05.01.2012 көнне  "Кояшкай" ял лагеренда ял итүчеләр хореография түгәрәгендә төрле биюләр өйрәнделәр, бию сәнгате серләренә төшенделәр. Ә "Иман дәресләре" вакытында Фидаил хәзрәт балаларга үгет - нәсихәт бирде. Балалар йотлыгып тыңладылар.

05.01.2011 көнне 13.00 сәгатьтә 9 – 11  нче сыйныфлар өчен  “Серле Яңа ел киче” дип аталган Яңа ел тамашасы булып узды. Тамаша барышында укучылар төрле илләрдә Яңа ел бәйрәмен ничек каршылаулары турында презентация күрсәттеләр, төрле телләрдә җырлар башкарылды.  Иң эчтәлекле газета, иң матур бизәлгән кабинет ишеге билгеләнде. Укучыларны Кыш бабай белән Кар кызы бәйрәм белән котлады. Бәйрәм күңелле биюләр белән тәмамланды.

04.01.2012 көнне башлангыч сыйныфлар өчен көтеп алынган Яңа ел тамашасы булып узды. Әлеге тамашага укучылар ныклы әзерләнделәр. Кемнәрдер Кыш бабай өчен шигырь ятлады, яңа җырлар өйрәнде, маскалар әзерләде, рәсемнәр ясады. Иң күңеллесе балалар өчен Кыш бабайдан бүләк алу булды. Ә Кыш бабайның бүләкләре быел мулдан иде. Укучылар чын артистларча "Сихерле син, Яңа ел !" тамашасын уйнадылар. Бәйрәмгә килгән әти - әниләр, әби - бабайлар бик канәгать калдылар. Тамашаны әзерләгән өчен сыйныф җитәкчеләренә зур рәхмәт !

04.01.2012 көнне 12.00 сәгатьтә 5 - 8 нче сыйныфлар өчен Яңа ел тамашасы булып узды. Әлеге бәйрәм тамашасы түбәндәге программа нигезендә узды:

1. Сәхнәләштерелгән тамаша;

2. Кыш бабай һәм Кар кызының котлаулары;

3. Маскалар парады;

4. Концерт номерларына конкурслар;

5. Җырлы - биюле уеннар.

  Бәйрәм тамашасы күтәренке рухта үтте !  Тамашаны әзерләгән сыйныф җитәкчеләренә мәктәп дирекциясе зур рәхмәт белдерә.

04.01-10.01.2012 кадәр мәктәп яны "Кояшкай" ял лагеренда 20 укучы ял итә. Бүген - лагерьның беренче көне. Лагерьда укучылар күңелле ял иттеләр. Яңа ел тамашасын карадылар, Кыш бабай һәм Кар кызыннан бүләкләр алдылар. Лагерь эшчәнлеге шушындый рухта дәвам итәчәк !

03.01.2012 көнне 9 нчы сыйныф укучылары "Нарат" Боз Сараенда экскурсиядә булдылар. Укучылар ике сәгать дәвамында тимеракларда шудылар, сәламәтлекләрен ныгыттылар. Әлеге экскурсиядән каникул буена җитәрлек көч һәм күңел күтәренкеле алып кайттылар.

31.12.2011 көнне мәктәптә Профсоюз елкасы гөрләп үтте. Елкага ветеран укытучылар, мәктәп хезмәткәрләре, ясле - бакча хезмәткәрләре һәм аларның балалары чакырылды. Бәйрәм тамашасы Кыш бабай һәм Кар кызының котлаулары, күңелле уеннар, җыр - биюләр белән үрелеп барды. Бәйрәмнән барлык кунаклар канәгать калдылар.

31.12.2011 - 14.01.2011 кадәр укучылар өчен кышкы каникуллар башланды.  Укучылар каникул вакытында вакытларын файдалы үткәрергә җыена. 20 укучы мәктәп яны "Кояшкай" лагеренда ял итәчәк,  9, 11 нче сыйныф укучылары консультацияләргә йөриячәк, Яңа ел тамашаларында катнашачаклар. Каникулларыгыз күңелле үтсен !

   Ш.З.Зиннуров исемендәге Сатыш урта гомуми белем бирү мәктәбе укытучылары Рахимов Р.М. һәм Мухаметханова Г.М. “Татарстан Республикасының иң яхшы укытучысы” конкурсында җиңү яуладылар. Алар грантка лаек булдылар. 

  Ш.З.Зиннуров исемендәге Сатыш урта гомуми белем бирү мәктәбе коллективы Сезне якынлашып килүче  Яңа 2012 нче  ел белән тәбрик итә. Сезгә ныклы сәламәтлек, озын  гомер, балалар тәрбияләүдә зурдан – зур уңышлар тели.

Яңа еллар килсен бәхет алып,

Яңа еллар килсен елмаеп.

Күңелегездә һәрчак шатлык булсын,

Яшәмәгез һич тә моңаеп.