Бу юл кырыендагы чүп нишләп шулай тиз үсә микән? Ул укытучыларның бөтенләй дә ял итәселәре килми дип уйлый ахрысы. Менә бүген кабаттан  әлеге чүп белән көрәшеп, кабат тиз генә очрашмаска дип килешеп кайттык.

Лагерь тәмамланды. Бүген лагерьдә тәрбияләнүче 15 бала белән саубуллаштык. Соңгы көн уңаеннан зур бәйрәм- сабантуй оештырдык. Укучылар лагерьдә үткән көннәре турында фикерләрен язып калдырдылар. Шунысы куанычлы- лагерьдә үткән көннәр укучыларга бик ошаган.

Бүген  мәктәбебез канат ярган 4 бөркетен олы юлга озатты. 4 егетебез төп мәктәпне тәмамлап өлгергәнлек аттестаты алды. Әлеге кичәдә әти-әниләр, укытучылар һәм районнан килгән вәкил Гайнуллина Рафия Зөфәр кызы катнашты.  

Бүген безнең укучылар кызыклы сәфәргә чыктылар- Буага күңел ачырга бардылар. Иң элек "Арктика" боз сараенда шугалакта шудылар, аннан соң бассейнга су коенырга бардылар. Әлеге сәфәр укучылар күңелендә озакка сакланыр әле.

Мәктәбебез участогы бик зууур безнең. Нинди генә культура үсми анда. Әмма төп игътибарны әлбәттә бәрәңгегә бирәбез. Аны без күп итеп утыртабыз. Бәрәңге үстерү катлаулы эш булса да, безнең укытучылар сынатмыйлар. Менә бүген дә пыр туздырып икенче кат чүбен утап чыктык. 

Коллективыбыз 35 градуслы эсседә дә тик ятмый. Кыш өчен  терлекләргә азык әзерлибез- яфраказык җыябыз. Чираттагысына бүген бардык. Тиешле норманың яртысын диярлек үтәдек. Җыелган азыкны "Гөбнә" агрофирмасының Иске Чәчкаб филиалына тапшырдык. 

Бүген "Чишмәкәй"дә тәрбияләнүче балалар өчен "Һәрвакыт әзер бул" конкурсы оештырылды.  Әлеге бәйге 7 этаптан торды: "Китап докторы", "Хәрби доктор", "Ребуслар утравы", "Яшь кулинар", "Нәни чәчтараш", "Нәни кулинар", "Музыкаль эрудит". Әлеге конкурста "Дуслык" командасы җиңеп чыкты. Бүген шулай ук ташландык материалларда подделкалар ясау конкурсы үткәрелде. Әлеге конкурста "Йолдызкай" отряды җиңү яулады. Әлеге чараларның һәркайсын Хисамова Резедә Мансур кызы оештырды.

Бүген лагерьдә 22 июнь -Бөек Ватан сугышы башланган көн билгеләп үтелде. Линейкада 1 минутлык тынлык игълан  ителде. Аннан соң укучылар һәйкәлгә һәм сугыш ветераны Хәмидуллин Газулла абый янына очрашуга бардылар.

Лагерьдә төрле түгәрәкләр эшли. Шуларның берсе -"Оста куллар" түгәрәге. Түгәрәк җитәкчесе Булатова Гөлия Алкин кызы белән укучылар оригами сәнгатенә төшенәләр, төрле фигуралар ясыйлар.

Безнең "Чишмәкәй" җәйге сәламәтләндерү лагерендә һәркөнне бер чара планлаштырылган. Балалар әлеге чараларга бик теләп әзерләнәләр һәм җаваплы карыйлар. Бүген бездә "Яфрак бәйрәме" узды. Әлеге чараны тәрбияче Галиуллина Алия Салихҗан кызы оештырды.