Бүген мәктәптә ата-аналар җыелышы үтте. Ата-аналарны укыту-тәрбия эшләре буенча директор урынбасары Вәлиева Н.Т. 3 нче чирек йомгаклары, укучыларның конкурсларда ирешкән уңышлары белән таныштырды. 9 нчы класс җитәкчесе Гыймадиева Г.Н. "Хезмәт тәрбиясе һәм һөнәри юнәлеш бирү" темасына,  тәрбия эшләре буенча директор урынбасары Садриева Н.З. "24 нче март - туберкулезга каршы көрәш көне" уңаеннан чыгыш ясадылар. Мәктәп директоры Хәбибуллин Ф.М. укучыларның куркынычсызлыгын тәэмин итүгә, каникул вакытында укучыларның иминлеге өчен ата-аналарның җаваплы булуларына басым ясады. Җыелыш классларда дәвам итте.

Казанда көрәш буенча уздырылган Россия беренчелеге  ярышларында Татарстан данын яклап мәктәбебезнең 9 нчы класс укучысы Нурисламов Рәниф тә катнашты. Күптән түгел Татарстан беренчелегендә ул үз үлчәү авырлыгында 1 нче урынны яулаган иде инде. Бу юлы тагын да зур җиңү -  2002-2003 нче елгы егетләр арасында 75 кг га кадәрге үлчәү авырлыгында Рәниф Россия чемпионы булды ! (тренеры Әхмәдиев Марат Госман улы). Нурисламов Рәнифне һәм тренеры Марат Госман улын зур җиңүләре белән котлыйбыз!

Бүген Урта Курса авыл мәдәният йортында "Без бергә" фестиваленең зона этабы үтте. Бәйгегә Сеҗе, Сикертән, Курса Почмак, Урта Курса мәктәпләренең иң талантлы балалары җыелды. Нәни артистлар хореография, вокал, нәфис сүз номинацияләрендә чыгыш ясадылар. Афәрин!

Бүген мәктәптә "Авыл хатын-кызы" районкүләм бәйгесенә иҗат ителгән рәсемнәрдән күргәзмә оештырылды. Иң яхшы дип саналган эшләр район этабына җибәрелде.

Укучыларны тимер юлларда  һәм тимер юл транспортында үз-үзеңне тоту кагыйдәләре белән таныштыру максаты белән 7 нче сыйныфта "Тимер юлларда сак бул!" дип исемләнгән класс сәгате үткәрелде. 

2-3 мартта Казан дәүләт мәдәният институтында Татарстанның һәм Россиянең Халык артисты, профессор Венера Ганиева җитәкчелегендә «Сандугач-Соловей» V Халыкара вокалистлар конкурсы узды. Анда Мәскәүдән, Кытайдан, Башкортстаннан, Мари-Эльдән, Архангельск, Яр Чаллы һәм башка бик күп төбәкләрдән 300 дән артык бала катнашты. Анда Арча балалар сәнгать мәктәбе түгәрәгенең филиалына йөрүче 3 нче класс укучысы Закирҗанов Кәрим (укытучысы Гайнуллин Булат Марсель улы) III дәрәҗә лауреат исеменә лаек булды. Ул кубок, диплом һәм истәлекле буләк белән бүләкләнде. 

10 мартта Шушмабаш урта мәктәбендә  “ Северный” хуҗалыгы җитәкчесе  Рөстәм Хәйруллин призына 2006 елда туган һәм аннан өлкәнрәк яшьтәге малайлар арасында милли көрәш буенча ярыш узды. Анда 70 тән артык яшь спортчы катнашты. Мәктәбебез укучылары да әлеге ярышта  актив катнашты. 36 кг кадәр үлчәүдә 5 нче класс укучысы Гатауллин Радик 2 нче урынны,  7 нче класс укучысы Хөснетдинов Данис 1 нче урынны яулады. Яшь көрәшчеләрне, аларның тренерлары Әхмәдиев М.Г. җиңүләре белән котлыйбыз, алдагы ярышларда да  уңышлар, сәламәтлек телибез.