8 февраль Россиядә “Россия фәне көне” буларак билгеләп  үтелә. Шушы уңайдан мәктәптә класс сәгатьләре булып узды. Укучыларга бүгенге көндз фән үсеше, фәннең халык тормышында роле турында сөйләнелде. Укучылар белән виктриналар, кызыклы сорауларга җаваплар алу оештырылды. Өлкән клас укучылары фән-техника яңалыклары белән танышты.

    2019 нчы елның 1 февраленнән мәктәптә патриотик айлык кысаларында төрле чаралар оештырыла башлады. ФОРПОСТ оешмасы әгъзалары Яңа Кенәр мәктәбедә узган конкурста уңышлы гына чыгыш ясадылар. 1-9 классларда шушы айлык кысаларында патриотик темага рәсем конкурсы оештырылды.  Иң яхшы эшләр Мари Республикасы Речной поселогында хезмәт итүчеләргә җибәреләчәк. Калган эшләр  “Ватанны саклау –изге эш” темасы астында мәктәптә оештырыла торган күчмә күргәзмәдә урын алачак.

    Укытучыларның педагогик осталыкларын барлау йөзеннәнтөрле ярышлар үткәрелә. Бу көннәрдә “Класс җитәкчесе- 2019” Республика ярышларының зона туры уза. Безнең мәктәптән бу ярышларда Симетбаш башлангыч мәктәбе укытучысы Галиева Гүзәл Илдар кызы каташа.Гүзәлгә бу ярышларда уңышлар телик!

Районда “Менә дигән вожатый!” исеме астында укучылар арасында зона ярышлары булып узды. Бу ярышта 7 класс укучысы Касимова Алсу катнашты. Алсу- уку отличнигы, район, республика күләмендә уза торган төрле бәйгеләрдә катнаша, призлы урыннар яулый. Алсу мәктәптә уза торган барлык концертларда чыгыш ясый, кече яшьтәге балалар белән эшләргә дә вакыт таба.

   Бүген мәктәптә Яңа Кырлай Г.Тукай музей-комплексы фәнни хезмәткәре Минһаҗева Сөмбел Мөдәррис кызы кунакта булды. Ул башлангыч һәм 5 класс укучылары белән Г.Тукай тормышы, аның әсәрләренә күзәтү оештырды. Чара бик җанлы барды. Укучыларның яшь үзенчәлекләрен искә алып, чараны төре формада оештырды. Укучылар ярыштылар да, Г.Тукай әсәрләреннән төзелгән сорауларга да җавап бирделәр, Г.Тукай әсәрләре персонажлары сурәтләрен буяп та уйнадылар. Очрашу укучылар өчен бик файдалы булды.

   5-9 нчы сыйныфларда Сталинград сугышының 75 еллыгына багышланган, “Хәлиткеч Сталинград сугышы” дигән темага сыйныф сәгате үтте. Укытучы Шаһидуллина Р.С. укучыларга Бөек Ватан сугышы, бу сугышта илебез халкының күрсәткән батырлыгы һәм сугыш елъязмасының иң куркыныч бер өлеше булган Сталинград сугышы турында тетрәндергеч итеп сөйләде. Мәктәпнең Юнармия отряды командиры да укучыларга Сталинград сугышы геройлары хакында сөйләде. Аннары укучылар Сталинград сугышына багышланган видеоязма карадылар. Класс сәгатендә сөйләнелгән вакыйгаларга бер укучы да битараф калмады, үз кичерешләрен башкалар белән уртаклаштылар.

1 февраль көнне мәктәбебездә студентлар белән очрашу кичәсе үткәрелде. Кичәге укучылар студент тормышы турында, дәресләр, яшәү шартлары хакында, беренче көннәрдә булган дулкынланулары, мәктәпне сагынулары турында сөйләделәр, чыгарылыш сыйныф укучыларына алга таба нинди һөнәр сайлау буенча үзләренең киңәшләрен дә бирделәр. Очрашу бик матур һәм җанлы узды. Чыгарылыш класс укучылары өчен бу күрешү файдалы булыр дип ышанып калабыз.

