20 нче апрельдән 27 апрельгә кадәр мәктәптә "Язгы изгелек" атналыгы үтә. Һәр көн укучылар белән төрле чаралар оештырыла. . Шундыйлардан "Дуслык" көне,  ""Изге сүзләр" көне уңышлы үтте. Башлангыч класс укучылары белән дуслык эстафетасы үткәрелде. Китапханәче Сәгъдиева Х.К. "Әдәбият" елы уңаеннан, әдәби китаплар укуга кызыксыну тудыру максатында ,  информацион-белешмә сәгате алып барды Бүген без 6 нчы класс укучылары белән Түбән Мәтәскә авылындагы һәйкәлне җыештыруда катнаштык. 

Озак еллар Арчада яшәгән, 1958-1974 елларда Арча район хәрби комиссары булып эшләгән  подполковник Иван Федорович Христофоровның якыннары янында тарих укытучысы Якупова Хәнифә Зиннәтовна булып кайтты. Гаилә архивында сакланган истәлекләр белән килене Христофорова Вера Сергеевна уртаклашты . Шул турыда Хәнифә Зиннәтовна 5 нче класс укучыларына 22  нче апрель көнне  тәрбия сәгате күрсәтте.  

   Якташыбыз И.В.Христофоров сугышның беренче көннәреннән алып ахырына кадәр фронт разведчигы, укчы диңгез бригадасы разведка начальнигы дәрәҗәсенә күтәрелә... Карелия, Ленинград фронтларында катнаша. Әлеге язма белән безнең мәктәп сайтына  урнаштырылган материал аркылы танышырга мөмкин.

  Бүген, 21 нче апрель көнне, Түбән Мәтәскә урта мәктәбенең  1 нче сыйныф укучылары  беренче җиңүләрен  бәйрәм иттеләр.  Хәрефләр белән танышу, сүзләр төзү җиңел булмады. Әмма алар  тырышып белем алдылар : укырга, язарга, матур итеп сөйләшергә, мисал-мәсьәләләр чишәргә, әдәпле булырга, өлкәннәрне һәм кечкенәләрне хөрмәт итәргә, акыллы, тәртипле булырга өйрәнделәр. Аларны чын күңелдән  котлыйбыз!  Тагын шундый бик күп, бик күп хезмәт уңышларын бәйрәм итәргә насыйп булсын аларга. Бәйрәмне 1 нче сыйныф укытучысы Сабирова Рәмзия Галәү кызы хәзерләде. Бәйрәмдә балалар бакчасының әзерлек төркеменә йөрүчеләр дә катнашты

Укучыларны районыбызда урнашкан уку йортларының эшчәнлеге белән таныштыруга зур әһәмият бирелә. Мәктәпкә Үрнәктә урнашкан Агропромышленность колледжы укытучы-мастерлары килде. Алар 9 нчы класс укучылары белән сөйләшү оештырдылар.Сөйләшү барышында белгечләр уку йорты тарихына тукталдылар, уку шартлары белән таныштырдылар.Сөйләшү ахырында белгечләр уку йорты турында төзелгән буклетлар тараттылар, укучыларны 16 нчы майда оештырылачак "Ачык ишекләр" көненә чакырып калдылар.

13 нче апрельдән 18 нче апрельгә кадәр мәктәптә "Балалар китабы" атналыгы үтте. Барлык чаралар укучыларның яшь үзенчәлекләрен исәпкә алып уздырылды. Атналыкны үткәрүдә китапханәче Сәгъдиева Халисә Камилевна активлык күрсәтте.Укучылар "Табышмак әйтәм-тап", "Әкият геройлары бездә кунакта", "Китап - белем чишмәсе", "Изгелек җирдә ятмый", "Тукай-шагыйрьләр солтаны" кебек чараларда теләп катнаштылар. Башлангыч сыйныфта эшләүче класс җитәкчеләре Тукай  шигырьләрен сәнгатьле укытуга, сәхнәләштерүгә игътибар иттеләр.

   17 апрель көнне “Казан арты” тарих-этнография музее сөекле шагыйребез Габдулла Тукай иҗатын сөючеләрне үзенә җыйды.  “Моңлы сазым” дип аталган  кичәгә Арча районы мәктәпләреннән җыелган укучылар Тукай иҗатын хөрмәт итүләрен тагын бер кабат исбатладылар. Укучылар төрле номинацияләрдә чыгыш ясадылар.  Тукай шигырьләрен сәнгатьле укучы, аның шигырьләренә язылган җырларны башкаручы һәм Тукайга багышлап язган шигырьләрен сөйләүчеләр үзләренең осталыкларын күрсәттеләр. Безнең мәктәпнең 8 класс  укучысы Гаффарова Әнисә ( җитәкчесе Йосыпова Р.К.) үзе язган “Тукайга илтә уйларым” шигыре белән катнашып,  дипломга лаек булды. Кичәне оештыручылар һәр катнашучыга рәхмәт белдерде һәм бу җыр-моң бәйрәме киләчәктә дә дәвам итәр, Тукай иҗатын яратучылар кимемәс дигән өметтә калдылар.

10 нчы апрельдән 30 нчы апрельгә кадәр 4 нче класс укучыларының белем нәтиҗәләрен тикшерү буенча мониторинг үткәрелә. Бүген укучылар метапредмет эшчәнлек формалаштыруны бәяләү буенча проект эше башкаралар. Проект эше төркемнәрдә оештырыла.

   Татарстан Республикасы мәгариф һәм фән министрлыгы һәм  Татарстан Республикасы язучылар берлеге  яшь язучылар иҗатын барлау буенча күп эш башкара. 15 нче апрель көнне Казан шәһәре Пирамида күңел ачу үзәгендә “Илһам” бөтенроссия яшь язучылар бәйгесе үткәрелде. Бу бәйгенең йомгаклау турында безнең районнан 7 укучыга катнашу бәхете тиде. Җиңүчеләрне бүләкләүдә  Татартан Республикасы мәгариф һәм фән министры Э.Н.Фәттахов, язучылар берлеге рәисе Р.Х.Корбанов һәм башка бик күп мәртәбәле шәхесләр катнашты. Җиңүчеләрне котлап, “Казан” бию ансамбле Г.Камал исемендәге Академия театры артистлары һәм башка сәхнә йолдызлары чыгыш ясады. Безнең мәктәп укучылары Гаффарова Әнисә һәм Арсаева Чулпан  җиңүче дипломына ия булдылар. Гаффарова Әнисә бү бәйгедә “Җиңү язы килде җиргә”, Арсаева Чулпан “Көтеп алынган Җиңү” шигырьләрен тәкъдим иттеләр. Укучыларның  әсәрләре ” Илһам” альманахында урын алды. Әдәбиятка, сәнгатькә гашыйк укучыларыбызның республикада үз иҗатлары белән чыгыш ясаулары  беренче генә тапкыр булмаса да, бу көн аларда иҗатка тагын да зуррак омтылышлар уяткан. Илһам чишмәләрегез саекмасын. Афәрин, кызлар!