8 нче август көнне Арча шәһәрендә балалар Сабантуе уздырылды. Анда мәктәбебез укучылары һәм авылның "Мөхәммәтвафа" мәчетендә оештырылган лагерьга йөрүче балалар катнашты. Көрәшергә яратучы бер төркем укучылар тренерлары Лотфуллин М.Л. җитәкчелегендә көрәш ярышын үз итте. Нәтиҗәләре куандырырлык та. Үз үлчәү категорияләрендә Мөхәрләмов Айдар 1 нче, Нурисламов Рәниф һәм Гыйльметдинов Таһир 2 нче урыннарны яуладылар һәм кыйммәтле бүләкләргә ия булдылар. Мөхәрләмов Айдар Арча районы башлыгы И.Г.Нуриев кулыннан скутер ачкычы алу бәхетенә иреште.  Афәрин, егетләр!

Яз көне һәм җәй буе тырышып эшләгән хезмәтнең нәтиҗәсен күрер вакыт җитә. Бакчада үстерелгән кәбестәләр дә мул уңыш вәгъдә итә. Чөнки укучыларыбыз яшелчәләрне тырышып тәрбияли, араларын эшкәртә. 

Бүген махсус комиссия мәктәпнең яңа уку елына әзерлеген тикшерде һәм яхшы бәя бирде. Дөрестән дә, мәктәп территориясе матурлыгы белән һәркемне үзенә җәлеп итеп тора. 

Мәктәп янындагы чәчәклек мәйданы шактый урынны алып тора. Нинди генә чәчәкләр үсми биредә?! Чәчәкләр - шатлык һәм матурлык чыганагы. Алар безнең тормышыбызны бизи, рухыбызны күтәрә, кешеләр арасында эчкерсез дуслык билгесе булып та хезмәт итә.

Укучылар җәй буе мәктәп бакчасында тырышып эшлиләр. Түтәлләрне йомшарталар, агач араларын эшкәртәләр, яшелчәләргә су сибәләр. 

Бүген көнне лагерьга йөрүчеләр күңелле үткәрделәр. Ял итүнең соңгы көне булганлыктан, рәхәтләнеп җырладылар, күмәк уеннар уйнадылар, төрле кызыклы конкурслар уздырдылар. Лагерьда алган тәэсирләре матур хатирә булып озак сакланыр әле.

Бүген лагерьда ял итүче балалар диңгезләр буенча белемнәрен арттырдылар. Хәрәкәтле уеннар уйнадылар, "Ак корабль" уенында актив катнаштылар. Малайлар катнашында үткәрелгән "Рыцарьлар турниры" да укучыларга ошады.

Бүген укучылар "Чәчәкләр көне" н билгеләп үттеләр. Табигать кочагында чәчәкләр белән танышканнан соң, аларны рәсемнәргә төшерделәр. "Иң матур чәчәк ясаучы" конкурсы уздырылды һәм җиңүчеләр билгеләнде.

Бүген мәктәбебезнең  9 нчы классын тәмамлаган 10 укучы мәктәпне уңышлы тәмамлаулары турында өлгергәнлек аттестаты алдылар. Шул уңайдан укытучылар, укучылар, әти-әниләр катнашында тантаналы кичә уздырылды. Чыгарылыш класс укучыларына алдагы көннәрендә дә уңышлар юлдаш булсын!