2018 нче ел Татарстан Республикасында Ш.Мәрҗани елы дип игълан ителде. Шушы ел уңаеннан Арча районы Ташкичү төп мәктәбендә, районда, республикада, гомумән, төрки дөньясында бу вакыйга зурлап билгеләп үтелде.

2019 нче ел җитте. Ш.Мәрҗани елы тәмамланды. Шушы уңайдан мәктәптә “Бәһа җитмәс кыйбат хәзрәт” дип аталган районара укулар оештырылды. Укучыларга өч төрле юнәлештә фәнни-тикшеренү эшләре темалары тәкъдим ителде. Барлыгы 50 дән артык эш килде, шуларның 34е лауреат исеменә лаек булды. 2019 нчы елның 30 гыйнваренда шушы укуларның йомгаклау туры узды. Бу укуларны Арча муниципаль районы башлыгы Нуриев Ильшат Габделфәрт улы ачып җибәрде, Шиһабетдин Мәрҗанинең мирасын өйрәнүнең әһәмиятенә басым ясады.

Укуларда Татарстан Республикасы Фәннәр академиясенең Ш.Мәрҗани исемендәге институты хезмәткәрләре – филология фәннәре кандидаты Гайнетдинов Айдар Марсил улы, тарих фәннәре кандидаты Сәләхова Эльмира Кадим кызы, фәнни хезмәткәр Баһаветдинова Халидә Зиннәт кызы катнаштылар. Алар укуларда катнашучыларны фәнни эш алып бару серләренә төшендерделәр.

Ташкичү төп мәктәбе коллективы Ш.Мәрҗанинең 200 еллыгын билгеләп үтү көннәрендә Ш.Мәрҗани исеме белән бәйле оешмалар белән элемтәгә керде. Бу укуларда шулай ук Казан шәһәре Ш.Мәрҗани исемендәге мәдрәсә имамы ярдәмчесе Биккинин Исмәгыйль хәзрәт, Әтнә районы Ш.Мәрҗани исемендәге Комыгурҗа урта мәктәбе музее мөдире Зиннатуллина Зилә Рафаэль кызы да катнаштылар. Исмәгыйль хәзрәт Ш.Мәрҗани исемендәге мәдрәсә белән, Зилә Рафаэль кызы Мәрҗани музеенда саклана торган истәлекле экспонатлар белән таныштырдылар.

Укуларда “Мирас”журналы мөхәррире урынбасары Гибадуллин Ленар Ильгиз улы, “Әлифба” музее директоры Таҗиев Дамир Гыйлемшәех улы да катнаштылар. Алар Татарстанда Ш.Мәрҗани исеме белән бәйле урыннар турында сөйләделәр, Ш.Мәрҗани эзләре буенча экскурсияләрдә катнашырга тәкъдим керттеләр.

Тукай Кырлай урта мәктәбе, Ташкичү төп мәктәбе, Мәтәскә урта мәктәбе укучылары үзләренең фәнни-тикшеренү эшләре белән таныштырдылар.

Ш.Мәрҗани укулары Ш.Мәрҗанинең 200 еллыгына багышлап Татарстан Республикасы мөселманнарының диния нәзәрәте тәкъдим иткән, Нияз хәзрәт Сабировның сценариесе нигезендә төшерелгән “Мәрҗани” видеофильмы белән үрелеп барды.

“Таттелеком” җәмгыяте укуларда катнашучыларга “Татарский Геродот” дип аталган китабын бүләк итеп бирде

Урамда салкын кыш. Кошларга азык табу көннән-көн кыенлаша. Шуны күздә тотып, 5 нче класс укучылары технология дәресендә кошларга җимлекләр ясадылар. Бүген алар кечкенә кошчыкларны үзләренең сыйлары белән сөендерделәр. Кыш буе җимлекләр үзләренең дуслары белән тулып торыр, ә 5 нче класс укучылары җимлекләрне карап, җим белән тулыландырып торырлар.