Татар телен саклау - изге бурыч. Тел - белем һәм тәҗрибә туплау, халыкның төрле казанышларын яңа буынга тапшыру чарасы да. 6-7 нче класс укучылары белән уздырылган "Күңел көзгесе" интеллектуаль уены  туган телнең үзенчәлекләрен аңларга, аның белән горурлану хисләре уятырга ярдәм итте.

        Бөек Ватан сугышы... Бөек Җиңү... Бөек Җиңүгә 70 ел...  Бу вакыйгалар, андагы батырлыклар 70 еллык тарих катламы астында калды. Ләкин әнә шул катламнар астында югалмыйча, кешелек дөньясын юкка чыгудан саклап калган, бүгенге көннәргә кадәр халык күңелендә, ил йөрәгендә онытылмаган каһарманнарыбызның батырлыклары әле исән, дөнья тарихында алтын хәрефләр белән язылган. Шуңа күрә без аларны онытмаска, сафлары сирәгәя барган сугыш ветераннарын, тыл батырларын хөрмәт итәргә, зурларга, батырлыкларын киләчәк буыннарга тапшырырга тиешбез. 

       Бүген, 23 нче февраль көнне Урта Курса авыл җирлеге буенча тыл ветераннарына Бөек Җиңүнең 70 еллыгы уңаеннан медальләр тапшыру тантанасы булды. Тыл хезмәтчәннәрен  "Курса МТС" ы җитәкчесе Гыйләҗетдинов Р.Г., Урта Курса авыл җирлеге башлыгы Вафина Р.Р. котлады. Мәктәп укучылары, авыл үзешчәннәре башкаруында сугыш чоры җырлары, тетрәндергеч шигырьләр яңгырады, биюләр башкарылды.

Ватанны саклау-һәр кешенең, бигрәк тә һәр ир кешенең изге бурычы. Үзләренә йөкләнгән бурычны киләчәктә һәр укучы төгәл үтәр дип ышанабыз. Әлегә егетләр мәктәптә үз-үзләрен чыныктыра, спорт белән шөгыльләнә, хәрби хезмәткә әзерләнә. 20 нче февраль көнне уздырылган "Ягез әле, егетләр!" кичәсе дә көчлеләрне, җитезләрне ачыкларга ярдәм итте, егетләрне хәрби хезмәткә әзерләүдә мөһим чара булды. Командалар бер-берсен сәламләгәннән соң, автоматны сүтеп җыю, ату, тартылу, противогаз кию,  аркан тарту һ.б. уеннарда көчләрен сынадылар. 

Укучылар дәресләрдән бушаган арада, дәресләрдән тыш спортзалда шөгыльләнергә ярата. Бүген алар командаларга бүленеп, баскетбол уйнадылар.

23 нче февраль- Ватанны саклаучылар көне якынлаша. Башлангыч класс укучылары технология дәресләрендә әтиләренә, абыйларына бүләкләр ясыйлар. Бүген 2 нче класс укучылары практика узучы Рамилә апалары белән бүләк әзерләделәр.

Хәрби-патриотик айлык кысаларында мәктәптә спорт ярышлары уздыру дәвам итә. Бүген 5-9 нчы класс егетләре арасында волейбол ярышы уздырылды. Нәтиҗәдә 9 нчы класс егетләре җиңү яулады.

Арча районы мәгариф хезмәткәрләренең профсоюз членнары арасында уздырылган чаңгы ярышында мәктәпнең физик тәрбия укытучысы Минһаҗев М.В. 3 урынны яулады. Чаңгы спорты буенча аның киләчәктә тагын да югарырак үрләр яулавын телибез.

17 нче февраль  көнне Урта Курса төп мәктәбендә  Арча муниципаль  районы гомуми белем мәктәпләренең башлангыч сыйныф укытучылары семинары узды. Ул “Дәресләрдә сингапур системасының структураларын куллану” дигән тема астында үтте. Семинарда Арча шәһәре мәгариф идарәсенең информацион-методик үзәк методисты Яхина Р.Г. катнашты. Башлангыч сыйныф укытучылары түбәндәге темаларга ачык дәресләр күрсәттеләр: “Табигать һәм без. Кешенең табигый байлыкларны куллануы” темасына 1 нче сыйныфта әйләнә-тирә дөнья белән танышу фәненнән (укытучы Насыйбуллина Ф.К.), “Үзәк һәм радиус” темасына 2 нче сыйныфта математикадан (укытучы Гыйбадуллина Н.Т.), “Эшең барып чыкмаса, гаепне үзеңнән эзлә” темасына 3 нче сыйныфта әдәби укудан (укытучы Мөхәмәдиева Н.З.), “Тәртип саннары” темасына 4 нче сыйныфта татар теленнән (укытучы – Минһаҗева Ч.М.). Укытучылар үз дәресләрендә сингапур системасының күп төрле структураларын кулландылар.

      Башлангыч сыйныф укытучылары семинарында сингапур системасының структураларын кулланып укытучылар татар теле (Гыйбадуллина Н.Т.), сынлы сәнгать (Мөхәмәдиева Н.З.),  музыка (Минһаҗева Ч.М.), физик культура (Насыйбуллина Ф.К.), технология (Солтанова И.А.) фәннәреннән мастер-класслар күрсәттеләр.