Районда "Бөек Җиңүнең 70 еллыгына - 70 оя" акциясе игълан ителгән иде. Мәктәп укучылары бу акциягә бик теләп кушылдылар.  Ташкичү, Мәмсә, Симетбаш мәктәпләреннән 86 кош оясы ясады. Шул оялар арасыннан 3 класс укучысы Хакимзянова Рәшидәнең оясы иң оригиналь дип табылды һәм район конкурсына җибәрелде. Бу ояны ясауда Рәшидәгә әтисе Рөстәм булышкан.

   20 март көнен мәктәп укучылары түземсезлек белән көтеп алды. Чөнки бу көнне безгә "Ялкын" журналы хезмәткәрләре килергә тиеш иде. Ниһаять, кунаклар килеп җитте! Башта очрашу үткәрдек. Аннан соң шигырь, хикәя язу, рэп, фотосүрәт төшерү сәнгате буенча мастер-класс оештырылды. Укучылар бик канәгать калды.

                 Әлифба, Әлифба!

              Беренче битеңне 

             Ачкан көн хәтердә.....

    Ә бүген Әлифбаның соңгы битен ачтык. Күп нәрсәләргә өйрәттен син безне, Әлифба! Башта куркып кына ачкан идек. Бүген зур текстлар укырга, аңларга өйрәндек. Табышмакларга җаваплар табабыз, мәкальләр, әкиятләр укый беләбез.  Безнең алда зур бурычлар - зур томнар уку! 

   Бүген 6 класс укучылары өчен авыл китапханәсе  белән берлектә сугыш чоры баласы Мөнирә апа Габидуллина белән очрашу үткәрелде. Мөнирә апа сугыш чорында күргән авырлыклар, хәзерге тормышның матурлыгы турында сөйләде.        Мөнирә апаның балачагы, яшьлеге сугыш чорына, сугыштан соңгы авыр елларга туры килгән.

    -Бервакытта да хезмәттән курыкмадым. Шуңа күрә хезмәтемне бәяли дә белделәр!-дип сөйләде ул балаларга. Ялгыз яшәсә дә, инде яше 80 нән артып китсә дә, сыер тота. Хайваннарны бик яратуы турында да әйтеп үтте.Тынычлыкның кадерен белергә, укучыларга тырышып укырга кирәклек турында белдерде.

   Бүген Крымның Россиягә яңадан кушылуына 1 ел. 2014 нче елның 18 мартында булып узган Референдумда Крымда яшәүче халыклар Россиягә кушылырга теләкләрен белдерделәр. Шушы уңайдан мәктәптә класс сәгатьләре булып узды. Класс җитәкчеләре Крым ярымутравы, табигате, халкы турында кызыклы материаллар бирделәр. Өйгә кайткач, телевидение тапшыруларында булган яңалыклар, халыкларның бәйрәм итү тантаналарын анализларга тәкъдим ителде.

    Мәктәптә Бөек Җиңүнең 70 еллыгына күп кенә чаралар оештырыла. Шуларның берсе - "Бөек Җиңүгә - 70 сыерчык оясы" акциясе. 1 класстан алып 9 класс укучыларына кадәр бу акциядә бик теләп катнаштылар. Бүгенге көнгә 58 кош оясы ясалып, мәктәпкә конкурска алып киленде. Ягез, кемнең оясы җиңеп чыгар икән?

    15 март көнне Ташкичү авылы халкы Культура йортына ашыкты. Чөнки бу көнне Культура йортында Ташкичү һәм Яңа Кырлай авыл җирлекләре көче белән Бөек Җиңүнең 70 еллыгына багышланган иҗат концерты билгеләнгән иде. Бу концертта мәктәп укытучылары да актив катнашты. Бию номинациясендә Ә.Ә.Вафина, Ф.Ф.Хабибуллина, Ф.Ф.Валишина, "Һөнәрле үлмәс, һөнәрсез көн күрмәс" номинациясендә башлангыч класслар укытучысы М.М.Камалиева үзенең иҗат эшләре белән таныштырды. "Кич утыру" номинациясендә Ф.Ф.Валишиналар үзләренең осталыкларын күрсәттеләр. Халык иркенләп ял итте.

   2015 нче елның 12-14 март көннәрендә Менделеевск шәһәрендә укучыларның йөзү буенча Спартакиадасы уза. Бу ярышта мәктәбебезнең 8 класс укучысы Зайнуллин Данил дә катнаша. Ул команда ярышында йөзеп, Спартакиадада 2 нче урынны яулады. Спартакиада ярышлары эле дә дәвам итә. Яңа уңышлар көтәбез синнән, Данил!

    Бүген мәктәптә "Дөрес туклану серләре" темасы астында класс сәгатьләре узды. Бу сәгатьтә дөрес туклану, организмга аксым, углевод, майлар, витаминнарың тәэсир итү көче  турында сөйләшү уздырылды. Бертөрле туклану, режим сакламау, составында Е төркемендәге элементлар булган азык куллануның зарарына басым ясалды. Укучыларга витаминнарга бай ризыклар, аларның кеше тормышында әһәмияте турында конкрет мисаллар белән аңлатылды.

    Бүген мәктәптә профсоюз членнарының коллектив договор үтәлешен тикшерүгә багышланган җыелышы булды.  Җыелышта мәктәп директоры И.И.Гибадуллин, профком рәисе Г.З.Фазуллиналарның договор үтәлеше турында эчтэлекле чыгышлары тыңланды. Договор пунктлары , гомумән алганда, үтәлә. Эш сәгате, ял, отпуск бирү, төрле кыен хәлләрдә калганда бирелә торган льготалар тормышка вакытында ашырыла.

   М.З.Гарифжанов  профсоюз членнарын РФ сенең Мәгариф һәм фән министрлыгының 2014 нче елның 22 декабрендә чыккан №1601 приказына  "ПРодолжительность рабочего времени (нормы часов педагогической работы за ставку зароботной платы) педагогических работников" кушымтасы белән таныштырды.

   Җыелыш эшендә МБГБУ "Г.Тукай исемендәге Ашытбаш урта гомуми белем мәктәбе" профком рәисе Л.Ф.Ибраһимова катнашты, җыелышның бик эшлекле үтүен белдерде.