Бүген 1 нче класс укучылары өчен зур бәйрәм оештырылды: алар "Карлыгач" сафларына кабул ителде. Укучылар тантаналы вәгъдә бирделәр, алда торган бурычларны барладылар, җырладылар, биеделәр, үзләрен тапкырлыкта сынадылар. 4 класс укучылары яшь "Карлыгач"ларга  бу оешманың билгесен тактылар. Укытучы апалары, педагог-оештыручы яшь карлыгачларны укуда, хезмәттә алдынгы булырга чакырдылар, илебез өчен лаеклы алмаш булып үсәргә кирәклекне белдерделәр.

   Май ае - чәчәкләр ае, матурлык ае.  Иртә яздан көзгә кадәр мәктәп тирәсе шау чәчәктә утыра. Биология укытучысы Э.Р.Ибатуллина укучыларны чәчәкләр үстерү серләренә өйрәтә. Укучылар мәктәптә алган белемне өйләрендә дә кулланалар.  Аларның  да өй тирәләре шау чәчәктә утыра.

  Ш.Мәрҗанинең  тууына 200 ел тулган көннәрдә Ташкичү авылыннан 2 км ераклыктагы "Мәрҗани" чишмәсе төзекләндерелде. Юлчылар шушы чишмә тирәсендә ял итәргә туктый,  шифалы суын эчеп сихәт алалар. Чишмә буен төзекләндерү өчен, өмә оештырдык. Тирә-юнь чистартылды, чәчәкләр утыртылды.

Арча районы мәгариф учреждениеләренең  профсоюз членнары арасында җиңел атлетика буенча ярышлар үтте. Әлеге ярышта безнең мәктәп укытучылары да  актив катнаштылар.

“Хезмәт шатлыгы — үзе үк тәрбия ул! Балалык елларында һәр бала бу хисләрне кичерергә тиеш”. Чыннан да, укучы яз көне үзе утырткан үсенте, орлыклардан көзен мул уңыш жыеп алса, сөенми калмас. Үз кулы белән чәчкән, үзе карап-тәрбияләп үстергән үсемлекләрдән җыеп алынган уңыш — аның хезмәт нәтиҗәсе. Үз хезмәтенең нәтиҗәсен күрү баланың үз көченә ышанычын арттырачак.Нинди генә эш башкармасын, нинди генә шөгыль тапмасын — укучы үз эшенең, шөгыленең файдалы, кирәкле, мактаулы булуын тоярга тиеш.  Буген мәктәбебез укучылары  укытучылар белән бергәләп тәҗрибә участогында тырышып эшләделәр. Түтәлләр әзерләделәр. Яшелчәләр утырттылар.

    Илебездә Бөек Җиңүнең 74 еллыгына багышланган тантаналар башланды. Бүген Ташкичү авылы уртасында сугышта һәлак булганнар истәлегенә багышлап митинг оештырылды. Митингта укучылар, укытучылар, авыл халкы катнашты. Митингта катнашучыларны  Арчамуниципаль районы башкарма комитеты  җитәкчесе урынбасары Р.И.Гарифзянов, Ташкичү ширкәте җитәкчесе Р.Х.Хабибуллин, Ташкичү авыл җирлеге башлыгы Ф.Х.Файзуллин, ветераннар советы рәисе Р.И.Насибуллиналар котлады. Мәктәп укучылары театраьләштерелгән тамаша оештырдылар. Сугышлар булмасын, тыныч көннәрдә яшик!

   Симетбаш башлангыч мәктәбендә Җиңүнең 74 еллыгына багышланган тантаналар башланды. Арча районы хәрби комиссариаты,, Арча зонасы электр элемтәсе үзәге вәкилләре һәм хәрби хезмәткә чакырылучы егетләр белән берлектә һәйкәлгә чәчәкләр салу оештырылды.

   Бөек Җиңүнең 74 еллыгы якынлашкан көннәрдә. илебездә төрле чаралар уза. Бүген мәктәптә "Сугыш чоры балалары" дип аталган кичә узды. Кичә Мәмсә авылында яшәүче Сәрия апа, Ташкичү авылында яшәүче Ваһибә апага багышланды. Сәрия апа да, Ваһибә апа да сугыш башланган көннәрдә 6-7 яшьлек балалар булганнар. Барлык авырлыкларны да татыганнар. Бүгенге көндә алар ялгыз яшиләр. Мәктәп укучылары аларга һәрвакыт ярдәм итеп торалар. Бу кешеләргә багышланган кичәне һәвәскәр тарихчы Ф.Х.Кашшапов әзерләде.

   Авылыбыз уртасында Бөек ватан сугышында һәлак булган якташларыбызга һәйкәл куелган. 6 класс укучылары бу һәйкәлгә шефлык итәләр. Бөек Җиңү якынлашкан көннәрдә башлангыч класс укучылары һәйкәлгә куя торган венокка чәчәкләр әзерләделәр.

    "Кар китте, эш чыкты", - дип эйтелә халык әйтемендә.  Дөрестән дә, бакчада эшләр вакыт җитте. 4 май көнне мәктәптә өмә үткәрелде. Җир эшкәртелде, карлыган аралары йомшартылды. Тиздзн орлыклар чәчәр вакыт җитәр.