Математика атналыгы уңаеннан 5-9 класс укучылары арасында “Иң пөхтә математика дәфтәре” конкурсы узды. Конкурсның төп максаты - укучыларның дәфтәрләрен чиста, пөхтә йөртүләре иде. Нәтиҗәләр түбәндәгечә: Кызлар арасында: 1 нче урын -Хөснетдинова Инзилә (9 класс), 2 нче урын- Бикбаева Адилә (9 класс), 3 нче урын -Гайнуллина Зилә (8 класс). Егетләр арасында: 1 урын -Шагниев Рамзиль (6 класс), 2 урын -Ахунзянов Айзат (6 класс) 3 урын- Хәмзин Ришат (9 класс).

Мәктәптә Арча сәнгать мәктәбенең филиалы эшли. Шушы көннәрдә баян һәм вокал түгәрәгенә йөрүче  укучылар «Яшь талантлар йолдызлыгы» X Бөтенроссия музыкаль башкаручылар конкурсында катнашып, уңышлар белән кайтты. 5 нче класс укучысы Самат Минһаҗев 1 дәрәҗә, 4 нче класс укучысы Кәрим Закирҗанов ll дәрәҗә (укытучылары Б.Гайнуллин) лауреат исеменә лаек булдылар. Укучыларны һәм аларның укытучыларын зур җиңүләре белән котлыйбыз!

Математика атналыгы уңаеннан бүген 8 класс укучылары белән “Тапкырлаучыны тамыр тамгасы астына кертү” темасына ачык дәрес үткәрелде. (Укытучы – Бохараева Р.И.) Дәреснең максаты - “Тапкырлаучыны тамыр тамгасы астына кертү” темасы буенча белем һәм күнекмәләрне тикшерү. Бурычлары: укучыларның мөстәкыйль, күмәк, төркемнәрдә эшләү, танып - белү күнекмәләрен үстерү; кызыклы мисаллар, эшнең төрле формаларын кулланып алгебра фәненә кызыксыну тәрбияләү; шәхси сыйфатлар формалаштыру; фикерләрне төгәл һәм ачык әйтергә өйрәтү; җаваплылык, тәвәккәллек, игътибарлылык тәрбияләү. Дәрестә презентация кулланылды, укучылар группаларга бүленеп эшләделәр.

Теләге булган hәркем өчен кышкы спорт төре белән шөгыльләнергә зур мөмкинлекләр бар. Безнең мәктәп укучылары чаңгыда йөрүне аеруча үз итә. Мәктәп янында уңайлы итеп салынган чаңгы юлында  алар физкультура дәресләрендә дә, дәресләрдән соң да яратып шөгыльләнәләр.

Бүгеннән мәктәптә математика атналыгы башланды. Укучылар өчен кызыклы биремнәр,мәсьәләләр, шигъри табышмаклар, кызыклы фактлар тәкъдим ителде.

Мәктәптә Яңа ел бәйрәменә әзерлек башланды. 1-9 нчы класс укучылары үз кабинетларын матур итеп бизәп куйдылар. Урамда кардан сыннар ясау эше дә төгәлләнү алдында. Кулдан эшләнгән уенчыклар белән залдагы чыршы да бизәлде.