30 нчы декабрь көнне, Лесхоз урта мәктәбендә, Арча муниципаль районы мәгариф учреждениеләренең беренчел профсоюз оешмалары арасында, зональ шашка ярышлары узды. Безнең мәктәбебездән башлангыч сыйныф укытучысы Р.Ә. Ибраһимова 1 нче урын, газоператор Р.Г. Сабирҗанов 2 нче урыннарга лаек булдылар.

    6 нчы гыйнвар көнне шушы ук ярышларның район этабында Р.Ә. Ибраһимова 3 нче урынны яулады. Шушы нәтиҗәләр буенча шашка уенында мәктәп командабыз районда беренче урында. Афәрин, хезмәттәшләребез, җиңүләрегез белән котлыйбыз! Эшегездә зур уңышлар!

   Менә үзенең борчу-мәшәкатьләре, шатлык-куанычлары белән тагын бер ел үтеп китте. Аның урынына тагын да күбрәк бәхет-шатлыклары, күңелле эшләре белән Яңа ел  аяк баса...
    Каршылыйк, дуслар, бергәләп,
    Яңа ел килә безгә.
    Әнә күпме кунак килгән
    Әйләнә-тирәбезгә.
    Иң лаеклы укучыларыбыз район башлыгы, республикабыз президенты чыршы бәйрәмнәрендә булып кайтканнар иде инде. Менә мәктәбебездә дә Яңа ел бәйрәме узды. Кыш бабай, Кар кызы, Яңа ел килде. Бәйрәмебез җыр-бию, уен-көлке белән аралашып барды. Килгән кунаклар да укучыларыбыз чыгышын бик җылы кабул итте. Һәркемгә исәнлек, саулык, бәхет-шатлык телибез! Еллар имин, дөньялар тыныч булсын!

    Узган шимбәдә Арча шәһәре спорт комплексында Гайнуллин Илгиз Ильяс улы истәлегенә ачык бадминтон ярышы үткәрелде. Анда безнең мәктәп командабыз да уңышлы чыгыш ясады.... Гайнуллин Илгиз Ильяс улы күп еллар безнең мәктәбебездә директор булып эшләде. 2017нче елдан Утар-Аты авыл җирлеге башлыгы вазифасын башкарды. 2018нче елны вакытсыз вафат булды. Аның якты истәлеге күңелләребездә мәңге сакланыр...

    Яңа ел бәйрәмен каршы алуга әзерлек эшләре дәвам итә. Ә Яңа елны каршылау кайчаннан башланып киткән соң? Кыш бабай, Кар кызы кайчан барлыкка килгән? Бүген без укучыларыбыз белән тарих битләренә күз салдык. Башка илләрдә Яңа ел бәйрәмнәрен ничек бәйрәм итүләре, аларга Кыш бабайның нинди коллегалары килүе, бүләк бирүе белән таныштык. “Кыш бабай” һәм “Кар кызы” командаларына бүленеп, кроссворд чиштек. Яңа елны күңелле итеп каршы алыйк!

    Яңа елга аяк басарга санаулы көннәр калып бара. Яңа ел укучылар өчен үзенең бизәкләре, традиция-йолалары белән бик якын. Шуңа күрә, мәктәбебез укучылары бу көннәрдә, укудан тыш, күңелле мәшәкатьләр белән кайный. Һәр класс тырышып сыйныф бүлмәләрен бизи, концерт номерлары, спектакльләр өйрәнәләр, мәктәпнең төп чыршысын бизиләр, яңа ел кичәсенә бик тырышып әзерләнәләр...

    Мәктәбебездә Ил батырлары көненә карата укучылар арасында зур күләмле рәсем конкурсы уздырылды. Бу бәйгедә 1-4 сыйныф укучылары бик теләп катнаштылар. Иң уңышлы дип табылган эшләр районга җибәрелде. 3 нче сыйныф укучысы Шерматова Камилә II дәрәҗә мактау грамотасы, 2 нче сыйныф укучысы Мөбәрәков Данис Рәхмәт хаты белән бүләкләнде. Укучыларга истәлекле бүләкләр тапшырылды.

