Татарстан Республикасы мәгариф һәм фән министрлыгы 2017 нче елның 9-26 август көннәрендә А.Казакевич исемендәге "МИРАС" сәламәтләндерү лагеры базасында ял итү сменасын оештыра  на (Кырым Республикасы, Бакчасарай районы, Песчаное бистәсе). Путёвка бәясе - 31000 сум. Тулырак мәгълүматны түбәндәге сылтамалар аша узып белеп була:

http://mon.tatarstan.ru/rus/chernomorec.htm

https://www.instagram.com/p/BWo6VNajBEw_N2ijE-HRfSvdbjCW_G5XRbU0es0/?taken-by=kushmanyschool

Игътибар! "Салават күпере" спорт һәм сәламәтләндерү комплексы, төзекләндерү эшләре тәмамланганнан соң, кабат үз эшен башлап җибәрде. Балалар һәм өлкәннәр бассейны, тренажер заллары Сезне көтеп кала. Җәйге график: 8.00 сәгатьтән  22.00 сәгатькә кадәр. Тулырак мәгълүматны 2-10-68, 2-16-46 номерлары аша белә аласыз.

Бүген Казанның Тынычлык бистәсендәге Каенлыкта башкалабыз Сабан туе үтте. Милли бәйрәмгә безнең мәктәбебез укытучылары һәм хезмәткәрләре дә Кайбыч муниципаль районы делегациясе белән берлектә үз көчен керттеләр. Каенлыктагы Сабан туе иртәнге якта 10.00 сәгатьтә башланды. Кунакларны республиканың 11 муниципаль районының мул һәм күңелле “ишегаллары” каршылады. Шулай ук бәйрәм барышында үзешчән сәнгать коллективлары чыгыш ясады. Сабан туе күтәренке рухта бик күңелле үтте.

Мәктәбебезнең 6 нчы сыйныф укучылары Сабиров С. һәм Шәмсетдинова К. Арча районында оештырылган "Без - Тукай оныклары" исемле регионара лагерьда 8-14 июль көннәрендә ял итеп кайттылар. Алар анда шулай ук татар телен камилләштерү буенча үткәрелгән чараларда катнаштылар.

Татарстанда “Үз мәктәбеңә ярдәм ит!“ республика акциясе старт алды. Беренче тапкыр ул 2013 елда Татарстан Республикасы Президенты Рөстәм Миңнеханов инициативасы буенча үткәрелгән иде. Хөрмәтле Кошман мәктәбен тәмамлаган авылдашлар, туган мәктәбегезне кайтып күрергә мөмкинлек табарга тырышыгыз. Аның проблемалары белән кызыксыныгыз һәм исегездә тотыгыз – үткәнне онытмаганның киләчәге бар!

Мәктәбебездә эш бер дә тынып тормый. Җәйге практика үтүче укучылар мәктәп яны кишәрлегендә тырышып хезмәт куя.

Милли бәйрәмебез  - Сабан туе  безнең Кошман авылында  да гөрләп узды. Сабан туеның ачылуы составында укытучылар һәм укучылар булган "Мизгел" фольклор ансамбле чыгышы белән башланып китте. Укучыларыбыз бөтен  милли  уеннарда актив  катнашып бүләкләр алдылар. Көрәш мәйданында да егетләребез көч сынашты. Сабан туеның  милли  уеннарын укытучыларыбыз һәм тәрбиячеләребез бик күңелле итеп оештырдылар. Бәйрәмгә килгән кунаклардан, авылдашлардан күп кенә рәхмәт сүзләрен ишетергә туры килде. Халык күңелен күтәрүче бу милли бәйрәмебез гасырларга дәвамлы булырлык итеп саклыйк.

Бүген районыбызда татар халкының йөзек кашы булган милли бәйрәмебез - Сабантуй гөрләп узды. Сабантуйда халкыбызның гореф-гадәтләрен чагылдыру максатыннан һәр авыл җирлегенең яшәү рәвешен күрсәткән кунакчыл йортлар көн дәвамында үз эшен алып барды. Әлеге чарага безнең мәктәбебез укытучылары һәм укучылары үзләренең зур өлешләрен кертте.

Бүген мәктәбебезнең 9 ынчы сыйныф укучыларының Чыгарылыш кичәсе булды, 5 егет һәм 3 кыз кулларына аттестат алдылар. Укучыларга мәктәп директоры Хәмидуллин И.И., беренче укытучылары Хәмидуллина М.С., сыйныф җитәкчеләре Нәфыйкова Р.М., Кайбыч районы Башкарма комитеты вәкиле Бикбова Ф.Ш., Кошман авыл җирлеге башлыгы Сафина Л.Р.котлау сүзләрен һәм изге теләкләрен юлладылар, әти-әниләр балаларга хәер-фатихасын җиткерде. Кадерле укучылар, тормыш юллары сезгә киң ачык. Тормышка сез нык адымнар белән аяк басасыз. Мәктәптә алган белемнәрегез, канатлы теләкләрегез сезне һәрчак алга әйдәп торсын, тагы да кыюрак атларга чакырсын. Уңышлар сезгә!

Мәктәп яны кишәрлегендә эш гөрли: җәйге практика үтүче укучылар бәрәңге чүбен утауның икенче катын төгәлләделәр бүген.