Бүген 21 нче  июльдә безнең  мәктәптә " Баланы  мәктәпкә  әзерләргә булыш" акциясе   үз  эшен  дәвам  итте.  Беренче  сыйныф  укучылары  һәм аларны  озата килүче   әти - әниләренә   өлкән   сыйныф  укучылары  тарафыннан  әзерләнгән  концерт  программасы тәкъдим  ителде.   Район  мәгариф  бүлеге  җитәкчесе  Р.С.Низамов  яңа  уку  елында, беренче  сыйныфка  кабул  ителүче   балаларга тиешле  уку әсбаплары тапшырды. Киләчәктә  бу укучылар  мәктәбебезнең  алдынгы укучылары  сафын  тулыландырыр  дип  өмет  итәбез.

Бүген лагерьда көтелгән шатлыклы бәйрәм - Сабантуй бәйрәме. Балалар бу көнне зур түземсезлек белән көттеләр. Сабантуй программасы үз эченә татар милли уеннарын, конкурсларны ала. Уеннар концерт номерлары белән аралашып уздырылды. Балалар өчен иң сөендергәне, мөгаен, һәрбер уеннан соң бүләк алу булды.Өч атна дәвамында үткәрелгән көннәр балалар арасындагы дуслыкны тагын да ныгытты. Хуш лагерь, без сине сагынырбыз!!!!!! 

Бүген 9нчы сыйныф укучылары өчен иң дулкынландыргыч көн - Чыгарылыш кичәсе! Бу уку елында мәктәпне 10 укучы тәмамлый.  Имтиханнар, шау-шулы мәктәп еллары артта калды. Бүген алар кулларына өлгергәнлек аттестатларын алдылар. Киләчәктә аларга үз юлларын табуларын, сәламәтлек һәм уңышлар телибез! Кая гына барсагыз да, нинди генә һөнәр иясе булсагыз да туган мәктәбегезне, укытучыларыгызны онытмагыз. Ак юллар сезгә!

  20 июнь - Малайлар һәм кызлар көне. Бу көнгә балалар алдан ук әзерләнделәр. "Малайлар" һәм "Кызлар" командасы арасында ярыш һәм конкурс үткәрелде. Шулай ук лагерьга йөрүчеләр арасында "Иң-иң... " номинациясендә җиңүчеләрне билгеләнде. "Гүзәл затларны саклыйк" дигән темага кызыклы әңгәмә һәм "Минем кадерле әнием" темасына иҗади конкурс та уздырылды. Көн бик күңелле һәм файдалы  үтте.

19 июнь лагерьда - Гиннес рекордларына багышланган иде. Иртәнге аштан соң балалар Гиннес китабы турында презентация карадылар һәм кызыклы рекордлар турында видеофильм карадылар. Ахырдан лагерьның рекордлар китабы тулыландырды. Узган уку елларындагы рекордсменнарны барладылар. Авыл китапханәсенә барып бик кызыклы әңгәмәдә катнашып кайттылар. Обедтан соң күңелле стартлар уеннары оештырылды.

 Бүген лагерьда  - Шефлык көне. Көнебез "Шефлык итү" дигән темага әңгәмә белән башланып китте. Аннан соң балаларга   рус язучысы А.П.Гайдарның тормышы һәм иҗатына багышланган презентация тәкъдим ителде. Шулай ук укучылар язучының "Тимур һәм аның командасы" әсәре буенча эшләнгән фильмын да карадылар.  Авылыбыздагы Бөек Ватан сугышында һәлак булучылар һәйкәленә рейд ясалды, әйләнә-тирәсе чистартылды. Көннең икенче яртысында укучылар "Игелекле эшнең иртәсе - киче юк "дигән темага иҗади конкурста катнаштылар.

Бүген лагерьда - Спорт көне. Көндәлек режим буенча бу көн иртәнге зарядкадан башланды. Иртәнге ашны ашагач балалар өчен "Сәламәтлек - зур байлык" исеме астында диспут оештырылды. "Байрак эзләү" уеныда бик күңелле булды. Спорт көне уңаеннан күңелле эстафеталар оештырылды, спорт уеннары турында презентация карадылар.  Китап уку сәгатендә балалар авыл китапханәсенә барып кызыклы конкурсларда катнаштылар. 

"Ак каен" лагере балалары буген Ташкичу авыл китапханәсенә барып "Хайваннар дөньясы" дәресенә катнаштылар. Бу дәреснең максаты:

1. Укучыларны кыргый һәм йорт хайваннары белән таныштыру;

2. Алар турында булган белемнәрен тирәнәйтү;

3. Хайваннарга сакчыл караш тәрбияләү.

Табышмаклар һәм кроссворд ярдәмендә, уен формасын кулланып укучыларның белемнәрен тикшерделәр. Әңгәмә барышында балалар үз фикерләрен әйттеләр. Хайваннарны якларга, сакларга, рәнҗетмәскә, юкка чыгармаска кирәклеген аңладылар.

  Көн яңгырлы булуга карамастан, лагерь үз эшчәнлеген дәвам итә. Бүген лагерьда - Хезмәт көне. Иртәнге аштан соң балалар белән " Хезмәт төбе - хөрмәт" дигән темага әңгәмә үткәрелде. Укучылар хезмәт турындагы татар халык мәкальләрен һәм әйтемнәрен искә төшерделәр. Шулай ук "Минем яраткан һөнәрем" дигән темага иҗади эшләр конкурсы уздырылды. Биология укытучысы Мөхәммәтҗанова Н.И. балаларны мәктәп эчендәге гөлләрне тәрбияләү серләре белән дә таныштырды. Көндезге аштан соң хезмәт темасына багышланган презентация һәм мультфильмнар күрсәтелде.

     “Бер-беребезгә мәрхәмәтле булыйк” дигән темага әңгәмә үткәрелде. “Мин врач булырга телим” дигән темага беренче ярдәм күрсәтү буенча күнекмәләрне искә төшерү, “Кыр госпитале”  уены оештырылды. Бу көн “Минем иң зур хыялым” темасына иҗади эшләр конкурсы белән тәмамланды.