Җир йөзендә иң матур сүз - Әни. Ул һәркем әйтә торган тәүге сүз һәм дөньядагы барлык телләрдә дә бердәй яңгырый.

Аналарның канатлары кайрылмасын, тормыш авырлыкларыннан иңнәре сыгылмасын! Изге бәйрәм уңаеннан барлык әниләрне бәйрәм белән котлыйбыз. Сезгә ныклы сәламәтлек, озын гомер, гаилә иминлеге, җан тынычлыгы телибез.

Изге бәйрәмегез белән!

12 ноябрьдә укучыларыбыз "Алга" колхозы үткәргән татарча көрәшкә бардылар. Монда да безнең укучыларыбыз сынатмады. "Көрәш" командасы, җитәкчеләре Яруллин Илнар Наил улы, "Алга" колхозы призына үткәрелгән татарча көрәштә 2 нче урынны яуладылар. Афәрин егетләр! Алда да уңышлар сезгә. 

8 нче ноябрьдә районда шахмат ярышы булып узды. Безнең мәктәптән ике укучы катнашты һәм икесе дә җиңү белән кайтты. Алар: 9 сыйныф укучысы Кадиров Нияз - 3 урын, 11 сыйныф укучысы Шамсетдинов Салават - 2 урын. Егетләр, алда да уңышлар телибез сезгә. 

5 ноябрьдә Зур Тигәнәле 350 еллыгын билгеләп үтте. Авыл тарихы әле 17 нче гасырда ук башлана. Аксакаллар сүзләренә караганда, аңа Сәед Тигәнәев исемле кеше нигез салган. Аның ике ир туганы булган, алар өйләнгәннән соң күрше авыллар - Урта һәм Түбән Тигәнәлегә нигез салганнар. Шуңа күрә авыл исеме Тигәнәев фамилиясеннән килеп чыккан. Авылның тууы турында башка риваятьләр дә яшәп килә. Мәсәлән, авыл тарихында мондый мәгълүматлар бар: 1661 елның 5 августында 33 йомышлы татар Уразгильдин Яковлев җитәкчелегендә Тигәнәле елгасы буйлап күчә. Бу көн Зур Тигәләле авылының туган көненә әйләнә дә инде.

350 еллык тарихы булган авыл яшәсен! 

Аксубайда узган билбау көрәшендә укучыларыбыз җиңү белән кайтты. Алар 9 сыйныф укучылары Кадиров Нияз һәм Халилов Рүзәл. Сезне чын күңелдән җиңү белән котлыйбыз, алда да уңышлар телибез.

26 октябрьдә АСОШ № 1 кызлар арасында мәктәпнең футбол лигасы чемпионаты булып узды. 7 команда арасында булган ярышта кызларыбыз 4 нче урынны яуладылар. Алда да сезгә уңышлар телибез.

25 октябрьдә АСОШ №1 егетләр арасында мәктәпнең футбол лигасы чемпионаты булып узды. Анда 16 команда катнашты. Безнең укучылар 4 нче урынны яулап кайттылар. Алда да уңышлар сезгә, егетләр!

Елның сихри фасылында - көз аенда татар халкы "Сөмбелә" бәйрәмен уздырган. Шимбә көнне мәктәптә халкыбызның онытыла башлаган матур бәйрәмен яңарту тантанасына җыелдык. Бу бәйрәмгә укучыларыбыз канатланып, бик тырышып әзерләнделәр. Әзерләнүләренең җимеше - бәйрәм уңышлы узды, килгән кунаклар да бик канәгать булып таралыштылар.  

Безнең Рифатыбыз (4 сыйныф укучысы) республикакүләм зона ярышында 2 нче урынны алып республикага чыкты. Рифат сиңа уңышлар телибез.