Укытучылар коллективы үзара дәрескә йөреп, камилләшәләр, белемнәре, укыту методикалары белән уртаклашалар. Мәктәп директоры Хәкимҗанов Хәмит Газимович физика фәненнән 10 нчы сыйныф укучылары белән дәрес күрсәтте. Әлеге дәрес мәктәбебез укытучылары өчен мастер-класс рәвешендә узды. 

2 нче сыйныф укучылары сыйныф җитәкчеләре Борханова Римма Нурмөхәммәтовна белән "Нәрсә ул бәхет? Бәхет өчен нәрсә кирәк?" темасына ачык тәрбия сәгате күрсәттеләр. Тәрбия сәгате барышында укучылар бәхет чылбыры төзеделәр, фикерләре белән уртаклаштылар. 

Сәнгать атналыгы кысаларында башлангыч сыйныф укучылары өчен 6-8 нче сыйныф укучылары рәсем ясау буенча мастер класс күрсәттеләр, рәсем ясау техникасы белән таныштырдылар.

Мәктәбебездә сәнгать атналыгы башланып китте. Музыка һәм технология укытучысы Төхфәтуллина Фәрдия Римхатовна тәнәфестә укучылар өчен төрле мастер класслар уздыра, музыкаль тәнәфесләр оештыра. 5-6 нчы сыйныфлар өчен "Музыканың кеше тормышында әһәмияте" дигән темага класстан тыш чара узды. Монда укучылар татар композиторы Сара Садыйкова, җырчы Илһам Шакиров кебек бөек шәхесләрнең тормыш юлы белән таныштылар. 

Укучыларыбыз спортны яраталар, спортка тартылалар. Шул исәптән без кышкы спорт төрләре буенча спартакиада оештырырга уйладык. Дәресләр беткәч, 5 - 11 нче сыйныф укучылары чаңгы ярышына чыктылар. Әлеге ярышта укучылар актив катнашып, призлы урыннар яуладылар. 

Югары сыйныфларда ата-аналар җыелышы үтте. Иң элек алар төп фәннәрдән дәресләр карап киттеләр. Көннең икенче тәртибе буенча ата-аналар, укучылар һәм фән укытучылары катнашында түгәрәк өстәл узды. Монда чыгарылыш сыйныф укучыларының билгеләре, имтиханнарга әзерлекләре белән таныштылар, килеп туган сорауларга җавап эзләделәр. 

Укучыларыбыз төрле иҗади бәйгеләрдә теләп катнашалар һәм уңышларга ирешәләр. "Парклар маршы - 2016" экология конкурсының республика этабында 6 нчы сыйныф укучылары Хөснетдинова Ландыш (укытучысы Гыйззатова Айсылу Рафизовна) 3 нче урынга лаек булды, ә Мифтахова Гүзәл (укытучысы Ганиева Ләйсән Фәргәтовна) катнашучы буларак билгеләнеп үтте. Аларны котларга "Ашыт" заказнигы хезмәткәрләре Сабиров Рәшит һәм Абдрахманова Гөлнара килделәр. 

Бүген башлангыч сыйныфларда ата-аналар җыелышы үтте. Сыйныф җитәкчеләре аларга ачык дәрес күрсәттеләр, ә 4 нче сыйныфта ата-аналар укучы балалары белән бергә ВПР эшләре эшләп карадылар. Икенче көн тәртибе буенча сыйныф җитәкчеләре ата-аналарны борчыган сорауларга җавап бирде, дәрестән тыш эшчәнлек белән таныштырды. 

Беренче яртыеллыкка йомгак ясап, ата-аналар өчен җыелышлар башланып китте. Әлеге җыелышларны башка еллардан үзгә итеп үткәрергә уйладык: һәр сыйныфта аерым ата-ана һәм укучы балалар катнашында. 5 нче сыйныфларда җыелыш математика дәресеннән башланып китте. Сыйныф җитәкчеләре, шулай ук математика укытучысы Хабибуллина Айсылу Мөбәрәкҗановна әти-әниләргә укучыларның белемнәрен күрсәтү йөзеннән дәрес фрагменты күрсәтте. Икенче көн тәртибе буенча әниләрне һәр фән укытучысы баласының өлгереше, дәресләргә әзерлеге белән таныштырып үтте. Ата-аналар бик канәгать калдылар, мондый җыелышлар отышлырак дип таптылар. 

Узган елга йомгак ясап, 2017 нче елга яңа максатлар, бурычлар билгеләр вакыт җитте. Каникулдан килүгә укытучылар коллективы беренче педсовет утырышына җыйналды. Утырышта беренче яртыеллыкка йомгак ясалды, ирешкән уңышларга бәя бирелде һәм җитешсезлекләргә анализ ясалды. Педсовет барышында Хабибуллина Айсылу Мөбәрәкҗановна һәм Ганиева Люция Фаезхановна ФДББС нигезендә яткан проект эшенең структурасы, әһәмияте турында чыгыш ясадылар. Укыту эшләре буенча директор урынбасары Ганиева Ләйсән Фәргатовна беренче яртыеллыкта эшләнгән эшләргә төпле анализ ясады, икенче яртыеллыкта планлаштырылган конкурслар, контроль эшләр белән таныштырып үтте.