20.12.2011. 

“Мин – бала ! Мин – гражданин !” темасына 11 нче сыйныф укучысы Рәхимова Ләйсән язган эссе район күләмендә 1 нче урын алды. Аның эше республикага узды. Ләйсән тагын биредә, җиңү яулады – республика күләмендә 3 нче урын алып, Диплом һәм истәлекле бүләкләр  белән бүләкләнде (укытучысы Харисова Г.М.) ТР Югары Советына тантанага чакырылды.

Республика җитәкчеләре чыгышы, экскурсия, концерт  һ.б. тантаналар күңелләрдә матур мизгелләр булып калыр.

Уңышлар телибез !

16, 17 декабрь  көннәрендә 9нчы сыйныф укучылары рус теле һәм математика фәннәреннән үзләренең белемнәрен сынадылар. Әле сынаулар алда да булачак, уңышлар сезгә, укучылар!

12-17 декабрьга кадәр мәктәп күләмендә хокук фәне атналыгы игълан ителде. Атналык уңаеннан укучылар “Кеше хокуклары” буенча рәсемнәр, иншалар, викториналар конкурсында катнаштылар. 16 декабрь көнне тарих һәм җәмгыять белеме укытучысы Марданова С.Х.  “Син һәм синең хокукларың” дигән темага 5-7 классларда тәрбия чарасы үткәрде. 

17  нче  декабрь көнне 3 нче сыйныфта  “Һәйкәл булып кайтты исемнәр ”  темасына тәрбия сәгате үтте. Укытучы Дәүләтова Гөлнара  укучыларга якташ геройларыбыз , авылыбыз  ветераннары турында сөйләде.

17.12.2011 көнне 4 нче сыйныфта “Каләмне корал итеп...” темасына тәрбия сәгате үткәрелде. Тәрбия сәгатендә татар халкының бөек улы  герой шагыйрь Муса Җәлилнең Ватан сугышы чорында күрсәткән тиңдәшсез батырлыгы турында әңгәмә алып барылды. Тәкъдим ителгән презентация укучыларда зур кызыксыну уятты.

Татар теле һәм әдәбияты укытучысы Мухаметханова Г.М. Уфада VI  Халыкара фәнни – практик   конференциядә катнашты һәм чыгыш ясады.  640 катнашучыны үз эченә алган әлеге конференция Мифтахетдин Акмулланың тууына 180 ел тулуга багышланды.

   М.Акмулла исемендәге Башкорт дәүләт педагогия университетында ясалган чыгыш җыентыкка кертелде. “Башкортстан укытучысы”  журналы аша башкорт укытучылары өчен дә    эш тәҗрибәсе таратылачак.

    Уңышлар Сезгә!

16 декабрь көнне 1 һәм 2 нче сыйныф укучылары катнашында
 “Батырлар даны мәңгелек” темасы астында тәрбия сәгате үтте. Укучылар герой пионерлар һәм алар эшләгән батырлыклар белән таныштылар. Тәрбия сәгате “Җирдә беркайчан да сугыш булмасын!”-дигән нәтиҗә ясап тәмамланды.

14.12.2011. Мөхәмәтханова Г.М.  8 нче сыйныф укучылары белән “Батырларга мәңгелек дан!”  темасына класс сәгате уздырды. Анда “Хәтер” китабы белән таныштылар. Районнан чыккан сугыш геройлары турында чыгыш ясадылар.

14 декабрь көнне тугызынчы сыйныфта “Якташ батырларның даны мәңгелек” дигән темага тәрбия сәгате үтте. Хәбибуллин З.Х., Баширов И.С., Закиров Г.З., Хаҗиев В.Х. батырлыгы турында сөйләнелде, алар белән бәйле истәлекләр яңартылды , фотографияләр каралды. Районыбызның Советлар Союзы Геройларын 1 минутлык тынлык белән искә алдык.

13 декабрь көнне 8 нче сыйныфта рус теле һәм әдәбияты укытучысы белән берлектә бөек рус шагыйре Н.А. Некрасовның тууына 190 ел тулу уңаеннан “Я лиру посвятил народу своему...” дигән кичә үткәрелде. Укучылар тарафыннан Н.А.Некрасовның шигырьләре сөйләнелде.