Моннан бер ел элек Татарстан Республикасында Укытучы елы кысаларында моңарчы тиңнәр булмаган, амбиоз "Укытучы елында - һәр укытучыга ноутбук" дигән проект старт алган иде. Аңлашыла ки, проект буенча республика мәктәпләрендә эшләүче һәр укытучыга ноутбук бирелергә тиеш.

Бүгенге көн шартларында яңа технологияләр, мәгълүматлаштыру чараларын кулланмыйча гына мөгаллим үз өстенә йөкләгән бурычларны тиешенчә үти алмый, дип саный Хөкүмәт башлыгы. "Без шуны аңларга тиеш: компьютер сыйныфлары булу гына җитми, эш инструменты буларак һәр укытучыда шәхси ноутбук та булырга тиеш. Быелдан әлеге программаны тормышка ашыру эшен башлыйбыз ",- дип ассызыклаган иде Рөстәм Миннеханов.

Президентыбыз сүзендә торды. Безнең мәктәп укытучыларына да һәрберсенә ноутбук кайтты. Мәктәп директоры тантаналы рәвештә укытучыларга ноутбук тапшырды.

24 майда мәктәптә иң тантаналы һәм истәлекле көннәрнең берсе "Соңгы кыңгырау" бәйрәме булып узды. Бу көнне чыгарылыш сыйныф укучылары өчен соңгы кыңгырау яңгырады.

Соңгы кыңгырау ул, урта мәктәпне тәмамлап, зур тормышка, олы юлга атлаучы егет һәм кызларның алдагы көннәренең гаҗәеп матур да, тыңгысыз да, соклангыч һәм авыр да булачагын искәртеп тора кебек. Соңгы кыңгырау чыңы чыгарылыш укучыларының кадерле укытучылары белән хушлашу авазы.

Бүген, Зур Тигәнәле урта мәктәбендә соңгы кыңгырау 7 укучы өчен соңгы тапкыр шалтырады, 11 ел тырышып белем нигезләрен үзләштергәннән соң, 7 укучы мәктәптән китә. Чыгарылыш сыйныф укучыларына алда уңышлар телибез. Кем генә булсагыз да, кеше булып калыгыз!

        5 сыйныф укучысы Ахметзянов Алмаз Салаватович "Зирәк тиен" Бөтенроссия уен-бәйгесендә татар мәктәпләрендә укучы балалар арасында III урынга лаек булды. Алмазыбыз Татарстан Республикасы мәгариф һәм фән министрлыгы тарафыннан Диплом һәм кыйммәтле бүләк - портфель белән бүләкләнде. Афәрин, Алмаз! Сиңа алда да уңышлар телибез.

19-20 майда Казанда "Иң яхшы вожатый" дип аталган республикакүләм конкурс булып узды. Безнең мәктәптән 9 сыйныф укучысы Сибатова Алсу катнашты һәм "Самый яркий вожатый" номинациясендә җиңү яулады. Алсуга һәм җитәкчесе Гөлфия Нургаен кызына алда да уңышлар телибез.

2011 елның 17 маенда ИЭУП бинасында "Music Battle-2011" исемле республика чит ил җыры конкурсы булып үтте. Конкурста 8 класс укучылары Сәйфетдинова Энҗе белән Халилов Рәфис “Die Sonne”җыры белән катнашты һәм уңышлы чыгыш ясады. Алда да укучылар сезгә һәм җитәкчегез Фәния Әхәт кызына уңышлар телибез.

Безнең укучылар авылны яшелләндерүдә катнаша.

9 май көнне һәйкәл янында митинг булып узды. 5-8 сыйныф укучылары көче белән әзерләнгән бәйрәм Бөек Җиңүнең 66 ел уңаеннан тыл фидакарьләренең һәм сугыш ветераннарының батырлыгына багышланды.

        1941-1945 еллар тарих битләренә канлы хәрефләр белән уелган. Бөек Ватан сугышы. Аяусыз бәрелешләр, киселгән гомерләр, ятимнәрнең ачы күз яшьләре. 27 миллион ватандашыбызның вакытсыз гомере өзелгән, күпмесе гарипләнеп кайткан, хәбәрсез югалган, ә күпме ир-егет фашист концлагерьларында газапланган, үтерелгән. Шулар бәрабәренә Бөек Җиңү яуланган. Безнең ул көннәрне онытырга хакыбыз юк.

Безнең мәктәптән  Бөек Җиңүнең 66 ел тулу уңаеннан мини - марафонда 6 сыйныф укучысы Каримов Рәфис, 9 сыйныф укучылары - Вальщиков Салават һәм Фаракшин Ильназ катнаштылар. Каримов Рәфис 2 километр ераклыкка йөгереп, 2 урынны яулап кайтты.

Бөек Җиңүнең 66 еллыгына багышланган, Алексеевск муниципаль районының оешмалары һәм предприятияләре арасында III Спартакиада кысаларында уздырылган җиңел атлетика эстафетасында 4 укытучы катнашты: Байрамова Ф.К., Галимов И.Н., Халилова Ф.З, Яруллин И.Н.

Бүген 1 сыйныф укучыларының "Әлифба" бәйрәме булып узды. Укучылар әти-әниләренә укый-яза белүләрен һәм башка күп төрле һөнәрләрен күрсәттеләр. Бәйрәм слайд-шоу белән кызыклы итеп оештырылган иде. Римма Дамир кызына һәм укучыларга уңышлар телибез.