1 нче класс укучылары инглиз теле түгәрәгендә бик теләп шөгыльләнәләр. Укучылар белән диалогик сөйләм өстендә эш алып барыла. Алар видеоязмалар һәм аудиоязмалар белән танышалар, хәрефләрне укырга һәм язарга өйрәнәләр.

Уку елы мәктәбебез чаңгычылары өчен уңышлы булды.Районда уздырылган барлык чаңгы ярышларында да команда призлы урыннар яулады. Сезон ябылу уңаеннан мәктәптә 1-9 нчы класслар арасында чаңгы буенча эстафета уздырылды. Атналык линейкада  җиңүчеләр билгеләп үтелде.

Бүген 4 нче класс укучылары һәм аларның әниләре катнашында бәйрәм чарасы үтте. Укучылар, якыннарын котлап, шигырьләр сөйләделәр, җырлар, биюләр башкардылар. Әниләр дә төрле кызыклы уеннарда катнашып, күңелләрен күтәрделәр. Үз балаларының кулларыннан ясалган бүләкләрне алу зур шатлык булды.Бәйрәмне Мөхәмәдиева Н.З.оештырды.

Арча шәһәре стадионында чаңгы сезонын ябу уңаеннан марафон булып узган иде. Безнең чаңгычылар бу юлы да сынатмады, мәктәп командасы әлеге ярышта 2 нче урынны яулады. Шәхси беренчелектә дә уңышлар бар. Алар - Галимуллина Илүзә (9 кл.) - 2 урын, Минһаҗева Зилә (8 кл.) - 3 урын, Яруллин Дәниф (5 кл.) - 3 урын. Спортчыларга алга таба да җиңүләр телибез!

Кадерле хатын-кызларыбыз! Сезне язның иң беренче, иң күңелле бәйрәме – Халыкара хатын-кызлар көне – 8 Март белән ихлас күңелебездән тәбрик итәбез! Язгы кояш нурлары һәм сезнең ягымлы елмаюыгыз белән яктыртылган бу көн сезгә бары тик сәламәтлек, бәхет китерсен. Тормышыгыз шатлык белән тулсын, туган һәр яңа көнне елмаеп, зур өметләр белән каршы алыгыз! Күңелегез саф, хисләрегез эчкерсез, хыялларыгыз якты һәм матур булсын.

Авыл яшьләре командалары арасында уздырылучы волейбол ярышы инде традициягә әйләнде дисәк тә була. Бәйрәм уңаеннан алар кабат спортзалга җыелды. 9 команда арасында барган көрәш кичкә кадәр дәвам итте. Командалар составында мәктәп укучылары да катнашты. Нәтиҗәләр түбәндәгечә: 1 урында Арча шәһәренең КСМ командасы, 2 урында - Алан яшьләре командасы,  3 урында -- Ю.Курса авыл яшьләре командасы.