Мәгълүм булганча, быел 6 ноябрьдә Татарстан Республикасы Конституциясе кабул ителүгә 25 ел булды. Безнең барлык эш-гамәлләребез Татарстан Конституциясе кысаларында алып барыла. Ул төп закон буларак, республикабызның барлык халкы өчен хокукый гына түгел, әхлакый кыйбла да булып санала. Шуңа без аны тирәнтен өйрәнергә тиеш. Укучыларга бүген әнә шулар хакында кабат аңлатылды һәм Конституция кабул ителү тарихын чагылдырган видеофильм күрсәтелде.

     30 октябрь илебездә Сәяси репрессия корбаннарын искә алу көне буларак билгеләп үтелә. Россия тарихында җан өшетерлек вакыйга булып уелып калган репрессия еллары әле бүген дә күпләрнең күңелендә саклана. Күпме кеше гөнаһсызга рәнҗетелеп, төрле җинаятьләрдә гаепләнеп, туган якларыннан куылган, физик һәм рухи яктан юк ителгән. “Халык дошманы”, “Халык дошманы баласы” дигән тамга аларга тыныч яшәргә ирек бирмәгән, һәркөнне җәберләүләргә дучар итеп торган. Нахакка гаепләүләр күпме кешенең гомерен вакытыннан алда алып киткән, күпмесенең йөрәген, җанын әрнеткән, әби-бабалары нигезен, туфрагын соңгы сулышларына кадәр сагындырып яшәткән.

28 октябрь көнне «Арча» спорт комплексында танылган ветеран көрәшче Мортазин Фәргәт  истәлегенә 2002-2003 нче елгы һәм аннан яшьрәк егетләр арасында көрәш буенча Республикакүләм турнир уздырылды. Турнирга күрше-тирә районнарның (Әтнә, Балтач, Теләче, Кукмара, Биектау, Саба, Арча) көрәшче малайлары җыелды. Бу турнирда мәктәбебездән Вәлиев И. (6 кл.), Нурисламов Р. (9 кл.), Мөхәрләмов А. (9 кл.), Закирҗанов И. (9 кл.) катнаштылар.  Үз үлчәү авырлыкларында  Нурисламов Р. (9 кл.), Мөхәрләмов А. (9 кл.) җиңү яуладылар һәм  икесе дә 1 нче  урынга  лаек булдылар. Мәктәп данын яклаган егетләребезгә һәм тренерлары Әхмәдиев М.Г.  зур рәхмәтебезне җиткерәбез һәм алдагы ярышларда уңышлар теләп калабыз.

26 нчы октябрьда Сарай-Чокырча башлангыч мәктәбе укучылары белән «Коррупциягә каршы көрәштә мин нәрсә эшли алам?» темасына тәрбия сәгате үткәрелде. Укучыларга коррупция турында төшенчә бирелде, аның билгеләре белән таныштырылды. Коррупцияне тормыш шартларында таный белергә, коррупция китергән зыянга үз фикереңне белдерә белергә өйрәтелде. Ахырдан  “Надо жить честно!” рәсем конкурсына нәтиҗә ясалды.

    Үткәнен белмәгәннең киләчәге юк диләр. 1, 3 нче сыйныф укучылары әби-бабайларыбызның тормыш-көнкүреше белән танышу өчен мәктәбебездәге "Туган якны өйрәнү музее" нда экскурсиядә булды. Укучылар экскурсоводларның чыгышларын игътибар белән тыңладылар, экспонатларны кызыксынып күзәттеләр, туган авылыбызда туып-үсеп, зур дәрәҗәләргә ирешкән шәхесләр тормышы белән таныштылар.