг нан югары үлчәү авырлыгында Мөхәрләмов Айдар 2 нче урынны алды. Калган көрәшчеләр дә сынатмады. Укучыларны ярышларга тренер Әхмәдиев М.Г. әзерләде.