Бүген, дәресләрдән соң, авыл җирлеге белән берлектә өмәгә чыктык. 1-4 нче сыйныф укучылары һәйкәл, мәчет тирәсен чистартса, 5-9 нчы сыйныф укучылары мәктәп территориясен чистарту белән шөгыльләнде.

Бүген, ял көне булуга да карамастан, мәктәпнең 1999 елгы һәм аннан да яшьрәк укучылардан тупланган, кызлар һәм малайларның волейбол командасы волейбол ярышларының район турында катнашып кайттылар. Әлеге ярышларды командаларыбыз 2 урын алып кайттылар. Шунысы кызыклы, кызлар командасы мәктәбебез тарихында, быел беренче тапкыр формалашты һәм тиз арада уңышка да иреште. Укучыларыбызны кайнар котлыйбыз!

Мәктәпнең 27.04.2013 көненнән, 46 нчы № лы приказы нигезендә, бүген бездә Рәсәйкүләм тормыш иминлеге дәресе үткәрелде. Әлеге дәресне ТИН укытучысы Хәсәнов И.Р. , "Гадәттән тыш хәлләрдә беренче ярдәм" темасы буенча үткәрде. Дәрестә төрле гадәттән тыш хәлләр вакытында үз-үзеңә, янәшәдәге кешеләргә ничек беренче ярдәм күрсәтергә кирәклеген аңлатты.  

Бүген, 1 сыйныф укытучысы Мөхетдинова А.Н. "Казан- Универсиада башкаласы" дигән темага ачык тәрбия сәгате үткәрде. Әлеге дәрес яңа стандартлар буенча төзелгән иде. Укучылар, универсиада буенча төрле кызыклы сорауларга җавап бирделәр, спорт уеннарының гади вариантларын уйнап карадылар. 

Бүген, мәктәптә балаларны гадәттән тыш хәлләр очрагында яклау көне үтте. Иң элек эвакуация үткәрелде, 1 минут 30 секунд эчендә барлык коллектив мәктәптән урамга чыгып төзелеп баскан иде инде. Линейкада әлеге көн һәм аның  әһәмияте турында мәгълүмат укучыларга җиткерелде.  Әлеге чарада, 4-9 сыйныф укучылары 2 командага бүленеп ярыштылар. Гадәттән тыш хәлләрдә үз-үзеңне яклау турында төрле теоретик белемнәрен сынадылар, аларның кайберләрен  практикада үткәреп тә күрсәттеләр, төрле биремнәр үтәделәр.

Кичә, 26 апрель көнне, мәктәбебезнең Кайбыч сәнгать мәктәбендә шөгыльләнүче 4 укучысы, Апаста районара "Яшь музыкант" дип аталган конкурста катнашып кайттылар. Катнашып кына түгел, ә бер кочак диплом күтәреп кайттылар. "Инструменталь ансамбль" номинациясендә игезәк бертуганнар - 3 нче сыйныф укучылары Рамил һәм Ранис Гаттаровлар-1 нче урын; "Фортепиано" номинациясендә 6 нчы сыйныф укучысы -Хәсәнова Зәрринә - 2 нче урын; "Вокал-соло" номинациясендә 5 нче сыйныф укучысы- Хисамова Илсөя 3 урын дипломына ия булдылар. Укучыларның һәркайсына акчалата бүләк  тапшырылган. Укучыларыбызны һәм аларның җитәкчеләрен кайнар котлыйбыз. Афәрин!

Бүген бездә "Тукай- безнең күңелләрдә" дип аталган, Г.Тукайның туган көнен искә алу кичәсе үтте. Кичә барышында балалар бакчасына йөрүче сабыйлар шагыйрьнең шигырьләрен сәхнәләштереп күрсәттеләр.Аларны тәрбиячеләре Хөсәенова Л.Т. әзерләгән.  1-5 нче сыйныф укучылары Г.Тукайның тормыш һәм иҗади эшчәнлегенә караган сорауларга җавап бирделәр. Әлеге кичә татар теле һәм әдәбияты укытучысы- Булатова Г.А.  җитәкчелегендә үтте.

 22-27 апрель көннәрендә мәктәптә, "ТР һәм РФ ның Дәүләт символлары" дигән темага 1-9 нчы сыйныфларда парламент дәресләре үтә. Әлеге дәресләрне сыйныф җитәкчеләре сыйныф сәгатьләрендә үткәрәләр. Укучылар бик кызыксынып дәүләт символлары һәм аларның тарихын искә төшерәләр

Бүген, чираттагы мәктәпкүләм ата-аналар җыелышы узды. Әлеге җыелышта сүз, 3 нче чирек нәтиҗәләре турында булды. "ФГОС- укытуда яңа стандартлар" дигән методик доклад белән 2 нче сыйныф укытучысы Хәсәнова Ф.Г.чыгыш ясады.  Җыелышта ата-аналарга,  укучыларның иминлеген тәэмин итү, "17 май- балалар ышаныч телефоны көне", IT- чемпион конкурсы, "Посмотри в глаза своему ребенку" акцияләре һәм башка сораулар турында мәгълүматлар җиткерелде.

Бүген, безнең мәктәп базасында,  1999 елгы һәм аннан да яшьрәкләр арасында волейбол ярышларының зона этабы узды. Әлеге ярышларда Иске Чәчкаб, Кайбыч, Кошман мәктәпләреннән килгән командалар катнашты. Нәтиҗәдә, безнең мәктәпнең кызлар командасы да, малайлар командасы да 1 нче урын яулап финалда катнашу мөмкинлеге алды.