Балаларны ата - аналар белән берлектә тәрбияләү бәйләнешен ныгыту максатыннан нәниләр төркемендә 8 мартка багышланган бәйрәм иртәсе узды. 

Барлык әбиләрне, әниләрне, апаларны, кызларны, сеңелләрне 8 Март белән тәбриклибез! Сез булганга тормыш матур. Авырмыйча, шатлыклы көннәр кичереп, туганнарыгызның, якыннарыгызның кадерле кешесе булып яшәгез. "Әниләргә тиңнәр юк" - дибез, шушы фикерне исбатлап, иң  кадерле кешеләребез - әни белән әбине кунакка дәштек. Аларга чын бәйрәм бүләге ясадык: бергәләшеп җырладык, биедек, йөрәгебездән чыккан шигырь юлларын укыдык, үз кулларыбыз белән ясаган чәчәкләрне күргәч, якыннарыбыз сөенделәр, рәхмәт әйттеләр. 

Сүзебез тагын Зифа турында. 4 нче мартта Балтачта шәхси эшмәкәр Камалов Р.З. призына 2010 елда туган һәм аннан яшьрәк кызлар арасында уздырылган шахмат ярышында Корбанова Зифа I урынны алды. Шунда ук  "Иң яшь шахматчы"  номинациясендә җиңүче дип табылды, диплом белән бүләкләнде. Икенче көнне Зифа Казан шәһәрендә яңа үрләр яулады. 2011 елда туучы кызлар арасында ачык шахмат  "Шахмат патшабикәсе - 2017" фестивалендә авыл шахматчы кызларын  иң яхшы нәтиҗәләр белән узды һәм мактау грамотасы белән бүләкләнде. Зифаның исеме җисемнә дә, эшенә дә туры килә. Ул - иң яхшысы!

23 нче февраль Ватанны саклаучылар көне уңаеннан кечкенәләр һәм уртанчылар төркемендә "Әти белән көчле мин" исемле бәйрәм иртәсе булды. 

Ватанны саклаучылар көне уңаеннан, әтиләребезгә чын күңелдән бәйрәм ясадык. Үзләренә багышланган шигырьләрне тыңлап утырган әтиләребезнең елмаюы безне дәртләндерде. Бергәләп "Солдатта булган диләр"  җырын җырладык; солдат тормышын, хезмәтен сурәтләгән биюләр биедек һәм үз кулларыбыз белән йөрәк җылысын кушып ясаган открыткалар бүләк иттек.

Бәйрәм белән барлык әтиләрне, абый-бабайларны, малайларны котлыйбыз! 

Нәниләр төркемендә бәйрәм уңаеннан "Әтием - горурлыгым" исемле бәйрәм иртәсе узды. Нәниләр әтиләрен үзләренең җырлары, биюләре, шигырьләре белән сөендерделәр. "Төлке белән Каз" әкиятен уйнаулары әтиләр бәйрәмен тагын да ямьләндерде.

Бүлмә гөлләренең кеше тормышында гаять зур әһәмияткә ия булуларын максат итеп, зурлар һәм мәктәпкә хәзерлек төркемнәрендә "Бүлмә гөлләре" проекты эшләде. Балалар гөлләрне вегетатив үрчетергә, тәрбияләргә өйрәнделәр. Төркемдә гөлләр утырттылар. Тәрбияче Раилә Мөхәммәтфатиховна, гөлләр яшел яфракка күмелеп шау чәчәк атсыннар өчен, элек әбиләребез кулланган файдалы киңәшләр белән таныштырды. 

Нәниләр төркемендә тәрбияләнүче балалар әтиләрен бәйрәм белән котлап, үзләреннән өлеш керттеләр. Бәйрәмнәр мөбәрәк булсын!

Кечкенәләр һәм уртанчылар төркеме балалары үз куллары белән әтиләргә бүләк ясадылар.

"Ел тәрбиячесе - 2017" конкурсында район буенча III урынга лаек булган тәрбиячебез  Хөсәенова Гөлфия Хәйдәровна Республика зона этабында матур чыгышы белән сөендерде. Аңа алга таба да уңышлар телибез.