    Урокцифры.рф сайты материаллары нигезендә мәктәпкүләм "Санлы дәрес - Урок цифры" үтте. "Сети и облачные технологии" темасы буенча үткән дәрестә челтәрләр, аларның төзелеше, интернетта материалларны саклау юллары турында күп информация алынды. Әлеге технологияләр белән шөгыльләнүче профессияләр белән дә тирәнтен таныштык.

    12 декабрьдә Россия Федерациясенең күпмилләтле халкы илебез тарихында иң мөһим дәүләт бәйрәмнәренең берсе - Конституция көнен билгеләп үтә.
    Илебезнең әлеге Төп Законы Россияне демократик, хокукый федератив дәүләт дип игълан итте, гражданлык җәмгыятенең асыл кыйммәтләрен - шәхес хокукларын һәм ирекләрен хөрмәт итүне, халыкларның тигез хокуклылыгын раслады.
    Бүген без дә, укучылар белән, мәктәбебездә Конституция көнен билгеләп үттек. Конституция нәрсә ул? Аның тарихын беләбезме? Конституциядә нәрсәләр язылган? Шушы сорауларга җаваплар эзләдек. Дәүләт символлары турындагы белемнәребезне ныгыттык.
    Илебезне көчле һәм алга киткән дәүләт итү өчен һәммәбездән күп хезмәт, бердәм тырышлык сорала. Ватаныбыз алдындагы изге бурычны үтәүдә барыбызга да уңышлар юлдаш булсын.

    Авырлыкны җиңәр өчен көч кирәк,
    Ә кешегә һәрчак җылы сүз кирәк.
    Бер назлы сүз мең дарудан көчлерәк,
    Назлы сүзгә һәркем мохтаҗ.
    Бүген укучылар белән тәрбия сәгатендә инвалидлар турында сөйләштек. Халкыбызда әүвәл-әүвәлдән ятимнәргә, кулы-аягы гарипләргә, язмыш кимсеткән, табигать кыерсыткан кешеләргә аерым бер гадәт яшәп килгән. Аларны кызганганнар, хәлләренә кергәннәр, кулларыннан килгәнчә аларга ярдәм итәргә тырышканнар. Аларга карап: “Биргәненә шөкер, акылым тулы, зиһенем бөтен”,-дигәннәр, гыйбрәт алганнар, тәүбә иткәннәр. Мондый кешеләргә шәфкатьле булганнар. Бүгенге авыр заманда шәфкатьле булу бигрәк тә кирәк. Ана назын, ата сөюен күрмәгән күпме сабый, ятим бар. Инвалидлар, картлар йортлары күбәю дә безгә, яшь буынга, шул турыда чаң суга. Шәфкатьле булу – барлык күркәм гадәтләрнең башы, әдәплелекнең нигезе дип әйтсәм, минем белән килешерсез, дип уйлыйм. Чөнки бары тик шәфкатьле бала гына күркәм гадәтләргә ия, бәхетле, тәүфыйклы, мәрхәмәтле, кешелекле була ала.

    Һәрнәрсәнең файдалы һәм зыянлы ягы булган кебек, интернетның да файдасы һәм зыяны бар.
    Файдалы якларын санап китсәк, өстәмә белем алырга ярдәм итә, утырган җирдән генә интернеттан кирәкле мәгълүматны тиз эзләп табарга мөмкин, интернет аша туганнар, дуслар белән аралашабыз, объектның кайда урнашуын, анда ничек барасын тиз эзләп табарга мөмкин, документация эшен компьютерда башкарабыз, түләүләр интернет аша башкарыла. Чамасын белеп кулланганда интернетның ярдәме зур.
    Көн белән төнне бутап компьютер каршысында утыру-реаль тормыш белән виртуаль тормыш арасында бер адым.
    Бүген без дә, «Интернет куркынычсызлыгы» акциясе кысаларында, “Балалар өчен куркынычсыз Интернет” дигән фильм карадык. Укучылар Митясик белән Интерняшканың мавыктыргыч хәлләрен карап, интернетның файдасы, дөрес итеп куллану турында куп мәгълүмат алдылар. Интернет куллануда 7 кагыйдә белән таныштылар.