Бүген мәктәбебездә 8 март - Халыкара хатын-кызлар көне уңаеннан "Иң-иң яратканнарыбыз!" дип аталган бәйрәм кичәсе үткәрелде. Әлеге бәйрәм укучылар көче белән әзерләнде. Балалар үзләренең яраткан әниләренә, әбиләренә, укытучы апаларына, укучы кызларга һәм мәктәп хезмәткәрләренә багышлап матур шигъри юллар җиткерделәр, җырлар һәм биюләр башкардылар, килгән кунаклар - әниләр белән уеннар оештырылды. Бәйрәм ахырында һәр укучы әниләренә үз куллары белән ясаган бүләкләрен тапшырды.

Бүген иртәнге линейка вакытында "Тамчы-шоу" интеллектуаль уенында катнашып, җиңүгә ирешкән укучыларыбызга һәм аларны бу уенга әзерләгән укытучыларга грамота һәм дипломнар тапшырылды. Әлеге уңышлары белән чын күңелдән котлыйбыз!

Бүген мәктәбебезнең иң-иң булган укучылары: 6 нчы сыйныфтан Сабиров С., 7 нче сыйныфтан Саттаров А. һәм 8 нче сыйныфтан Әхмәтшина А. "Йолдызлар" командасы исеме астында Казан шәһәрендә ТНВ каналында үткән "Тамчы-шоу" интеллектуаль уенында катнаштылар. Катнаштылар гына түгел, ә зур уңышка - җиңүгә ирештеләр! Саба районы Шекше мәктәбеннән килгән "Ялкын" командасы белән барган уенда 3 балл өстенлек белән (34:31) беренчелеккә чыктылар! Без аларны әлеге җиңхләре белән ихластан котлыйбыз! Афәрин, укучылар!

Мәктәбебезнең 8 нче сыйныф укучысы Садриев С. һәм 9 нчы сыйныф укучысы Мотыйгуллин Б. 2-4 март көннәрендә Казан шәһәрендә үтүче йөзү буенча ярышларда уңышлы катнашып кайттылар. Аларга киләсе ярышларда да зур уңышлар теләп калабыз!

Бүген 9 нчы сыйныф укучылары мәктәп кысаларында биология фәне буенча сынап карау имтиханын башкардылар.

Тиздән язның матур бәйрәме - 8 март, Халыкара хатын-кызлар көне булачак. Шул уңайдан укучыларыбыз сыйныф җитәкчеләре белән берлектә үз тормышларын мәктәп һәм балалар бакчасында эшләүгә багышлаган, хәзерге көндә лаеклы ялда булган укытучы апаларына һәм тәрбиячеләргә үз куллары белән ясаган "бүләкләр" әзерлиләр.

Бүген мәктәбебез укучылары "Созвездие - Йолдызлык - 2017" фестиваленең муниципаль этабында чыгыш ясадылар. Әлеге фестивальдә 3 һәм 5 нче сыйныф укучылары Бурганова Т., Миңнуллина И., Гиниятуллина А., Сираҗиева Г., Насретдинова А. "Хореография" номинациясендә, 7 нче сыйныфтан Гирфанова Л. һәм Гарипов Р., шулай ук 5 нче сыйныфтан Насретдинов А. "Конферанс" номинациясендә катнаштылар. Гирфанова Л. һәм Гарипов Р. алдагы турга үттеләр. Киләсе бәйгедә аларга уңышлар телибез!

Кичә иртәнге линейка вакытында Халыкара туган тел көне уңаеннан мәктәп күләмендә үткәрелгән "Туган телем - иркә гөлем" исемле шигырь бәйгесендә җиңү яулаган укучыларыбызга грамоталар тапшырылды. Алар: 5 нче сыйныфтан Хәйретдинова Л., Насретдинов А., 7 нче сыйныфтан Насретдинова И. Аларны чын күңелдән котлыйбыз!

Бүген мәктәбебезнең 8 нче сыйныф укучылары  Әфганстан сугышында катнашкан авылдашыбыз Хәмидуллин Р.Р. белән очраштылар. Кошман авылы китапханәчесе Сафиуллина Гөлия апа алар белән берлектә "Онытылмый, һич тә онытылмый, хәтерләрдә һаман яңара!" дип аталган очрашу кичәсе уздырды.

Тиздән авылларда сыерчыкларның матур авазлары ишетелә башлар, чөнки канатлы дусларыбыз туган якларына әйләнеп кайтачак. Шул уңайдан мәктәбебездә сыерчык оялары ясау буенча бәйге уздырылды. Әлеге бәйгедә һәр сыйныфтан да укучылар бик актив катнашты, оялар гына түгел, төрле формадагы җимлекләр дә ясап алып килделәр. Иң матур, иң яхшы дип табылган эшләргә урыннар да билгеләнде: 1 урын - Садриев Ә., 2 урын - Мотыгуллин И., 3 урын - Асадуллин А. Аларны чын күңелдән котлыйбыз! Шулай ук әлеге сыерчык оялары район этабына җибәрелде.