Укучыларда патриотизм хисләре уяту, Ватанга мәхәббәт тәрбияләү һәм хәрби яктан әзерлекләрен тикшерү максатыннан бүген “ФОРПОСТ” отряды членнары төрле спорт төрләре буенча сынау бирделәр. Әлеге чараны отряд членнары белән район хакимиятенең әйдәп баручы белгече Нигъматуллин Н.К., районның “ФОРПОСТ” оешмасы җитәкчесе Мингазов Г.Ш. уздырды. Укучылар пневматик мылтыктан ату, турникта тартылу һ.б төрләр буенча үз көчләрен сынап карадылар һәм сынатмадылар.

Бүген мәктәп коллективы авыл җирлеге белән берлектә Казан шәһәрендә узган ярминкәдә катнашты. 

14 нче апрель көнне мәктәбебез укучылары Гайнуллина З., Камалова  Л., Закирҗанов К., Гатауллин Р. Арчаның 5 номерлы гимназия базасында үткәрелгән “Куркынычсыз тәгәрмәч-2018” район конкурсында катнашып уңышлы чыгыш ясадылар. 

Мәктәбебезнең 7 нче класс укучысы Гайнуллина Зилә  РСФСРның атказанган укытучысы, Бөек Ватан сугышы ветераны  Рәгыйб Усман улы Халитов исемендәге II районара  һәм VI мәктәпкүләм “Шушы яктан, шушы туфрактан без” фәнни-гамәли укучылар конференциясендә катнашты. Зилә әлеге бәйгедә 3 нче урынга лаек булды, диплом белән бүләкләнде. (Җитәкчесе – Гыймадиева Г.Н.) 4 нче класс укучысы Гарифуллин Галим  иҗади эше белән катнашып, сертификатка лаек булды. (Укытучысы - Насыйбуллина Ф.К.) Зиләгә һәм Галимгә киләчәктә дә зур уңышлар телибез.

“Космонавтика көне” уңаеннан 5 нче класста класс сәгате узды. Бу чарада укучылар галәм киңлеген өйрәнү өчен нәрсә өчен кирәклеге  хакында үзләренең фикерләрен белдерделәр. Иң беренче галәмгә очкан эт, аннан соң 108 минут космик корабльдә булган Гагаринны искә алдылар. Космик корабльдә кешеләрнең нәрсәләр белән туклануы, ничек яшәүләре күрсәтелде. Укучылар бик кызыксынып карадылар һәм теләгән сорауларына җаваплар алдылар.  

Узган ял көнендә мәктәбебез спортзалы гөрләп торды. Биредә Югары Курса, Урта Курса, Түбән Курса, Алан, Корайван, Сеҗе, Мөрәле авылларыннан җыелган яшьләр арасында волейбол ярышы үтте. Ярыш бик зур киеренкелек белән, җанлы барды. Иң көчле командаларны "Курса МТС" ы җитәкчесе Гыйләҗетдинов Р.Г., Муллагалиев Р.Ә. улы да котларга килгән иде. Нәтиҗәләр түбәндәгечә булды: 1 урында - Алан яшьләре, 2 урында - Югары Курса яшьләре, 3 урында - Сеҗе авылы яшьләре. Җиңүчеләргә акчалата бүләкләр тапшырылды. Барлык җиңүче командаларны да котлыйбыз!

Теләче районында 2002 нче елгы һәм яшьрәк яшүсмерләр арасында Россиянең һәм Татарстан Республикасының, Башкортстанның халык артисты, автоспорт буенча спорт мастеры Салават Фәтхетдинов призына көрәш буенча республика турниры үтте. Бу ярышта мәктәпнең 9 нчы класс егетләре дә катнашты. Нурисламов Р. призлы 2 нче урын, Мөхәрләмов А. 3 нче урынны яулады. Җиңүчеләргә истәлекле бүләкләр, кубоклар тапшырылды. Җиңүчеләрне котлыйбыз!

“Акчаңны югалтсаң - бернәрсә дә югалтмыйсың, вакытыңны югалтсаң – күп нәрсәне югалтасың, ә сәламәтлегеңне югалтсаң – барысын да югалтасың”. Сәламәтлек - кеше өчен иң кадерле нәрсә, ләкин аны сакларга кирәк. Бер югалтсаң, аны кире кайтаруы бик авыр. Сәламәт булмаган кешегә дөньяның бер кызыгы да юк. Укучыларда сәламәт тормыш рәвеше, дөрес туклану, көндәлек режимны төгәл үтәү, сәламәтлекне саклау һәм ныгыту күнекмәләре булдыру омтылыш тәрбияләү максатыннан  4 нче сыйныф укучылары белән “Сәламәтлек-зур байлык” дигән темага  сыйныф сәгате уздырылды һәм гимнастик күнегүләр эшләтелде.

Бүген "Сәламәт бул!" Бөтенроссия акциясе кысаларында класс сәгатьләре, әңгәмәләр, рольле уеннар, 7-9 нчы класс укучылары катнашында командаларга бүленеп брейн-ринг уздырылды. Укучыларга сәламәт булу, аны саклау серләре, сәламәт яшәү рәвеше кагыйдәләре аңлатылды, бурычлар куелды.