Бар күңеллелек бөтен дөньяда, бар бер ямь бүген.

Нәрсәдән бу? — Мин беләм: бәйрәм бүген, бәйрәм бүген!

26 нчы апрель - милләтебезнең йөзек кашы, даны татар дөньясының бөтен кыйтгаларына таралган бөек шагыйребез Габдулла Тукайның туган көне. Бүген мәктәбебездә сөекле шагыйребезнең 130 еллыгына багышланган чараларның чираттагысы - башлангыч сыйныф укучылары һәм балалар бакчасында тәрбияләнүче балалар катнашында шигырь бәйрәме үтте. Балалар Г. Тукайның шигырьләрен сөйләделәр, “Кызыклы шәкерт”, “Эш беткәч, уйнарга ярый”, “Бала белән күбәләк” әсәрләрен сәхнәләштереп күрсәттеләр. Бәйрәм “Туган тел” җыры белән тәмамланды.

…Үзем үлсәм дә, гаҗиз исемем үлмәсен, югалмасын;

Минем тырышлыгым һәм эшләрем бушка китмәсен.

Әгәр милләт мине, илтифат итеп, искә алса,-

Шул минем максатым, теләгем һәм бәхетем.

                                                                             Г.Тукай. 

Тукай иҗаты — татар халкының гаҗәеп зур байлыгы. Ул – балаларның үз шагыйре, аларча сөйләшә, алар дөньясында яши. Бүген 5-8 нче класс укучылары шагыйрьнең шигырьләрен яттан сөйләделәр. Нәтиҗәләр түбәндәгечә: 1 урында 8 нче класс укучылары Минһаҗева Зилә, Садриева Альбина, 2 урында 5 класстан Гайнуллина Зилә, Яруллин Дәниф, 6 класстан Зәйнетдинов Илмир, 3 урында 8 класстан Мөхәмәдиева Алия, 6 класстан Габидуллина Гөлчәчәк.Әлеге конкурста актив катнашкан укучыларга рәхмәт белдерәбез. Афәрин, укучылар!

Син күрмәгән яңа буын килде

Котлап бүген туган көнеңне.

Киләчәккә барган улларыңнан

Ишетәсең “Туган телең”не.

Әйе, бүген һәркем Тукай иҗатын укый, аны өйрәнә, җырларын җырлый, әсәрләренә мөрәҗәгать итә. Г.Тукай үзе дә белем алуны – яңа көн башлану белән тиңли. “Укымак – дөреснең ялганны, яктының караңгыны, турының кәкрене, сафлыкның бозыклыкны җиңүләренә иң үткен, иң кирәкле коралдыр”- дигән Тукай. Мәктәбебез укучылары да Тукай иҗатын чагылдырып, газеталар чыгаралар, буклетлар, презентацияләр ясыйлар.

Бүген мәктәбебезнең егетләр һәм кызлар командасы район беренчелегенә уздырылган волейбол ярышында катнаштылар. "Спортлы Татарстан" акциясенең соңгы көнендә алар безнең мәктәпне тәмамлап, хәзерге вакытта Арчаның икенче номерлы мәктәбендә укучы, Россиянең спорт мастерлыгына кандидат Сәләхова Фәнүзә белән очраштылар.

22 апрель - Җир көне буларак, 8 сыйныф укучылары катнашында “22 апрель-Җирнең туган көне” дигән темага әңгәмә узды. Әңгәмә вакытында түбәндәге темалар каралды:бу көннең килеп чыгу тарихы, җиребезнең кешелек дөньясындагы әһәмияте һәм аның кеше эшчәнлегеннән нинди зыян күрүе (физик,химик), табигатебезне саклау өчен тәкъдим ителгән чаралар (тыюлыклар, заказниклар,милли парклар, Кызыл китап, тирә-юнебезне чистарту максатыннан оештырылган өмәләр, агач утырту). Ахырдан укучыларга экологиядән белемнәрен тикшерү өчен тест тәкъдим ителде һәм шунда ук анализланды.